ຜົນກະທົບຂອງມົນລະພິດທາງອາກາດຕໍ່ເດັກນ້ອຍ

ເປັນຫຍັງເດັກນ້ອຍຈຶ່ງມີຄວາມສ່ຽງຫຼາຍກວ່າ? 

ໃນຂະນະທີ່ເດັກນ້ອຍກໍາລັງເຕີບໃຫຍ່, ການພັດທະນາຂອງປອດແລະ ສະໝອງພວກເຂົາເຮັດໃຫ້ພວກເຂົາມີຄວາມສ່ຽງ ໂດຍສະເພາະຕໍ່ມົນລະພິດທາງອາກາດ. 

ລະບົບພູມຕ້ານທານຂອງພວກເຂົາອ່ອນແອກວ່າຜູ້ໃຫຍ່, ເຮັດໃຫ້ພວກເຂົາມີຄວາມສ່ຽງຕໍ່ໄວຣັສ, ເຊື້ອແບັກທີເຣັຍ ແລະ ການຕິດເຊື້ອອື່ນໆ. ມົນລະພິດທາງອາກາດຍິ່ງເພີ່ມຄວາມສ່ຽງຕໍ່ການຕິດເຊື້ອຕໍ່ທາງເດີນຫາຍໃຈ ແລະ ຫຼຸດຜ່ອນຄວາມສາມາດ ໃນການຕໍ່ສູ້ກັບອາກາດເປັນພິດ. 

ເດັກນ້ອຍຫາຍໃຈໄວກວ່າຜູ້ໃຫຍ່ ແລະ ຮັບເອົາອາກາດທີ່ສົມທຽບກັບນ້ຳໜັກຕົວຂອງພວກເຂົາ, ການສູດດົມຜ່ານທາງປາກ ເຊິ່ງເຮັດໃຫ້ໄດ້ຮັບມົນລະພິດຫຼາຍກວ່າຫາຍໃຈທາງດັງ. ພວກເຂົາຍັງຢູ່ໃກ້ກັບພື້ນດິນ ເຊິ່ງມົນລະພິດບາງຊະນິດມີຄວາມເຂັ້ມຂຸ້ນສູງ. 

ມົນລະພິດທາງອາກາດມີຜົນກະທົບແນວໃດຕໍ່ເດັກນ້ອຍ? 

ມົນ​ລະ​ພິດ​ທາງ​ອາ​ກາດ​ມີ​ຜົນ​ກະ​ທົບ​ໃນທັນ​ທີ​ທັນ​ໃດ ​ແລະ​ ໃນ​ໄລ​ຍະ​ຍາວຕໍ່​ສຸ​ຂະ​ພາບ​ຂອງ​ເດັກ​ນ້ອຍ​ທີ່​ສາ​ມາດ​ກັບຄືນມາໄດ້. 

ມົນ​ລະ​ພິດ​ທາງ​ອາ​ກາດ​ ແມ່ນ​ຕິດ​ພັນ​ກັບ​ສະ​ພາບ​ທາງ​ເດີນ​ຫາຍ​ໃຈ​ເຊັ່ນ​: ປອດ​ອັກ​ເສບ​, ຫຼອດ​ປອດ​ອັກ​ເສບ​ ແລະ ຫອບ​ຫືດ​. ມົນລະພິດທາງອາກາດສາມາດເຮັດໃຫ້ສຸຂະພາບທີ່ອ່ອນແອຮ້າຍແຮງຂຶ້ນ ແລະ ເປັນອັນຕະລາຍຕໍ່ພັດທະນາການທາງຮ່າງກາຍ ແລະສະຕິປັນຍາຂອງເດັກນ້ອຍ. ດັ່ງນັ້ນ, ຊີວິດຂອງເດັກນ້ອຍຈຶ່ງໄດ້ຮັບຜົນກະທົບ. ຕົວຢ່າງ, ເມື່ອເດັກນ້ອຍເຈັບປ່ວຍ, ເຂົາເຈົ້າອາດຂາດໂຮງຮຽນ, ຈຳກັດຄວາມສາມາດໃນການຮຽນ ແລະ ການພັດທະນາຂອງເຂົາເຈົ້າຕື່ມອີກ. 

ຜົນກະທົບຂອງມົນລະພິດທາງອາກາດສາມາດຢູ່ຕະຫຼອດຊີວິດ. ຜູ້ໃຫຍ່ທີ່ສໍາຜັດກັບມົນລະພິດທາງອາກາດ ຄືກັນກັບເດັກນ້ອຍມີແນວໂນ້ມທີ່ຈະມີບັນຫາຕໍ່ລະບົບທາງເດີນຫາຍໃຈ. 

