Ինչպես աշխատավայրն ավելի լավը դարձնել աշխատող ծնողների համար

Ընտանիքամետ քաղաքականությունը լավագույն ներդրումն է թե՛ ընտանիքի, թե՛ մասնավոր հատվածի և թե՛ տնտեսության համար

ՅՈՒՆԻՍԵՖ
Տան բակում հայրիկը գրկել է իր երկու տղաներին:
UNICEF Armenia/2018/Osipova

01 Օգոստոս 2019

Ընտանիքամետ քաղաքականության ուղղությամբ ներդրումներ անելը լավ է թե՛ ընտանիքի, թե՛ մասնավոր հատվածի և թե՛ տնտեսության համար: Սակայն աշխարհում հսկայաթիվ ծնողների համար չկան այնպիսի քաղաքականություններ, ինչպիսին օրինակ ծնողական արձակուրդն է, կրծքով կերակրման համար նախատեսված ընդմիջումները, երեխայի խնամքի ծառայություններն ու երեխայի նպաստը:

Ընտանիքամետ քաղաքականությունները նպաստում են երեխաների առողջությանն ու կրթությանը, ինչպես նաև աղջիկների ու տղաների հավասարությանն ու երկրների կայուն զարգացմանը՝ բարելավելով աշխատուժի արդյունավետությունը:

Նման քաղաքականությունների բացակայությունը թույլ չի տալիս ծնողին ամուր կապ ստեղծել իրենց փոքրիկի հետ նրա կյանքի կարևորագույն համարվող առաջին տարիների ընթացքում: Ինչպես վկայում են փաստերը, սա այն ժամանակահատվածն է, երբ ճիշտ սնուցումը, սիրող և խթանող միջավայրն ու խնամքը մեծ ազդեցություն են թողնում փոքրիկի զարգացող ուղեղի և հետագա կյանքի վրա:

Այս իրավիճակը փոխելու ժամանակը հիմա է: Գնալով ավելի շատ ընկերություններ են սկսում տեսնել ու գնահատել ընտանիքամետ քաղաքականության արժեքը: Սակայն առաջընթացը շատ դանդաղ է և հրատապ ներդրումներ են հարկավոր:

Կոչ ենք անում իրականացնել հետևյալ գործողությունները

  1. Բավականաչափ վճարովի արձակուրդ տրամադրել թե՛ ֆորմալ և թե՛ ոչ ֆորմալ տնտեսություններում աշխատող բոլոր ծնողներին և խնամակալներին ՝ իրենց փոքրիկների կարիքները բավարարելու համար: Սա նշանակում է՝ վճարովի մայրական, հայրական և ծնողական արձակուրդ և հիվանդ երեխաների խնամքի համար նախատեսված արձակուրդ:
  2. Աջակցել մոր կողմից երեխային 6 ամիս բացառապես կրծքով կերակրմանը, ինչպես խորհուրդ է տրվում ողջ աշխարհում ընդունված չափանիշներով, և դրա շարունակությանն այնքան ժամանակ, ինչքան որ կցանկանա մայրը:
  3. Ապահովել երեխայի խնամքի մատչելի, հասանելի և որակյալ ծառայություններ: Ապահովել, որ բոլոր երեխաներն ունենան մատչելի, որակյալ խնամք և վաղ ուսումնառություն:
  4. Տրամադրել երեխայի նպաստ և բավարար աշխատավարձ՝ երեխաների մասին հոգ տանելու համար:

Ընտանիքամետ քաղաքականության առավելությունները

Լավ է երեխաների համար՝
  • Բարենպաստ ազդեցություն է ունենում երեխայի հմտությունների և կարողություններ վրա և, ի վերջո, բարելավում նրա արդյունավետությունը հետագա կյանքում:
  • Թեև յուրաքանչյուր ծնող իր երեխայի համար լավագույնն է ցանկանում՝ նրանցից շատերը դա իրականացնելու հնարավորությունը չունեն, քանի որ ստիպված են լինում աշխատավայրում երկար ժամեր անցկացնել: Սա նշանակում է, որ նրանցից շատերը երկար ժամանակով բացակայում տնից են կամ ժամանակ չունեն իրենց փոքրիկների հետ անցկացնելու համար:
  • Աշխարհում միայն 42 երկիր ազգային քաղաքականություն ունի, որի շնորհիվ ծնողներին և խնամակալներին իրենց երեխային խնամելու համար տրամադրում է ժամանակ և միջոց (6 ամիս վճարովի մայրական արձակուրդ և 4 շաբաթ վճարովի հայրական արձակուրդ):
Լավ է կանանց համար՝
  • Երեխայի խնամքի մատչելի ծառայություններն օգնում են կանանց պահպանել իրենց աշխատանքը՝ այդպիսով նպաստելով ընտանիքների բարեկեցությանը, իրենց ընկերությունների և, առհասարակ, տնտեսության բարելավմանը:
  • Ըստ ՄըքՔինզիի 2015 թվականի (McKinsey 2015) զեկույցի՝ կանանց հավասար մասնակցությունը աշխատաշուկայում լրացուցիչ 12 տրիլիոնի հասույթ կապահովի համաշխարհային տնտեսության համար մինչև 2025 թվականը:
  • Այն նաև նպաստում է գենդերային անհավասարությունների նվազմանը, քանի որ խթանում է կանանց ու տղամարդկանց հավասար ներգրավվածությունը երեխայի խնամքի հարցերում:
Լավ է մասնավոր հատվածի համար՝
  • Ընտանիքամետ քաղաքականությունները մեծացնում են աշխատակիցների՝ ընկերությունը չլքելու հավանականությունը, նվազեցնում բացակայությունները և աշխատակազմի համալրման հետ կապված ծախսերը, ինչպես նաև օգնում խթանել աշխատակիցների ներգրավվածությունն ու էթիկան:
  • Ընտանիքամետ քաղաքականությունները մեծացնում են կանանց՝ մայրական արձակուրդից հետո աշխատանքի վերադառնալու հավանականությունը և ընկերությունների համար նվազեցնում այսպես կոչված «մայրիկների հարկը»:
Լավ է տնտեսության համար՝
  • Ընտանիքամետ քաղաքականությունները խթանում են տնտեսական աճը և ազգային ՀՆԱ-ն: Վերջին 50 տարիների ընթացքում սկանդինավյան երկրներում գործող ընտանիքամետ ծառայությունները, ինչպես նաև՝ կանանց աշխատաշուկա մուտք գործելը, խթանել են մեկ շնչին բաժին ընկնող ՀՆԱ-ն 10-ից 20 տոկոսով: