ТУМАР: балдарды коргоо

Кыргызстанда төрт баланын үчөө зомбулуктун азабын тартууда

Tumar

Балдар Сиздин жардамыңызга муктаж

Балдар Сиздин жардамыңызга муктаж. Мындан ары көрмөксөнгө салууга болбой турган айрым фактыларга назарыңызды бурабыз:

  • Зомбулук жана күчкө салган тарбия коомдо кеңири жайылган көрүнүш. 
  • Зомбулуктун азабын баарынан көп наристелер көрүүдө.
  • Ата-энеси мигрант балдар зомбулукка көбүрөөк дуушар болушат.

Кыргыз элинин үрп-адаты боюнча, жарык дүйнөгө келген ымыркайды ар балээден сакташ үчүн ата-эне Тумар тагат. Үч бурчтук формасындагы тумарга кыргыз оймо-чиймелери түшүрүлгөн. Ал оймолордун мааниси терең: жаңырган Ай – баланын символу, Умай эне – энелерди жана ымыркайларды канатына калкалаган куш түрүндө берилген. «Тумар» - балдарды коргоонун символу.

Дүйнөдөгү балдардын укуктарын коргогон жана Кыргызстан 25 жыл мурда ратификациялаган негизги документтин – Балдар укуктары тууралуу Конвенциянын 30 жылдыгынын урматына бул жылы ЮНИСЕФ балдарга карата зордук-зомбулукту токтотуу максатында улуттук чакырык таштайт (Тумар Манифести):

  • Бир да бала ишенген адамдар тарабынан сабалбашы керек.
  • Бир да балада жакшы көрүү сезиминин ордуна ата-энесинен, ага-инисинен жана эже-сиңдилеринен коркуу сезими болбошу керек.
  • Бир да бала үйдө жүргөндө, көчөгө чыкканда же мектеп барганда коркпошу керек.
  • Балдарга карата зомбулук – бул ар бирибиз көңүл бурчу иш.

Балдарды коргоо үчүн, коопсуз балалык үчүн ЮНИСЕФке кошулуңуз!  

Сиз эмнелерди жасай аласыз?

Тумар Манифестин колдоо менен, мен балдарга – Кыргызстандын эң кичинекей жана өзгөчө аялуу катмарына карата зордук-зомбулукту токтотууга үндөгөн улуттук чакырыкка өз колдоомду билдирем

Tumar campaign
UNICEF/Kyrgyzstan/2019
  • Зомбулук балага зыян келтирээрин, баланын өсүп-өнүгүүсү, ден соолугу жана келечеги үчүн кесепеттери оор болоорун түшүнөм.
  • Зомбулукка жол бербеш керек.
  • Баланы тарбиялоонун позитивдүү ыкмалары бар экенин билем.
  • Менин айлана-чөйрөмдөгү балдарга күч колдонулбаган тарбия берүүгө умтулам.
  • Эгерде балага карата зомбулук жасалып жатканына күбө болсом, же ушул тууралуу угуп калсам 111 номуру боюнча “Балдар үчүн ишеним телефонуна” же милицияга чалып, кабар берем.
  • Өз үй-бүлөмдөгү, коомдогу жана өлкөдөгү зомбулукту токтотууга салым кошом.
  • Үй-бүлөдө жана мекемелерде уруп-согуп жазалоого тыюу салууну колдойм

Балдарга карата зордук-зомбулукту болтурбоо – ар бирибиздин ишибиз

Мен ЮНИСЕФти жана анын өнөктөштөрүн, анын ичинде дүйнөдөгү бардык балдарды колдойм жана балдарга карата зордук-зомбулукту ТҮП-ТАМЫРЫНАН ЖОК КЫЛУУ үчүн өз добушумду берүүгө жана бул багытта иш алып барууга сөз берем.

Мен балдарды коргогон ТУМАР болом!