5 problemet e zakonshme të gjidhënies
Cilët janë problemet dhe si të ballafaqoheni me to?
- Gjendet në:
- English
- Македонски
- Shqip
Mit është se gjidhënia është e lehtë. Gjidhënia kërkon kohë dhe praktikë, si për nënat ashtu edhe për foshnjat. Shumë nëna hasin në vështirësi gjatë gjidhënies, mirëpo mbështetja e duhur mund të ndihmojë në tejkalimin e këtyre vështirësive.
Nëse keni probleme me gjidhënien, kontaktoni për mbështetje maminë, specialistin e gjidhënies ose ofruesin e shërbimeve të kujdesit shëndetësor.
Këtu janë dhënë disa nga problemet më të zakonshme gjatë gjidhënies dhe ca këshilla tona, të cilat mund t’ua lehtësojnë gjendjen.
1. Si të sigurohem që fëmija im është pozicionuar mirë gjatë gjidhënies?
Për të qenë gjidhënia e këndshme për ju dhe për foshnjën tuaj, shumë me rëndësi është që foshnja të pozicionohet mirë gjatë gjidhënies. Për të qenë të sigurt që foshnja juaj është pozicionuar mirë:
- Vendoseni hundën e foshnjës drejtpërsëdrejti përballë thithkës suaj.
- Lëreni kokën e foshnjës të anojë pak mbrapa, në mënyrë që buza e sipërme të mund të ngjitet me thithkën tuaj. Në këtë mënyrë do t’i hapet goja foshnjës.
- Kur foshnja do të hapë mirë gojën, afrojeni shpejt në gji me kokën prapa dhe mjekrën përpara. Në këtë mënyrë, fëmija juaj mund ta kapë një hapësirë më të madhe të gjirit dhe jo vetëm thithkën.
- Foshnja do të thithë gjirin dhe thithka juaj do t’i vendoset në pjesën e butë të gojës. Në këtë mënyrë, thithka juaj nuk do të infektohet, ndërsa foshnja juaj do të thithë qumështin që i nevojitet.
Si do të dini se foshnja juaj është pozicionuar mirë?
- Përvoja është e rehatshme dhe pa dhimbje
- Areola (lëkura e errët rreth thithkës) është më shumë e dukshme mbi gojën sesa nën gojën e foshnjës
- Goja e foshnjës suaj është e hapur
- Buza e poshtme e saj është e kthyer nga jashtë
- Me mjekër e prekë – ose pothuajse është duke e prekur – gjirin tuaj
2. Çfarë të bëj nëse kam pak qumësht?
Ndenja se nuk lëshoni qumësht të mjaftueshëm për foshnjën tuaj, te ju mund të shkaktojë një ndjenjë frustrimi. Nëse ju shqetëson sasia e qumështit, drejtohuni mjekut tuaj. Në shumicën e rasteve, mjeku do t’u ndihmojnë të zbuloni se ç’është problemi.
Shkaqet më të zakonshme për pak qumësht janë:
- Vonesë e “ardhjes” së qumështit të gjirit
- Asnjë kontakt ose ka shumë pak kontakt lëkura e nënës me atë të foshnjës
- Vonesë në krijimin e qumështit për shkak të komplikimeve të lindjes, sëmundjes ose diabetit
- Pozicionimi i keq i foshnjës në gji
- Gjidhënia në kohë rreptësishtë të përcaktuara
- Intervale të shkurtra të “ardhjes” së qumështit
- Nuk ka gjidhënie gjatë natës
- Gjidhënie të rralla
- Shqetësimi dhe stresi
- Mungesa e vetëbesimit
- Mungesa e afërsisë (nënë - foshnje)
- Rezistenca ndaj gjidhënies
- Lodhja
Për të parandaluar këtë problem dhe për t’i siguruar sasi qumështi të shëndetshëm të gjirit për fëmijën tuaj:
- Vendosni kontakt ndërmjet lëkurës suaj dhe asaj së foshnjës, menjëherë pas lindjes dhe filloni me gjidhënie sa më shpejt të jetë e mundur.
- Pas lindjes, kërkoni mbështetje nga specialistët për gjidhënie për pozicionimin më të mirë të foshnjës në gji dhe gjidhënie më efikase.
- Praktikoni metodën “një dhomë” (akomodimi dhe gjumi në të njëjtën dhomë me foshnjën tuaj) 24 orë në ditë.
- Ushqeni foshnjën me ushqime shtesë nëse mjeku u rekomandon se është e patjetërsueshme për shëndetin e foshnjës.