ໃນ​ລະ​ຫວ່າງ​ການ​ຖື​ພາ​: ຮ່າງ​ກາຍ​ຂອງ​ແມ່​ຍິງ​ສາ​ມາດ​ເກັບ​ຮັກ​ສາ​ສານ​ເຄ​ມີ​ທີ່​ເປັນ​ອັນ​ຕະ​ລາຍ​ຈາກ​ອາ​ກາດ​, ສົ່ງຜົນ​ໃຫ້​ລູກ​ນ້ອຍ ໃນ​ໄລຍະການ​ຖື​ພາ ​ແລະ​ ໄລຍະໃຫ້​ນົມ​ລູກ​. ມົນລະພິດທາງອາກາດສາມາດສົ່ງຜົນກະທົບຕໍ່ສຸຂະພາບຂອງແອນ້ອຍໄດ້ ແລະ ​ສາ​ມາດ​ສົ່ງ​ຜົນ​ກະ​ທົບ​ຕໍ່ການ​ຖື​ພາເຊັ່ນ​: ການ​ຫຼຸ​ລູກ​, ການ​ເກີດກ່ອນກຳນົດ ແລະ ​ນ້ຳໜັກຕໍ່າ ແລະ​ ສາ​ມາດ​ສົ່ງ​ຜົນກະທົບຕໍ່ການພັດທະນາສະໝອງຂອງເດັກນ້ອຍ. 

ມົນ​ລະ​ພິດ​ທາງ​ອາ​ກາດ​ກວມ​ເອົາ 26% ຂອງ​ການ​ເສຍ​ຊີ​ວິດຂອງ​ເດັກ​ເກີດ​ໃໝ່​ໃນ​ທົ່ວ​ໂລກ​ສ່ວນ​ໃຫຍ່​ແມ່ນ​ກ່ຽວ​ຂ້ອງ​ກັບ​ອາ​ການ​ແຊກ​ຊ້ອນ​ຂອງ​ນ​ໍ້າໜັກການເກິດຕ່ຳ ​ແລະ​ ການເກີດ​ກ່ອນ​ກໍາ​ນົດ​. 

 ອາການທີ່ຄວນລະວັງເຊິ່ງອາດຈະມີທີ່ມາຈາກມົນລະພິດທາງອາກາດ? 

ລຸ່ມນີ້ແມ່ນອາການທີ່ເກີດຈາກການສໍາຜັດກັບມົນລະພິດທາງອາກາດ. ໃຫ້ທ່ານປຶກສາກັບແພດໝໍ ຖ້າຫາກສະມາຊິກໃນຄອບຄົວຂອງທ່ານປະສົບກັບອາການເຫຼົ່ານີ້. 

• ມີອາການຕາແຫ້ງ/ລະຄາຍເຄືອງ, ເຈັບຫົວ, ເມື່ອຍລ້າ, ພູມແພ້ ຫຼື ຫາຍໃຈບໍ່ສະດວກ. ຖ້າເກີດຂຶ້ນກັບເດັກນ້ອຍ ໃຫ້ລະມັດລະວັງການອອກແຮງໃນຂະນະຫາຍໃຈ.   
• ຜູ້ທີ່ເປັນພະຍາດຫອບຫືດອາດຈະມີອາການຮ້າຍແຮງຂຶ້ນ, ຫາຍໃຈບໍ່ສະດວກ, ເຈັບໜ້າເອິກ, ໄອ ຫຼື ຫາຍໃຈຝືດ. 

ວິທີການປົກປ້ອງເດັກນ້ອຍຈາກມົນລະພິດທາງອາກາດ

ມົນ​ລະ​ພິດ​ທາງ​ອາ​ກາດ​ເປັນ​ບັນ​ຫາ​ທີ່ເກີດຂຶ້ນໃນທົ່ວ​ໂລກ ​ແລະ ພວມ​ຮຽກ​ຮ້ອງ​ໃຫ້​ມີ​ການ​ປະ​ຕິ​ບັດ ​ບໍ່​​ແຕ່​​ພຽງຄອບ​ຄົວ​ ແລະ​ ບຸກ​ຄົນໃດໜຶ່ງ​, ແຕ່​ແມ່ນຊຸມ​ຊົນ​ ແລະ​ ລັດ​ຖະ​ບານ​. ຢ່າງໃດກໍຕາມ, ມີຫຼາຍສິ່ງທີ່ພວກເຮົາສາມາດເຮັດໄດ້ ເພື່ອຫຼຸດຜ່ອນການສໍາຜັດກັບມົນລະພິດທາງອາກາດ ແລະ ຫຼຸດຜ່ອນຜົນກະທົບຕໍ່ເດັກນ້ອຍ. ທ່ານສາມາດນຳໃຊ້ຂັ້ນຕອນລຸ່ມນີ້ເພື່ອປະຕິບັດກັບຄອບຄົວຂອງທ່ານ: 

