Përfaqësuesi i UNICEF-it në Mal të Zi
UNICEF në Mal të Zi do të vazhdojë të mbështesë ndërtimin e një shoqërie që ofron të drejta dhe mundësi të barabarta për çdo fëmijë
- Crnogorski
- English
- Shqip
PODGORICË, 30 GUSHT, 2024. – Mikele Servadei, shtetas i Italisë, fillon sot mandatin e ri si shef i zyrës së përfaqësimit të UNICEF-it në Mal të Zi.
Pas shumë vitesh përvojë ndërkombëtare në UNICEF, agjenci të tjera të OKB-së dhe organizata joqeveritare, Servadei tani do të udhëheqë misionin e UNICEF-it për të mirën e çdo fëmije në Mal të Zi.
UNICEF në Mal të Zi do të vazhdojë të mbështesë ndërtimin e një shoqërie që ofron të drejta dhe mundësi të barabarta për çdo fëmijë. Në këtë mënyrë Mali i Zi do të përshpejtojë rrugën e tij drejt anëtarësimit në Bashkimin Evropian
Drejtoresha Ekzekutive e UNICEF-it, Ketrin Rasel, emëroi Servadein në krye të zyrës përfaqësuese të UNICEF-it në Mal të Zi, dhe mandati i tij fillon sot pas dorëzimit të letrave kredenciale në Qeverinë e Malit të Zi.
Para se të merrte këtë funksion, Servadei ishte Shef i Zyrës Përfaqësuese të UNICEF-it në Libi, Këshilltar Rajonal i UNICEF-it për Situatat Emergjente për Lindjen e Mesme dhe Afrikën e Veriut dhe Zëvendës Shef i Zyrës së UNICEF-it në Etiopi dhe Jordani.
Më herët gjatë karrierës së tij, Servadei ka punuar në OJQ të ndryshme dhe agjenci të OKB-së për mbrojtjen e të drejtave të njeriut, në akcione humanitare dhe menaxhimin e programeve në Shqipëri, Irak, Kenia, Somali, Sudan, si dhe në disa vende të Lindjes së Mesme.
Ai ka diplomuar në të drejtën ndërkombëtare dhe të drejtat e njeriut, ka përfunduar studimet master në zhvillim ndërkombëtar dhe është një avokat i certifikuar.
Servadei është shefi i pestë i zyrës përfaqësuese të UNICEF-it në Mal të Zi që nga themelimi i zyrës përfaqësuese të UNICEF-it pasi Mali i Zi rifitoi pavarësinë e tij në vitin 2006.
