Младите го креваат својот глас за неопходните еколошки промени

Несомнено е дека Северна Македонија се соочува со еден од најсериозните еколошки предизвици во изминатата деценија, а тоа е нивото на загаденост на воздухот. Низ годините, Скопје како главен град и бројни други градови во земјата ги достигнаа највисоките измерени точки на најзагадени градови во светот. Таквиот исход на годишно ниво го засега животот на илјадници граѓани и влијае врз мотивацијата и надежта кај младите дека ќе се случат систематски промени. Согледувањата на младите се последица на недостатокот на акција и инвестирање во создавањето и спроведувањето политики за животна средина на локално и национално ниво.

Меѓутоа, кога станува збор за носење одлуки и како младите се изјаснуваат по тоа прашање, врз основа на истражување спроведено од Младинскиот образовен форум во 2021 година, повеќе од една третина од младите во Северна Македонија се изјасниле дека не учествуваат во процесите на одлучување на национално ниво и на ниво на локална самоуправа.

Дополнително, неодамнешното истражување на УНИЦЕФ фрли светлина врз фактот дека околу 72 отсто од граѓаните на Северна Македонија изразуваат загриженост за тоа како климатските промени ќе влијаат на нивните животи, додека помладата популација се смета за најмотивираната да преземе дејствија.

Ова доведе до создавање на младинска програма за застапување во животната средина „Млади за воздух“ која имаше за цел да го стимулира младинското учество и да застапува квалитет на воздухот и истовремено да ги оснажи младите да преземаат дејствија за прашања поврзани со животната средина.

Во оваа смисла, 30 млади учесници од различни општини во земјата учествуваа во два модула за обука, од кои едниот им даде можност подлабоко да ги истражат корените и причините за загадувањето на воздухот, застапувањето и дигиталните технологии, а другиот, наречен „Медијатон“, им даде можност да работат со видеографи, графички дизајнери, професионални фотографи и новинари за креирање и концептуализација на дигитална содржина.

Медијатонот се одржа во Скопје и резултираше со огномет од произведена дигитална содржина што ги содржи пораките за застапување што младите треба да ги споделат, а се однесуваат на итната потреба за подобрување на квалитетот на воздухот.