Mësimdhënie me zemër
Historia e mësuese Rudinës nga trajnimi i Eduten
Për një nga mësueset që mori pjesë në trajnimin e fundit për Eduten në Shqipëri, mësimdhënia nuk ka qenë kurrë thjesht një profesion. Ka qenë thirrja e jetës.
“Kam 30 vjet që punoj si mësuese,” thotë ajo me një buzëqeshje të ngrohtë e sy plot shkëlqim. “Për mua është gjithmonë kënaqësi të punoj me fëmijët.”
Rruga e saj drejt arsimit ishte një zgjedhje e vetëdijshme. Në kohën kur ajo aplikoi në universitet, mësuesit e ardhshëm duhej të konkurronin për vende të kufizuara dhe të kalonin provime të vështira pranimi. Ajo ia doli dhe nisi një karrierë që do të formësonte tre dekadat e ardhshme të jetës së saj.
Mësimdhënia, shpjegon ajo, është një pasion i përbashkët në familjen e saj. Si ajo ashtu edhe bashkëshorti i saj janë mësues, dhe bisedat për mësimet, nxënësit dhe zgjidhjen e problemeve janë pjesë e përditshme e jetës së tyre në shtëpi.
Kur mësoi se do të merrte pjesë në trajnimin për platformën Eduten, ajo u ndje e emocionuar për mundësinë për të sjellë diçka të re në klasën e saj.
Zhvilluar nga Universitety i Turku, Eduten është një platformë digjitale me qasje bazuar në elemente të lojës për lëndën e matematikës, e krijuar për ta bërë të nxënit më ndërveprues, ndërkohë që ndihmon mësuesit të ndjekin progresin e nxënësve dhe të përshtatin mësimin sipas nevojave të ndryshme.
Gjatë trajnimit dy ditor, mësuesit eksploruan platformën përmes ushtrimeve praktike dhe demonstrimeve. Për të, përvoja ishte njëkohësisht frymëzuese dhe shumë praktike.
“Një mësues i mirë ka aftësinë t’i bëjë gjërat e vështira të duken të lehta,” thotë ajo. “Ekspertët na e shpjeguan platformën në një mënyrë kaq të thjeshtë, saqë tani edhe ne mund ta bëjmë të njëjtën gjë me nxënësit tanë.”
Ajo beson se mjetet digjitale si Eduten mund të ndihmojnë në lidhjen më të mirë me brezin e sotëm të nxënësve, të cilët shpesh mësojnë më mirë përmes përvojave interaktive dhe lojës.
“Fëmijëve u pëlqen shumë të mësojnë duke luajtur,” shpjegon ajo. “Dhe ky brez po rritet me teknologjinë, kështu që platforma të tilla i ndihmojnë të mësojnë në një mënyrë që u duket natyrale dhe e këndshme.”
Edhe gjatë testimit të platformës në trajnim, mendja e saj ishte tashmë tek klasa e saj.
“Vazhdimisht mendoja se si do t’i zgjidhnin nxënësit e mi ushtrimet, cilat do t’u pëlqenin më shumë, cilat do t’i bënin më kuriozë,” thotë ajo.
Për të, ky kuriozitet i vazhdueshëm është pjesë e asaj që e bën mësimdhënien kaq të veçantë.
“Bukuria e këtij profesioni është se na bën të mendojmë si fëmijë përsëri. E mban gjallë fëmijën brenda nesh.”
Dhe për mësues si ajo, pikërisht kjo ndjenjë kureshtjeje dhe përkushtimi vazhdon të frymëzojë të mësuarit vit pas viti.