ປົກປ້ອງເດັກນ້ອຍຈາກມົນລະພິດທາງອາກາດພາຍນອກ 

• ຕິດຕາມຂໍ້ມູນຂ່າວສານຄຸນນະພາບອາກາດທີ່ທ່ານອາໄສຢູ່ໃນແຕ່ລະມື້ ແລະ ພະຍາຍາມປັບປ່ຽນພຶດຕິກຳ ແລະ ສຳຜັດກັບອາກາດຢ່າງເໝາະສົມ. 
• ພະຍາຍາມຫຼຸດຜ່ອນການໃຊ້ເວລາໃນພື້ນທີ່ທີ່ມີມົນລະພິດສູງເຊັ່ນ: ຢູ່ໃກ້ບໍລິເວນທີ່ມີການຈະລາຈອນຕິດຂັດຮ້າຍແຮງ ຫຼື ແຫຼ່ງຂອງມົນລະພິດອຸດສາຫະກໍາ. ການເດີນທາງໃນຊ່ວງເວລາທີ່ມົນລະພິດທາງອາກາດຫຼຸດລົງສາມາດຊ່ວຍຫຼຸດຜ່ອນການສໍາຜັດກັບມົນລະພິດທາງອາກາດໄດ້. 
• ໃນເວລາທີ່ມົນລະພິດທາງອາກາດເປັນພິດ ໃຫ້ເດັກນ້ອຍຫຼີກລ້ຽງກິດຈະກໍາທີ່ຕ້ອງອອກແຮງງານທາງນອກ. ການຫຼິ້ນ ຫຼື ການອອກກຳລັງກາຍຫຼຸດລົງ, ໂດຍສະເພາະ ຖ້າເດັກນ້ອຍມີບັນຫາທາງສຸຂະພາບມາກ່ອນ ເຊັ່ນ: ພະຍາດຫອບຫືດ ຫຼື ການຕິດເຊື້ອລະບົບທາງເດີນຫາຍໃຈອື່ນໆ. 
•  ⁠ເມື່ອມົນລະພິດທາງອາກາດພາຍນອກມີຄວາມຮຸນແຮງເຊັ່ນ: ໃນຊ່ວງທີ່ເກີດໄຟໄໝ້ປ່າຄວນໃຫ້ເດັກນ້ອຍຢູ່ໃນບ້ານ. 

