Во канџите на зимата

Во јануари 2017 година, во екстремни студови и невреме што беснее низ делови од Европа, на многу деца-бегалци и мигранти им се закануваат респираторни и други сериозни болести — па дури и смрт од хипотермија. Со напорите на УНИЦЕФ за зимска подготвеност во земјите од Балканот им се помага на жените и децата да бидат на топло.

Во транзитниот центар за бегалци и мигранти во Табановце во моментот се сместени околу 100 луѓе, од кои една третина се деца. Патронажната сестра Слаѓана Перчинковска од Здружението на медицински сестри, техничари и акушерки, го носи Илијас, завиткан во ќебе, во објектот во кој е сместено неговото семејство, а по нив оди неговата мајка Ширин.

Принудени да бегаат поради конфликтот во Сириската Арапска Република, како и илјадници семејства пред нив, Ширин, мајка на пет деца во раце го држи Илијас, опкружена од другите четири деца во привремениот објект за сместување што е нивен дом во изминатите 10 месеци.

Со помалку масно ткиво за заштита од студот, новороденчињата и малите деца се поподложни на вирусни и бактериски инфекции. Синот на Ширин кој има само пет дена, Илијас, го прегледува патронажната сестра Слаѓана Перчинковска.

Нишкајќи го Илијас во катчето за мајки и бебиња, дел од просторот за деца поддржан од УНИЦЕФ, Ширин ја користи топлата просторија за совети околку исхраната и развојот на Илијас, како и за повремен одмор. Во текот на бременоста, таа доби антенатална грижа од тим на патронажни сестри кои секојдневно се присутни во кампот.

„Овде, ние на некој начин ја чувствуваме разорната траума што ја доживеале многумина од овие луѓе бегајќи од војната. Но, многу сме среќни што можеме да споделиме радосни моменти како овие“, вели сестра Перчинковска додека за првпат го капе Илијас, а неговата сестричка, Солин, 7, набљудува.

Солин (лево) ужива во топлата супа со други сириски девојчиња. Со голем број од децата на Балканот во засолништа што се лошо опремени за зима, ризикот од појава на инфекции е значително поголем.

Континуираната адаптација за зимски услови поддржана од УНИЦЕФ во земјите од Балканот им помага на жените и децата да се заштитат од студот. Две момчиња од Сирија си играат на снегот.