Негување на надежта кај децата во кризна состојба

По затворањето на балканската рута кон Европа во месец март, околу 500 деца останаа заробени во поранешна Југословенска Република Македонија, фатени во стапицата на неизвесноста на нивното минато и иднина. Тие споделуваат многу нешта со останатите 150,000 деца бегалци и мигранти кои поминаа низ земјата во периодот од јуни 2015 до март 2016. Сите тие имаат свои соништа, и сите се надеваат на подобра и побезбедна иднина.

По интензивирањето на бегалската и мигрантската криза, се зголеми процентот на деца помеѓу популацијата кое патуваше низ земјата — децата беа застапени со само 9 проценти во јуни 2015, а во текот на првата седмица од март 2016 нивниот број достигна дури 43 проценти. 

Најголемиот број на деца бегалци и мигранти бегаат од конфликтот и неизвесноста, а исцрпувачкото патување се надоврзува на траумите од хоророт кој тие го имаат посведочено дома. 

Заедно со нашите партнери, УНИЦЕФ прави сѐ што е во можност за да се зачува достоинството и отпорноста кај децата, и правата и потребите на децата да имаат централно место во нашиот одговор на оваа состојба.

Сите деца кои се тргнати на пат имаат доживеано загуби — некои од нив ја имаат искусено трагичната загуба на членови на семејството и пријатели, и сите ја имаат загубено стабилноста и безгрижниот живот кој го заслужуваат сите деца. 

УНИЦЕФ и партнерите разбираат дека за децата кои се соочуваат со непостојана и несигурна ситуација, клучната поддршка може да биде со тоа што на децата ќе им се овозможи да бидат токму тоа — деца.

Во текот на зимскиот период на Балканот, тешкото патување на доенчињата и децата беше дополнително влошено од лошите временски услови, несоодветната облека на ниските температури и дождот, снегот и силниот ветар.

Помагањето на децата да ги пребродат тешките искуства преку активности за развој на вештини и механизми за справување претставува клучна компонента на психосоцијалната поддршка која ја даваат УНИЦЕФ и партнерите. 

Секое дете кое патува во потрага по безбедност и подобар живот има потреба да биде заштитено и да ги ужива правата кои се гарантирани со Конвенцијата за правата на детето, вклучувајќи го и правото на релаксација и одмор. 

Давањето надеж значи и да им се овозможи оддишка на децата долж долгиот пат кон безбедност. 

Децата заслужуваат да ги зачуваат своите надежи и соништа дури и во најтешките моменти. 

Работата на УНИЦЕФ е значително поддржана од Одделот за хуманитарна помош и цивилна заштита на Европската комисија (ECHO), владите на Јапонија, Германија и Обединетото Кралство, националните комитети на УНИЦЕФ, поединци, корпоративни и приватни партнери.