3. Si të kujdesem për gjinjtë e ënjtura ?
Gjinjtë e mbushura mund të jenë, jashtëzakonisht, të dhimbshme. Edhe pse, ndenja e gjinjve të mbushura mund të jetë e parehatshme, ënjta është një problem krejt tjetër.
Gjinj të mbushura | Gjinj të ënjtura |
| Të ngrohta, të rënda dhe të forta | Keni dhimbje në gjinj, ato duken të ënjtura në mënyrë anormale, të mbushura me lëng (edomatoze) dhe të shtrënguara. Po ashtu, mund të shkëlqejnë dhe të jenë të skuqura |
| Rrjedh qumështi | Nuk rrjedh qumështi |
| Nuk keni temperaturë | Mund të keni temperaturë për 24 orë |
Shkaqet dhe mënyrat e zakonshme për ta parandaluar ënjtën e gjinjve përfshijnë:
Shkaqet e ënjtjes | Mënyrat për parandalimin e ënjtjes |
| Shumë qumësht | Rregullisht zbrazni gjinjtë (duke i shtrydhur me duar ose me pompë) dhe filloni herët me gjidhënien |
| Vonimi i “ardhjes” së qumështit | Filloni gjidhënien menjëherë pas lindjes |
| Foshnja pozicionohet keq në gji | Përkujdesuni që foshnja të pozicionohet mirë në gji |
| Rrallë zbrazen gjinjtë ose është e kufizuar koha e gjidhënies | Mundësoni foshnjës të thithë pa kufizime |
Nëse ndjeni se i keni gjinjtë e ënjtura, konsultohuni me mjekun tuaj.
4. Si mund ta parandaloj plasaritjen e thithkave gjatë gjidhënies?
Thithkat e lënduara ose të çara janë zakonisht shenjë se foshnja juaj nuk është i pozicionuar siç duhet në gji, kur ju i jepni gji foshnjës. Mësoni atë të pozicionohet mirë. Nëse njëra ose të dyja thithkat tuaja fillojnë të plasariten ose të rrjedhin gjak, kërkoni ndihmë nga mjeku juaj sa më shpejt të jetë e mundur. Kur jeni në shtëpi, provoni t’i lyeni thithkat me pak qumësht gjiri të shtrydhur, pasi do t’i jepni gji foshnjës. Qumështi i nënës ka veti shëruese, të cilat ndihmojnë në lehtësimin e dhimbjeve.
5. Çfarë e shkakton mastitin dhe bllokimin e kanaleve të qumështit? Si ta parandaloj atë?
Qumështi i gjirit rrjedh nëpër një sistem kanalesh në gjinjtë tuaj për të arritur tek fëmija juaj. Ndonjëherë, një pjesë e këtyre kanaleve mund të bllokohet, gjë që e ndalon rrjedhjen e lehtë të qumështit. Kanalet e bllokuara mund të jenë të dhimbshme. Mastiti, një inflamacion i gjirit, mund të ndodhë kur një kanal i bllokuar nuk pastrohet ose kur grumbullimi i qumështit në gjoksin tuaj shkakton ënjtje ose inflamacion. Nëse ndjeni dhimbje nga kanalet e bllokuara, bisedoni me specialistin për gjidhënie, maminë ose mjekun tuaj.
Disa shkaqe të bllokimit të kanaleve dhe mastitit përfshijnë:
- Gjidhënie të shkurtra ose jo të rregullta
- Zbrazja jo e duhur e qumështit nga një pjesë ose nga gjithë gjiri
- Indet e dëmtuara të gjirit
- Bakteret që hyjnë në gji përmes çarjeve të thithkave
Për të ndihmuar në lehtësimin e dhimbjes dhe trajtimin e simptomave tuaja, provoni:
- T’i zbrazni gjinjtë më mirë
- Ta përmirësoni pozicionimin e foshnjës në gji
- Të vishni rroba të gjera
- T’i jepni gji më shpesh
- Të bëni masazhe të lehtë në drejtim të thithkës
- Të vendosni një leckë të ngrohtë në zonën ku keni dhimbje
- Ta ndryshoni pozicionin e gjidhënies
Gjidhënia nuk është punë e vetme e një gruaje, andaj është shumë e zakonshme të përballeni me vështirësi gjatë këtij rrugëtimi. Për çdo problem kontaktoni mjekun tuaj dhe kërkoni mbështetje nga familja, miqtë dhe të dashurit. Ju priftë e mbara!