Eto Madagasikara, ny UNICEF dia manameloka ireo fihetsika izay mihatra amin’ny olona voan'ny albinisma ary vonona hiara-hiasa amin'ny mpiara-miombon'antoka rehetra ho fiarovana azy ireo

Antananarivo, 7 martsa 2022 – Manoloana ny tatitra momba ny fakàna an-keriny, ny fanafihana ary ny famonoana zaza varira manerana ny nosy, dia mampahatsiahy mafy ny UNICEF fa manan-jo ho velona ny ankizy tsirairay, na inona na inona fahasamihafana misy eo aminy ary manameloka izany toe-javatra izany izay miendrika fanitsakitsahana goavana ny zon’ny zaza eto Madagasikara.

Ny 04 martsa 2022 teo, tao amin’ny Kaominina ambanivohitr’i Berano Amboasary no nahitana fatin’ankizy iray tokony ho 6 taona eo ho eo izay voan’ny “albinisma” efa tsy nisy aina intsony. Raha ny vaovao voaray teo aloha dia fantatra fa vola no nibaiko ireny olona nahavanon-doza ireny, satria ireo ankizy ireo dia voalaza fa amidy amin’ny olona manatanteraka sorona.

Ny firongatr’izany asan-jiolahy izany dia nahasarika ny sain’ny manam-pahaizana telo momba ny zon’olombelona eo anivon’ny Firenena Mikambana izay nanentana ny tompon’andraiki-panjakana eto Madagasikara mba handray fepetra haingana hiarovana ny olona rehetra voan’ny albinisma. Ity antso ity dia mifanojo indrindra amin’ireo tolo-kevitra napetraky ny Komitin’ny Zon’ny Ankizy ho an’i Madagasikara tamin’ny Febroary 2022, izay manome soso-kevitra ny amin’ny famongorana ireo fomba fanao ratsy, toy ny fakana an-keriny sy ny famonoana ankizy varira. Anisan’ny ahafahana mamongotra io toe-javatra io ny « fametrahana lalàna mahakasika izany sy ny fanamafisana ny fanentanana ny fiaraha-monina iray manontolo, amin’ny alàlan’ny fampandraisana andraikitra ireo mpitondra fivavahana sy mpitarika nentim-paharazana. »

Ny fanombanana fohy mikasika ny tsy fandriampahalemana any amin’ny faritra atsimon’i Madagasikara natao tamin’ny janoary 2022 dia nanamafy ny fisian’ny fiheverana sy finoana izay mamporisika ny fakana an-keriny, ny halatra ary ny fanondranana antsokosoko taovan’ankizy varira. Eny anivon’ny distrika sy ny kaominina, dia efa mandray andraikitra sahady ireo mpisehatra mivondrona ao anatin’ny tambajotra fiarovana ny zaza, ho fitsaboana ara-tsaina sy ara-tsosialy ary ara-pahasalamana ireo zaza niharan’ny herisetra ireo, ny fianakavian’izy ireo ary koa ny fametraha fitoriana eny anivon’ny fitsarana ho an’ireo olona ahiahiana ho nahavanon-doza.

Manahy mafy ny amin'ity toe-javatra ity ny UNICEF ka mamerina ny ahiahiny ary manohana ny lakolosy fanairana ataon'ireo manampahaizana iraisam-pirenena. Ny UNICEF dia vonona ny hanohy ny fiaraha-mientana amin’ireo manampahefana manerana ny nosy, isam-paritra ary eo an-toerana mahakasika ireo hetsika ilaina, anisan'izany ny (i) fampiharana ny hetsika momba ny fifandraisana sy ny fanentanana eo amin’ny fiaraha-monina, miaraka amin'ny fandraisan'anjaran'ny mpitarika nentim-paharazana ary (ii) fametrahana rafitra fanaraha-maso ny fampahalalam-baovao ary (iii) fanaovana laharam-pahamehana ny fanenjehana, ny fisamborana ary fanamelohana ireo olona ahiahiana ho nahavanon-doza.