UNICEF dhe BE festojnë Muajin e Prindërimit së bashku me prindërit, fëmijët dhe partnerët

Prezantohen dy programe të destinuara për prindërit e fëmijëve më të vegjël

UNICEF-i në Malin e Zi
Govornici
UNICEF Mali i Zi / Duško Miljanić / 2022
15 Qershor 2022

PODGORICË, 15 qershor 2022– Me rastin e muajit të prindërimit, në bashkëpunim me Delegacionin e Bashkimit Evropian në Mal të Zi, UNICEF-i organizoi një prezantim të programeve që mbështesin prindërit në kryerjen e roleve të tyre të rëndësishme jetësore.

“Familjet e kujdesshme” dhe aplikacioni Bebbo – dy programe të destinuara për prindërit e fëmijëve më të vegjël – u prezantuan në Shtëpinë e Evropës.

Programi “Familje të kujdesshme” zbatohet në Mal të Zi tash e katër vjet dhe në të kanë marrë pjesë më shumë se 700 prindër, duke i dhënë programit një notë mesatare prej 4.74 nga maksimumi 5. Rezultatet e vlerësimit të programit tregojnë se ai ka kontribuar në një reduktim prej 70% të prindërimit të ashpër dhe të dhunshëm dhe ulje të ndjeshme të problemeve të sjelljes tek fëmijët (31%) dhe depresionit prindëror (45%).

Gosti
UNICEF Mali i Zi / Duško Miljanić / 2022

Programi “Familje të kujdesshme”, i zbatuar me mbështetjen e UNICEF-it dhe BE-së në Mal të Zi, është zhvilluar dhe testuar paraprakisht në shumë vende falë bashkëpunimit midis OBSH-së, UNICEF-it, Universitetit të Kejp Taun (Cape Town) dhe Universitetit Stellenbosch në Afrikën e Jugut, si dhe Universitetin e Oksfordit dhe Universitetin Bangor në MB. Përveç Malit të Zi, ky program po zbatohet në Evropë edhe në Republikën Çeke, Maqedoninë e Veriut, Moldavi dhe Rumani. Programi iu prezantua prindërve nga autorja e tij, profesoresha e psikologjisë klinike Xhudi Haçings (Judy Hutchings), ndërsa Darija Petoviq Bambur, psikoterapiste dhe një nga udhëheqëset e grupit, foli për zbatimin e tij në Mal të Zi. Programi është i dedikuar për prindërit e fëmijëve të moshës 2 deri në 9 vjeç dhe po zbatohet në kopshte, OJQ dhe qendra të kujdesit shëndetësor parësor në të gjithë vendin.

Judy Hutchings
UNICEF Mali i Zi / Duško Miljanić / 2022
Xhudi Haçings (Judy Hutchings), autore e programit Familje të kujdesshme

Aplikacioni Bebbo u prezantua nga zyrtarja e UNICEF-it për Zhvillimin e Fëmijërisë së Hershme në Mal të Zi, Ida Ferdinandi, së cilës iu bashkua Maja Miranoviq, një nënë që e përdor aplikacionin për një kohë të gjatë. Aplikacioni u siguron prindërve të fëmijëve nën moshën gjashtë vjeç informacione të besueshme për tema të ndryshme, si shëndeti, ushqimi, ushqyerja me gji, siguria, mësimi i hershëm dhe prindërimi pozitiv. E gjithë përmbajtja e aplikacionit është zhvilluar në bashkëpunim me Institutin e Shëndetit Publik dhe mund të shkarkohet falas nga Google Play ose App Store.

Majka s bebom
UNICEF Mali i Zi / Duško Miljanić / 2022

“Të dashur prindër, ju ftojmë të përfitoni nga programet cilësore dhe të dëshmuara që kanë ndihmuar mijëra nëna dhe baballarë në Mal të Zi dhe rajon në vitet e para dhe shpesh më kritike të jetës së një fëmije dhe përvojës prindërore,” tha zyrtarja e UNICEF-it për ZHHF, Ida Ferdinandi.

Programi “Familje të kujdesshme” dhe aplikacioni Bebbo janë zbatuar në Mal të Zi me mbështetjen e UNICEF-it dhe mbështetjen financiare të Bashkimit Evropian.