КОВИД-19: Эрүүл амьдралын хэв маяг болон бүрэн вакцинжуулалтын ач тус
Идэвхтэй дасгал хөдөлгөөн болон вакцинжуулалтын ач холбогдол
- Боломжтой:
- English
- Mongolian
Галцог нь Монгол Улсын баруун хязгаар дахь Завхан аймагт эхнэр Оюунцэцэгийн хамт амьдардаг эрч хүчтэй, эрүүл саруул нэгэн. Тэрээр Завхан аймгийн уугуул бөгөөд аймгийн Онцгой байдлын газарт 33 гаруй жил ажиллаж, тэтгэвэртээ гарсан.
Галцогийн гэр бүл тэтгэвэрт гарснаасаа хойш эрүүл амьдралын хэв маягийг хэвшүүлж, өглөө бүр гүйж, ихэнх цагаа биеийн тамирын зааланд өнгөрүүлдэг болсон байна. Тэд гар бөмбөг, сагсан бөмбөг, ширээний теннис, шатар зэрэг олон төрлийн спортоор хичээллэдэг ба жил бүр ахмадын баяраар зохион байгуулдаг гар бөмбөгийн тэмцээнээс мөнгөн медаль авсан байна. Тэдний дуртай спорт нь агаарын теннис гэнэ.
Галцог, Оюунцэцэг нар КОВИД-19-ийн халдвар аваагүй ба энэ нь тэдний амьдралын эрүүл хэв маяг, вакциныг бүрэн тунгаар хийлгэсэнтэй холбоотой гэж тэд хэлэв.
Завхан аймагт 2021 оны 3-р сараас КОВИД-19-ийн вакцин хийж эхэлснээс хойш тэд нийт дөрвөн тунг хийлгэсэн байна. Галцогийн гэр бүлийнхэн Монгол Улсын Засгийн газраас цар тахлын эсрэг хэрэгжүүлж байгаа арга хэмжээнд сэтгэл хангалуун байгаагаа, мөн Монгол Улсад ард иргэдээ хамгаалж, дархлаажуулах боломжийг олгосон КОВИД-19-ийн вакциныг нийлүүлсэн НҮБ-ын Хүүхдийн Санд талархаж байгаагаа хэлж байв.
Хөл хориог цуцалсны дараа Галцог, Оюунцэцэг нар дасгал хөдөлгөөнөө үргэлжлүүлж, найз нөхдөө биеийн тамирын заал руу явахыг уриалж, тогтмол дасгал сургууль зохион байгуулж эхэлсэн байна. Одоо өглөө бүр гүйлтийн дасгал хийхээс гадна долоо хоног бүр хамтдаа дасгал хийж, спортоор хичээллэдэг зургаан гэр бүл бий гэнэ.
Вакцин хийлгэсэн эерэг туршлагаа найз нөхөд, гэр бүлийнхэнтэйгээ байнга хуваалцдаг тухайгаа Галцог дурдав. Тэдний хэлсэнд итгэх, итгэхгүй хүмүүс байгаа ч “Хүмүүсийн мэдээллийн эх сурвалж зөвхөн нийгмийн сүлжээгээр хязгаарлагдахгүй байгаасай” гэж бодож байгаагаа нэмж дурдав. Харин Оюунцэцэг “КОВИД-19-ийн вакцины талаар маш их ташаа мэдээлэл байгаа учраас вакцин хийлгэх эсэхээ шийдэхдээ мэдээллийн үнэн бодит байдлыг шалгаж шийдвэрээ гаргах нь чухал” гэж хэлж байлаа.
"Биндэргарав" өрхийн эрүүл мэндийн төвийн вакцинжуулалт хариуцсан эмч Д.Гүнсмаа хүмүүс КОВИД-19-ийн вакцины нэг болон хоёр дахь тунг хийлгэхдээ их идэвхтэй байсан ч нэмэлт тунг төдийлөн идэвхтэй хийлгээгүй гэв. Вакцин хийлгэхээр ирсэн хүмүүс вакцины болзошгүй гаж нөлөөний талаар янз бүрийн асуултуудыг асууж байснаас харахад вакцинжуулалтын эрч суларсан нь зарим талаараа вакцины талаарх ташаа мэдээлэл гарсны үр дагавар гэж Д.Гүнсмаа эмч үзэж байна.
Ташаа мэдээлэл түгээмэл үед шинжлэх ухааны үндэслэлтэй, цаг үеийн мэдээ, мэдээллийг олон нийтэд хүргэх нь томоохон сорилт болж байна. Тиймээс НҮБ-ын Хүүхдийн Сан КОВИД-19-ийн вакцины талаар худал, ташаа мэдээллийг илрүүлж, үнэн зөв, нотлох баримтыг нийтэд түгээж хүргэдэг мэргэжлийн баримт шалгагч, эрэн сурвалжлах сэтгүүлч, эрүүл мэндийн мэргэжилтнүүдээс бүрдсэн Монголын Эрэн сурвалжлах сурвалжлагчдын төлөө төвтэй хамтран ажиллаж байна.
Оюунцэцэг нэг өдөр агаарын теннис тоглоод буцаж явахдаа эрүүл мэндийн даатгалын сангаас хөнгөлөлттэй үнээр олгодог эм авахаар дугаарлан зогсож байсан хүмүүсийг харсан тухайгаа дурсав. Тэр ийм хөнгөлөлт байдгийг мэддэггүй байснаа хэлэв. Тэр “Нөхөр бид хоёр өдий насандаа эм авахаар дугаарлан зогсохын оронд КОВИД-19-ийн вакцины бүрэн тунгаа хийлгээд, гадаа спортоор хичээллэж, дасгал хийх боломжтой байгаад би талархаж байна. Энэ бол бидний хамгийн том амжилт" гэж инээмсэглэн хэлж байлаа.