ປົກປ້ອງເດັກນ້ອຍຈາກມົນລະພິດທາງອາກາດໃນຮົ່ມ 

• ໃຊ້ນໍ້າມັນເຊື້ອໄຟທີ່ສະອາດກວ່າ ແລະເຕັກໂນໂລຊີເພື່ອປຸງແຕ່ງຄວາມຮ້ອນ ແລະ ໃຫ້ມີແສງເຂົ້າໃນເຮືອນຂອງທ່ານ. ຖ້າເປັນໄປໄດ້, ເລືອກໄຟຟ້າ, ອາຍແກັສທໍາມະຊາດ, ອາຍແກັສນໍ້າມັນແຫຼວ, ອາຍແກັສຊີວະພາບ ຫຼື ເຕົາແສງຕາເວັນ ຫຼື ເຕົາອົບ. 
• ໃຫ້ແນ່ໃຈວ່າພື້ນທີ່ແຕ່ງກິນມີບ່ອນລະບາຍອາກາດໄດ້ດີ ໂດຍການເປີດປ່ອງຢ້ຽມ ແລະ ໃຊ້ພັດລົມລະບາຍອາກາດ ເພື່ອໃຫ້ຄວາມຮ້ອນ ແລະ ອາຍພິດອອກໄປ. ຖ້າຍາກທີ່ຈະລະບາຍອາກາດໃນເຮືອນຄົວ, ໃຫ້ລອງພິຈາລະນາແຕ່ງກິນຢູ່ຂ້າງນອກ ຖ້າເປັນໄປໄດ້.
• ຮັກສາເຕົາ, ແລະ ເຄື່ອງໄຟຟ້າອື່ນໆ ເພື່ອໃຫ້ເຜົາເຊື້ອໄຟໄດ້ຢ່າງທີປະສິດທິພາບ
• ແມ່ຍິງຖືພາ ແລະ ເດັກນ້ອຍໃຫ້ຢູ່ຫ່າງຈາກຄວັນໄຟ 
• ບໍ່ຄວນສູບຢາໃນຮົ່ມ ຫຼື ໃກ້ເດັກນ້ອຍ ຫຼື ແມ່ຍິງຖືພາ ເພື່ອໃຫ້ແນ່ໃຈວ່າພວກເຂົາບໍ່ໄດ້ຮັບຜົນກະທົບຈາກຄວັນສູບຢາ
• ລະວັງແຫຼ່ງທີ່ມາຂອງສິ່ງປົນເປື້ອນພາຍໃນເຮືອນ, ລວມທັງໃນອາຄານ ແລະ ຜະລິດຕະພັນສີ, ເຄື່ອງໃຊ້ອະນາໄມ ແລະ ສານເຄມີໃນຄົວເຮືອນ. ຫ້າມ​ຈູດ​ທູບ​ທຽນ ຫຼື​ ໃຊ້​ເຄື່ອງ​ປັບ​ອາກາດ​ທີ່​ກໍ່ສານພິດ​ໃນ​ອາກາດ.
• ຖ້າເປັນໄປໄດ້, ໃຫ້ຕິດຕັ້ງເຄື່ອງຟອກອາກາດທີ່ມີເຄື່ອງກອງອາກາດທີ່ມີປະສິດຕິພາບສູງ (HEPA) ຕໍ່ກັບການຕ້ານມົນລະພິດທາງອາກາດພາຍໃນເຮືອນ.
• ການຮັບປະທານອາຫານ ແລະ ການດຳລົງຊີວິດທີ່ດີຕໍ່ສຸຂະພາບສາມາດຊ່ວຍຫຼຸດຜ່ອນຜົນກະທົບໂດຍລວມຂອງມົນລະພິດທາງອາກາດຕໍ່ເດັກນ້ອຍ. ເດັກນ້ອຍທີ່ມີສຸຂະພາບດີ ແມ່ນມີຄວາມສ່ຽງຕໍ່ອາການແຊກຊ້ອນດ້ານສຸຂະພາບອັນເນື່ອງມາຈາກມົນລະພິດທາງອາກາດຍິ່ງໜ້ອຍເທົ່ານັ້ນ ເຊິ່ງປະກອບມີການລ້ຽງລູກດ້ວຍນ້ຳນົມແມ່ສໍາລັບ 6 ເດືອນທໍາອິດ, ໃຫ້ແນ່ໃຈວ່າເດັກນ້ອຍໄດ້ຮັບການສັກຢາປ້ອງກັນພະຍາດ, ອາຫານທີ່ດີຕໍ່ສຸຂະພາບແລະ ໃຫ້ເດັກນ້ອຍໄດ້ຫຼິ້ນ ແລະ ອອກກໍາລັງກາຍເປັນປະຈຳ. 

ຈື່ໄວ້ວ່າ: ເດັກນ້ອຍຈະມີຄວາມກະຕືລືລົ້ນໃນສະພາບແວດລ້ອມ ແລະ ການຕໍ່ສູ້ກັບການປ່ຽນແປງຂອງດິນຟ້າອາກາດ ເປັນສິ່ງທີ່ສຳຄັນຫຼາຍສຳລັບຫຼາຍໆຄົນ. ເດັກນ້ອຍຄວນຮູ້ກ່ຽວກັບຄວາມສ່ຽງຂອງມົນລະພິດທາງອາກາດທີ່ສາມາດສົ່ງຜົນກະທົບຕໍ່ສຸຂະພາບ ແລະ ສິ່ງແວດລ້ອມຂອງເຂົາເຈົ້າ. ພວກເຂົາຄວນຈະຮູ້ວ່າ ອາກາດຂອງພວກເຂົາເປັນພິດ, ສິ່ງທີ່ສາມາດເຮັດໄດ້ ແລະ ວິທີການປົກປ້ອງຕົນເອງຈາກມົນລະພິດ ເຊິ່ງທ່ານສາມາດໃຊ້ຂໍ້ມູນ ຊັບພະຍາກອນທີ່ເປັນມິດກັບເດັກນ້ອຍ ກ່ຽວກັບມົນລະພິດທາງອາກາດ ທີ່ທ່ານສາມາດຄົ້ນຄວ້າຮ່ວມກັນກັບລູກຫຼານໄດ້.