Споделуваме и играме
Серија хибридни настани организирани од воспитувачките во градинки за да го доближат социјалното и емоционалното учење до родителите
Социјалните и емоционалните вештини се исто толку важни колку и когнитивните вештини и ја зголемуваат способноста на детето да учи, да работи со други, да обрнува внимание во занималната и да развива други вештини кои ја формираат основата за учење и социјалната интеракција во училишните години и подоцна во животот.
Воспитувачките во градинките секојдневно работат со децата за да ги развијат овие вештини, но градинките не се единствените места каде што може да се учат социјалните и емоционалните вештини. Родителите, бабите и дедовците и сите други што се вклучени во грижата за децата можат да го стимулираат нивниот социјален и емоционален развој преку секојдневна интеракција.
За да го доближат социјалното и емоционалното учење до родителите, УНИЦЕФ и Министерството за труд и социјална политика, во партнерство со Македонскиот центар за граѓанско образование, иницираа серија од петнаесет хибридни настани „Споделуваме и играме“. Домаќини на настаните се воспитувачките од градинките, со физичко присуство на ограничен број родители и деца, а се пренесуваат во живо за пошироката публика.
На настаните, воспитувачките споделуваат практични совети и стратегии кои родителите можат да ги применат со своите деца, како и низа ресурси што родителите можат да ги користат дома, вклучувајќи материјали подготвени во партнерство со Светот на Биби и Think Equal (Велика Британија) достапни на платформата ЕДУИНО.
Програмата е финансиски поддржана од Британската амбасада Скопје, со која УНИЦЕФ и Министерството за труд и социјална политика заеднички работат на воведување сеопфатна програма за социјален и емоционален развој во предучилишна возраст. Програмата се однесува не само на благосостојбата и развојот на децата во градинките, туку и на нивните воспитувачки.