Совладување социјални и емоционални вештини во предучилишна возраст

Социјалниот и емотивниот развој почнува рано во животот. Тогаш децата почнуваат да разбираат кои се, што чувствуваат и што да очекуваат кога се во меѓусебна интеракција. Тогаш учат како да воспостават и одржат позитивни односи; да доживуваат емоции, да се носат со нив и да ги изразуваат.

Сѐ повеќе научни истражувања потврдуваат дека децата кои во раните години воспоставиле силна емоционална основа подобро се носат со секојдневните социјални интеракции подоцна во животот. Ова е од суштинска важност за развојот на општата архитектура на мозокот и има сериозно влијание врз  способноста за учење кај децата.

Затоа УНИЦЕФ и владата на Обединетото Кралство, заедно со Министерството за труд и социјална политика, поддржуваат програма за воведување на активности за развој на социјалните и емотивните вештини во предучилишна возраст. Во првите градинки во земјата што ја спроведоа програмата како пилот, се виде дека преку игра, вежби и раскажување, децата од предучилишна возраст можат подобро да ги изразат чувствата, повеќе се слагаат, покажуваат емпатија за другите во групата, повеќе се грижат за животната средина и се посреќни. Програмата, која на почеток беше спроведена како пилот во неколку градинки, со поддршка од воспитувачките за колегијална поддршка, сега се воведува во целата земја.

Да погледнеме како воспитувачките за колегијална поддршка од градинките „Мајски цвет“ во Битола, „Младост“ во Тетово, „Павлина Велјановска“ во Кочани, „Димче Мирчев“ во Велес, „8 Март“ и „Кочо Рацин“ во Скопје ги применуваат стратегиите и алатките за да им помогнат на децата да ги усвојат социјалните и емоционалните вештини што се темел за формално учење и социјална интеракција на училиште и понатаму во животот. Видеата го покажуваат пристапот што се користеше пред да се воведат мерките за спречување и заштита од КОВИД-19, а програмата и понатаму се прилагодува на специјалните услови и упатства за пандемијата.