Երիտասարդներն առաջնորդելու են կլիմայի փոփոխության դեմ պայքարի գործողություններն առաջիկա LCOY Հայաստանի ընթացքում
2025 թվականի սեպտեմբերի 6-7-ը Երևանում դեռահասներն ու երիտասարդները կհյուրընկալեն Հայաստանում անցկացվող երրորդ LCOY-ի մասնակիցներին:
- Հայերեն
- English
ԵՐԵՎԱՆ, ՀԱՅԱՍՏԱՆ, օգոստոսի 18, 2025 թ. Ավելի քան 100 դեռահասներ և երիտասարդներ ամբողջ Հայաստանից կհավաքվեն Երևանում՝ մասնակցելու Երիտասարդների տեղական համաժողովին (LCOY Հայաստան)։ Այն ակտիվ հարթակ է, որը երիտասարդներին հնարավորություն է տալիս մշակելու կլիմայի փոփոխությանն առնչվող խնդիրների լուծումներ և ազդեցություն ունենալու կլիմայական քաղաքականության մշակման վրա։ Միջոցառումը տեղի կունենա 2025 թվականի սեպտեմբերի 6-7-ը Հայաստանի ամերիկյան համալսարանում։
Նարեկ Օհանյանի և Անի Փալթաջյանի նախաձեռնությամբ կազմակերպված LCOY Հայաստանը YOUNGO-ի՝ «Կլիմայի փոփոխության մասին» շրջանակային կոնվենցիայի (UNFCCC/ԿՓՇԿ) պաշտոնական երիտասարդական ցանցի մաս է: Համաժողովն անցկացվում է ՅՈՒՆԻՍԵՖ-ի և ՀԱՀ Յակոբեան բնապահպանական կենտրոնի աջակցությամբ և նպատակ ունի համախմբելու դեռահասներին և երիտասարդներին Հայաստանի բոլոր մարզերից, այդ թվում՝ Կլիմայի փոփոխության հարցերով երիտասարդական խորհրդի (ՀՀ շրջակա միջավայրի նախարարության և ՅՈՒՆԻՍԵՖ-ի կողմից ստեղծված) անդամներին, ինչպես նաև կլիմայական քաղաքականության ոլորտի առաջնորդներին, ՀՀ շրջակա միջավայրի նախարարության, ՄԱԿ-ի հայաստանյան գրասենյակի և քաղաքացիական հասարակության կազմակերպությունների ներկայացուցիչներին։
«LCOY-ն ավելին է, քան պարզապես համաժողով. այն շարժում է։ Այստեղ երիտասարդները համախմբվում են՝ կյանքի կոչելու իրական փոփոխություններ։ Երիտասարդներից բաղկացած կազմակերպչական հանձնաժողովը մեծ ոգևորությամբ է սպասում համաժողովի օրերին հասակակիցների հետ համագործակցությանը՝ մշակելու և համատեղ ընդունելու Ազգային երիտասարդական հայտարարություն, որը կներկայացնի երեխաների և երիտասարդների համայնքներում կլիմայի փոփոխության և շրջակա միջավայրի վատթարացման հետևանքով առաջացած հիմնական խնդիրները»,— նշեցին Նարեկ Օհանյանն ու Անի Փալթաջյանը (LCOY Հայաստան 2025-ի արտոնագիր կրողներ և YOUNGO-ի անդամներ)։
Միջոցառման ծրագրում՝
- Ինտերակտիվ աշխատարաններ և պանելային/խմբային քննարկումներ
- Երիտասարդների կողմից ղեկավարվող կլիմայական միջոցառումներ
- Աշխատաժողովներ քաղաքականության փաստաթղթերի մշակման համար, որոնք կներառվեն COP30-ի (Բրազիլիա) Գլոբալ երիտասարդական հայտարարության մեջ
Մասնակցությունն անվճար և բաց է 16-24 երիտասարդների համար [ Հայցադիմումները հասանելի են այս հղմամբ:
Հետևե՛ք քննարկումներին սոցիալական ցանցերում՝ #LCOYArmenia #Youth4Climate #ClimateActionNow
Մամուլի հարցերով պատասխանատու
ՅՈՒՆԻՍԵՖ-ն աշխատում է, որպեսզի Հայաստանում յուրաքանչյուր երեխա լինի սիրված, սնված և խնամված: Հիմնվելով ավելի քան 75-ամյա միջազգային փորձի և Հայաստանի երեխաների համար 30 տարվա հաջողությունների վրա՝ ՅՈՒՆԻՍԵՖ-ը պարտավորություն է ստանձնում բարելավելու ամենախոցելի՝ աղքատության և մեկուսացման մեջ ապրող երեխաների կյանքը: Ծնվելու պահից մինչև ավագ դպրոցի ավարտը՝ ՅՈՒՆԻՍԵՖ-ն աշխատում է իր գործընկերների հետ, որպեսզի Հայաստանում յուրաքանչյուր երեխա և ընտանիք կարողանա օգտվել իր համար նախատեսված քաղաքականություններից և ծառայություններից:
Ստեղծման պահից ի վեր՝ ՅՈՒՆԻՍԵՖ-ն ամբողջությամբ ֆինանսավորվում է անհատների, մասնավոր հատվածի, հիմնադրամների և կառավարությունների կամավոր նվիրատվություններով:
Հայաստանում ՅՈՒՆԻՍԵՖ-ի գործունեությանը ավելի մանրամասն ծանոթանալու համար կարող եք այցելել www.unicef.am և www.babycef.am կայքերը կամ հետևել մեզ հետևյալ սոցիալական հարթակներում` Facebook, Twitter, Instagram և X-ում:
