ການມີສ່ວນຮ່ວມໃນສັງຄົມ
ໃຫ້ໂອກາດທີ່ເທົ່າທຽມກັນສຳລັບເດັກທຸກໆຄົນ
- ສາມາດມີໃນ:
- English
- ລາວ
ສິ່ງທ້າທາຍ
ໃນຊຸມປີຜ່ານມາ, ເດັກໃນ ສປປ ລາວ ນັບມື້ນັບມີຈໍານວນຫຼາຍທີ່ໄດ້ຮັບສິດທິຂອງເຂົາເຈົ້າ ແລະ ໄດ້ຮັບຜົນປະໂຫຍດຫຼາຍຈາກການຂະຫຍາຍຕົວທາງເສດຖະກິດຂອງປະເທດໃນປະຈຸບັນ.
ການເຕີບໂຕທາງດ້ານເສດຖະກິດທີ່ເຂັ້ມແຂງໂດຍການຂັບເຄື່ອນຂອງຂະແໜງຊັບພະຍາກອນທຳມະຊາດ ແລະ ພະລັງງານເຮັດໃຫ້ປະເທດສາມາດຍ້າຍຈາກປະເທດທີ່ມີລາຍໄດ້ຕໍ່າມາເປັນປະເທດທີ່ມີລາຍໄດ້ປານກາງໃນຂັ້ນຕົ້ນໄດ້ ໃນປີ 2011. ເສດຖະກິດຂະຫຍາຍຕົວຢູ່ໃນລະດັບ 6.7%ໃນປີ 2017, ແລະ ຄວາມທຸກຍາກໄດ້ຫລຸດລົງເຄິ່ງໜຶ່ງ .
ປີ 2018 ສປປ ລາວ ໄດ້ປະຕິບັດສໍາເລັດເງື່ອນໄຂຜູ້ມີສິດຫລຸດພົ້ນອອກຈາກສະຖານະພາບການເປັນປະເທດດ້ອຍພັດທະນາເປັນຄັ້ງທຳອິດ. ຖ້າຫາກວ່າປະເທດລາວສາມາດຮັກສາລະດັບການພັດທະນາ ແລະ ບັນລຸມາດຖານນັ້ນອີກຄັ້ງໃນປີ 2021, ປະເທດລາວຈະຖືກລຶບອອກຈາກບັນຊີລາຍຊື່ປະເທດດ້ອຍພັດທະນາຢ່າງເປັນທາງການໃນປີ 2024 .
ຍ້ອນວ່າປະເທດລາວມີການຫັນປ່ຽນທາງດ້ານເສດຖະກິດທີ່ດີຂຶ້ນ, ຄູ່ຮ່ວມພັດທະນາໄດ້ປັບປ່ຽນຍຸດທະສາດການຊ່ວຍເຫຼືອຂອງພວກເຂົາ ເພື່ອສະທ້ອນການຫັນປ່ຽນດັ່ງກ່າວ, ຊຶ່ງມັນອາດຈະເປັນສິ່ງທ້າທາຍຕໍ່ການລະດົມຊັບພະຍາກອນ ສຳລັບເດັກທີ່ມີຄວາມສ່ຽງຫຼາຍທີ່ສຸດໃນເຂດທີ່ມີຄວາມຫຍຸ້ງຍາກ.
ເດັກທີ່ມີຄວາມສ່ຽງຫຼາຍທີ່ສຸດແມ່ນເດັກທີ່ມາຈາກຄອບຄົວທີ່ທຸກຍາກ ທີ່ອາໄສຢູ່ໃນເຂດຊົນນະບົດຫ່າງໄກສອກຫຼີກ, ແລະ ເດັກທີ່ແມ່ຂອງພວກເຂົາມີໂອກາດການສຶກສາໜ້ອຍ. ເດັກເຫຼົ່ານີ້ມັກຈະຂາດເຂີນ ດ້ານການສຶກສາ, ໂພຊະນາການ, ນໍ້າ ແລະ ສຸຂາພິບານ, ການບໍລິການດ້ານສຸຂະພາບ ແລະ ການປົກປ້ອງ.
ວິທີແກ້ໄຂ
ອົງການຢູນິເຊັບ ກຳລັງເຮັດວຽກຮ່ວມກັບລັດຖະບານ ແລະ ຄູ່ຮ່ວມພັດທະນາເພື່ອຮັບປະກັນດ້ານນະໂຍບາຍແຫ່ງຊາດ ແລະ ລະບົບຕ່າງໆ ສຳລັບເດັກ, ໂດຍສະເພາະຜູ້ດ້ອຍໂອກາດທີ່ສຸດແມ່ນມີຄວາມເຂັ້ມແຂງຂຶ້ນ ໂດຍຜ່ານການປັບປຸງການສ້າງສິ່ງທີ່ເປັນຫຼັກຖານ, ການວິເຄາະນະໂຍບາຍ, ການລະດົມຄວາມເຂົ້າໃຈ ແລະ ການສື່ສານ, ແລະ ການຄຸ້ມຄອງດ້ານຄວາມຮູ້.
ວຽກງານຂອງພວກເຮົາກ່ຽວກັບການມີສ່ວນຮ່ວມໃນສັງຄົມ ແມ່ນສຸມໃສ່ການສະໜັບສະໜູນການເກັບກຳຂໍ້ມູນ, ການວິເຄາະ ແລະ ການນຳໃຊ້ຂໍ້ມູນ, ນະໂຍບາຍສັງຄົມສໍາລັບທຸກຄົນ, ການວາງແຜນ, ການເງິນພາກລັດ ສຳລັບເດັກ, ການສ້າງຄວາມເຂັ້ມແຂງໃນການປະຕິບັດກອບການຕິດຕາມ ແລະ ປະເມີນຜົນແຫ່ງຊາດຂອງແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 8 ແລະ ເປົ້າໝາຍການພັດທະນາແບບຍືນຍົງ.
