ՅՈՒՆԻՍԵՖ-ն ուժեղացնում է երեխաների համար հարմար համայնքային անկյունները
Հայաստանի հինգ մարզերում բարելավում ենք երեխաների խնամքի և պաշտպանության համար ստեղծված կենտրոնները։
- Հասանելի է նաև:
- Հայերեն
- English
Նոյեմբերի 11-ին Հայաստանում ՅՈՒՆԻՍԵՖ-ի նորանշանակ ներկայացուցիչ Քրիսթինե Վայգանդը և ՀՀ ԱՍՀ նախարարի տեղակալ Տաթևիկ Ստեփանյանը շրջայց կատարեցին Երևանի Ուլնեցի 64 հասցեում գործող ՀՕՖ-ի «Երեխաների աջակցության կենտրոն» հիմնադրամում:
Այս կենտրոնն այն հինգ համայնքային ապահով անկյուններից մեկն է, որտեղ ՅՈՒՆԻՍԵՖ-ի շնորհիվ բարելավվել են պայմանները և ծառայությունները՝ ապահովելու, որ վերջին ռազմական սրացման հետևանքով Լեռնային Ղարաբաղի և ընդունող համայնքների երեխաները ունենան խաղալու, սովորելու և զարգանալու հավասար հնարավորություններ։
«ՅՈՒՆԻՍԵՖ-ը համարում է, որ ամեն մի համայնքում երեխաների և ընտանիքների համար պետք է բազամազան ծառայություններ լինեն։ Երբ Լեռնային Ղարաբաղի հակամարտության սրացման պատճառով Երևանում և այլ համայնքներում երեխաների թիվը կտրուկ աճեց, մենք մեր դոնորների աջակցության շնորհիվ հանձն առանք հզորացնելու և բարելավելու առկա համայնքային կենտրոնների հասանելիությունն ու ծառայությունների որակը»,- նշեց տիկին Վայգանդը։ «Ճապոնիայի կառավարության ֆինանսական աջակցության շնորհիվ այժմ մենք Աբովյանում, Էջմիածնում, Արմավիրում և Մրգաշենում ստեղծում ենք երեխայակենտրոն տարածքներ։ Այսպիսի կենտրոնները նպաստում են, որ համայնքները համախմբվեն երեխաների՝ հատկապես խոցելի երեխաների պաշտպանության և բարեկեցության շուրջ՝ ստեղծելով նրանց համար խաղալու, հմտություններ զարգացնելու և սոցիալական աջակցություն ստանալու հնարավորություններ»։
Վերջին հինգ ամիսների ընթացքում, ՅՈՒՆԻՍԵՖ-ը համագործակցել է ՀՕՖ-ի «Երեխաների աջակցության կենտրոնի» հետ՝ վերանորոգելու ու բարելավելու առկա պայմանները, որպեսզի ավելի շատ երեխաներ կարողանան գալ կենտրոն ու ստանան անհրաժեշտ ծառայությունները։ Չնայած կենտրոնն աշխատում էր 2001թ-ից սկսած՝ այն վերջին տարիներին չէր վերանորոգվել: Այժմ ՅՈՒՆԻՍԵՖ-ի աջակցությամբ Կենտրոնն ունի անվտանգ խաղերի և թերապիայի հնարավորություն տարբեր տարիքի երեխաների համար, ինչպես նաև բարելավված պայմաններ լոգարանում, միջանցքում և լվացքատանը:
«Կենտրոն են այցելում ամենատարբեր իրավիճակներում հայտնված երեխաներ՝ 3-18 տարեկան: Եթե իրավիճակն այնպիսին է, որ ընտանիքում մի քանի երեխա են և բոլորը կենտրոնի շահառու՝ ընդունում են նաև ավելի փոքրերին»,- նշեց կենտրոնի գործադիր տնօրեն Միրա Անտոնյանը։․«Գալիս են բռնության ականատես կամ բռնությունից տուժած երեխաներ, սեռական բռնության ենթարկված, լքված, կրթությունից կամ այլ ծառայությունից դուրս մնացած երեխաներ: Այստեղ նրանց սպասում է փափուկ, ըմբռնող միջավայր։ Մենք նաև աշխատում ենք խնամակալների հետ, որպեսզի բարելավենք ընտանիքի պայմանները՝ շեշտը դնելով դրական ծնողավարման մեթոդների վրա»:
Արտակարգ իրավիճակների ժամանակ ՅՈՒՆԻՍԵՖ-ը լայնորեն կիրառում է երեխաների համար հարմար անվտանգ անկյուններ, համարելով դրանք տուժած համայնքներում երեխաների կարիքներին՝ հատկապես պաշտպանության, հոգեսոցիալական բարեկեցության և ոչ ֆորմալ կրթության հետ կապված կարիքներին արագ արձագանքելու կարևոր մեխանիզմ: Նրանք նաև կամուրջ են հանդիսանում խոցելի երեխաներին վաղ վերականգնման և երկարաժամկետ աջակցության համար: Ընդհանուր առմամբ, երեխաներին հարմար անկյունների նպատակն է աջակցել երեխաների և երիտասարդների դիմակայունությանը և բարեկեցությանը համայնքի կազմակերպված, կազմակերպված միջոցառումների միջոցով, որոնք անցկացվում են անվտանգ, երեխաների համար հարմար և խթանող միջավայրում:
«Ունենք բավականին մեծ օրենսդրական նախաձեռնություն․ վերանայում ենք Ընտանեկան օրենսգիրքը, որպեսզի ունենանք նոր ու թափանցիկ կարգավորումներ ու չափորոշիչներ սահմանենք համայնքային ծառայությունների համար։ Կառավարության քաղաքականությունը մնում է անփոփոխ առ այն, որ յուրաքանչյուր երեխայի համար լավագույն տարբերակն է ապրել ընտանիքում, ու մենք, որպես պետություն, որպես լիազոր մարմին, պետք է նպաստենք երեխայի հենց այդ իրավունքի իրացմանը՝ ապրել ընտանիքում կամ ընտանեկանին մոտ այլընտրանքային խնամք կազմակերպել երեխայի համար: Եվ այդ տեսլականը հնարավոր չի լինի ապահովել առանց այսպիսի կենտրոնների, որոնք նպաստում են խոցելի ընտանիքների դիմակայունության և բարեկեցության բարելավմանը»,- նշեց Աշխատանքի և սոցիալական հարցերի փոխնախարար Տաթևիկ Ստեփանյանը։
Հավելենք, որ դեկտեմբերին ՅՈՒՆԻՍԵՖ-ը և Հայ օգնության ֆոնդի «Երեխաների աջակցության կենտրոն» հիմնադրամը ծրագրում են վերաբացել Աբովյանի երեխաների աջակցության կենտրոնը՝ Ճապոնիայի կառավարության և Աբովյանի քաղաքապետարանի ֆինանսական աջակցությամբ:
