सुरक्षित तथा सिकाइमूलक विद्यालय सञ्चालनका लागि थप तयारी

जनस्वास्थ्य, सुरक्षा र मनोपरामर्श

१.  बालबालिकाको सुरक्षाका लागि न्यूनतम पूर्वाधारको व्यवस्था: फर्निचर; शौचालय; पर्याप्त प्रकाश र हावा आवत जावत गर्न सक्ने कक्षाकोठा; स्वास्थ्य तथा सरसफाइका लागि साबुन पानी, सेनिटाइजर; विद्यालयमा आउनेहरुका लागि तापक्रम लिने व्यवस्था गर्ने ।

२. आचारसंहिताको निर्माण र पालना गर्ने ।

३. अनुगमन तथा सहजीकरण उपसमिति गठन ।

४. विद्यालय सम्बन्धित कसैमा कोभिड१९का लक्षणहरूसँग मिल्दा जुल्दा लक्षणहरू देखा परेमा तत्काल स्थानीय तह, अभिभावक तथा घरपरिवारलाई जानकारी गराउने ।

५.  स्वास्थ्यकर्मी सहितको हेल्प डेस्क निर्माण/ स्वास्थ्य संस्थासँग समन्वय गर्ने ।

६. संक्रमित शिक्षक, विद्यालय कर्मचारी तथा बालबालिकालाई पूर्ण रूपमा निको नहुन्जेल विद्यालयमा नआउने वातावरण मिलाउने र सिकाइ निरन्तरताका लागि वैकल्पिक उपायहरू पहिले नै तय गर्ने ।

७. आवश्यक सेवासँगको समन्वय सञ्चार सुनिश्चित गर्ने, मनोसामाजिक परामर्शको व्यवस्था, हिंसा/ दुर्व्यवहारको सुनुवाईमा पहुँचको व्यवस्था गर्ने ।

भौतिक सुविधा तथा बसाइ व्यवस्थापनको तयारी

१. विद्यालय व्यवस्थापन समितिले भौतिक दुरी कायम राखी सिक्ने वातावरण तयार गर्न कक्षाकोठा, फर्निचर, शौचालय, छात्रावास, सभाहल आदिको आवश्यकता अनुसार पुनःव्यवस्थापन वा मर्मत गराउने ।

२. संक्रमणको जोखिम, विद्यार्थी सङ्ख्या तथा उपलब्ध भौतिक पुर्वाधारका आधारमा विद्यालय सञ्चालनका निम्न विकल्पहरू अपनाउने ।

• सबै कक्षा र विद्यार्थीलाई एकै समयमा कक्षा सञ्चालन गर्ने ।
• अलग अलग समय (सिफ्ट) मा अलग अलग कक्षा वा तह सञ्चालन गर्ने ।
• विद्यालय खुल्ने तथा कक्षा सञ्चालनको अवधि/ घन्टी छोट्याउने ।
• अवस्था हेरी तल्ला कक्षालाई पहिले वा माथिल्लो कक्षाका विद्यार्थीलाई पहिले (जोखिम र सहजतालाई हेरी) कक्षा सुरु गर्ने ।
• कुनै दिने केही कक्षा र कुनै दिन बाँकी अरु कक्षा सञ्चालन हुने गरी पालैपालो कक्षा सञ्चालन गर्ने ।
• कक्षाका केही विद्यार्थी कुनै दिन वा सिफ्ट र बाँकी विद्यार्थी अर्को दिन वा सिफ्टमा सञ्चालन हुने गरी पालैपालो कक्षा सञ्चालन गर्ने ।
• हप्तामा केही दिन, दिनमा केही घण्टा सञ्चालन गर्ने ।