ອົງການຢູນິເຊັບ ໄດ້ສະໜັບສະໜູນທາງດ້ານວິຊາການ ແລະ ທາງດ້ານການເງິນໃນການສຳຫຼວດຕົວຊີ້ວັດສັງຄົມລາວ ຄັ້ງທີ II ໂດຍນໍາໃຊ້ຮູບແບບການສໍາຫຼວດຫຼາຍກຸ່ມຕົວຊີ້ວັດ ຄັ້ງທີ 6 ເຊິ່ງໄດ້ສ້າງຂໍ້ມູນທີ່ແຍກຕາມອາຍຸ, ເພດ, ທີ່ຢູ່ອາໄສ, ພາກ, ແຂວງ, ຂໍ້ມູນຫົວໜ້າຄອບຄົວກຸ່ມທີ່ໃຊ້ພາສາຊົນເຜົ່າ, ລະດັບການສຶກສາຂອງແມ່ ແລະ ຄວາມຮັ່ງມີ, ເຮັດໃຫ້ມີການວິເຄາະເພີ່ມຕື່ມກ່ຽວກັບຄວາມແຕກຕ່າງ ເພື່ອຊ່ວຍລະດົມຄວາມເຂົ້າໃນລະດັບນະໂຍບາຍ, ການສ້າງແຜນງານ, ການຕິດຕາມ ແລະ ການລົງທືນ ສຳລັບເດັກ. ການສຳຫຼວດຕົວຊີ້ວັດສັງຄົມລາວຄັ້ງທີ II ໃຫ້ຂໍ້ມູນພື້ນຖານທີ່ມີຄຸນນະພາບສໍາລັບການຕິດຕາມກວດກາ ແລະ ປະກອບສ່ວນເຂົ້າໃນການສ້າງແຜນພັດທະນາເສດຖະກິດສັງຄົມຄັ້ງທີ 8, ການທົບທວນໄລຍະກາງທີ່ຈະມາເຖິງ, ແລະ ເພື່ອອໍານວຍຄວາມສະດວກໃຫ້ແກ່ການຕິດຕາມເປົ້າໝາຍການພັດທະນາແບບຍືນຍົງ ແລະ ການທົບທວນແຫ່ງຊາດແບບສະໝັກໃຈ.
ອົງການຢູນິເຊັບ ໄດ້ສະໜັບສະໜູນສະຖາບັນຄົ້ນຄ້ວາເສດຖະກິດແຫ່ງຊາດໃນການພັດທະນາ ແລະ ເຜີຍແຜ່ກອບວຽກການຄົ້ນຄ້ວາແຫ່ງຊາດ ເຊິ່ງສະໜອງກອບຄົ້ນຄວ້າໃນຕໍ່ໜ້າເພື່ອສ້າງຫຼັກຖານ ເພື່ອປະກອບໃຫ້ແກ່ການສ້າງນະໂຍບາຍ, ການວາງແຜນ ແລະ ການແລກປ່ຽນການຮຽນຮູ້ ແລະ ຄວາມຮູ້.
ຂະບວນການວິເຄາະງົບປະມານສໍາລັບເດັກຢູ່ໃນລະບົບການເງິນພາກລັດກໍໄດ້ເລີ່ມຕົ້ນຂຶ້ນ ເພື່ອສະໜັບສະໜູນລັດຖະບານໃນການຈັດສັນ ແລະ ເພີ່ມການຕິດຕາມການໃຊ້ຈ່າຍງົບປະມານສໍາລັບເດັກ.
ເພື່ອສ້າງຄວາມເຂັ້ມແຂງໃຫ້ແກ່ລະບົບລາຍງານຂໍ້ມູນແບບປົກກະຕິ, ອົງການຢູນິເຊັບ ໄດ້ສະໜັບສະໜູນການພັດທະນາຖານຂໍ້ມູນອອນລາຍໃນຂັ້ນແຂວງໂດຍໃຊ້ລະບົບ DevInfo. ນີ້ແມ່ນຂີດໝາຍສຳຄັນເພື່ອປັບປຸງການວາງແຜນ, ການປະສານງານ ແລະ ການຕິດຕາມກວດກາໃນລະດັບທ້ອງຖິ່ນ.
ທຸກໆປີ, ອົງການ ຢູນິເຊັບ ໄດ້ມີການອະທິບາຍໂດຍຫຍໍ້ ແລະ ສະໜັບສະໜູນສະພາແຫ່ງຊາດໃນການຕິດຕາມກວດກາພາກສະໜາມ ບ່ອນທີ່ມີການປຶກສາຫາລືບັນຫາຕ່າງໆທີ່ກ່ຽວຂ້ອງກັບການເຮັດໃຫ້ມີສິດຂອງເດັກເປັນທີ່ຮັບຮູ້. ເຊິ່ງຊ່ວຍໃຫ້ບັນດາສະມາຊິກສະພາແຫ່ງຊາດເຂົ້າໃຈສະພາບການຕົວຈິງ ແລະ ມີຄວາມພ້ອມໃນການຍົກບັນຫາກ່ຽວກັບເດັກຂຶ້ນໃນກອງປະຊຸມສະພາແຫ່ງຊາດ ແລະ ລະດົມຄວາມເຂົ້າໃຈເພື່ອສະໜັບສະໜູນ ການເພີ່ມການຈັດສັນງົບປະມານໃຫ້ແກ່ຂະແໜງສັງຄົມສົງເຄາະ.