Հայաստանում գործարկվել է երեխաների և դեռահասների համար նախատեսված կիբեռանվտանգության առաջին առցանց հարթակը
- Հայերեն
- English
Երևան, օգոստոսի 27, 2025թ.: ՅՈՒՆԻՍԵՖ-ի և CyberHUB-AM-ի կողմից պաշտոնապես գործարկվել է ԿիբեռՉատ հարթակը՝ Հայաստանի առաջին առցանց աջակցման և տեղեկատվական համակարգը, որը նախատեսված է մինչև 18 տարեկան երեխաների և դեռահասների համար։ Հարթակի նպատակն է ապահովել երեխաների և դեռահասների անվտանգությունն առցանց միջավայրում։ Այն գործում և ապահովում է երեք հիմնական խորհրդատվական և աջակցության բնույթի ուղղություններով. տեխնիկական, իրավական և հոգեբանական։
ԿիբեռՉատ հարթակը հասանելի է՝ chat.cyberhub.am հասցեով։ Այն ստեղծվել է Միացյալ Թագավորության կառավարության ֆինանսավորմամբ՝ ՄԹ միջազգային զարգացման շրջանակում։
Հարթակը ստեղծվել է ի պատասխան աճող սպառնալիքների, որոնք թիրախավորում են երեխաներին և դեռահասներին՝ կիբեռբուլինգի, անձնական տվյալների շանտաժի, հետապնդման, օգտահաշիվները կոտրելու և այլ միջոցներով։
ԿիբեռՉատն առաջարկում է․
- Անանուն առցանց չատ՝ 24/7 հասանելիությամբ
- Թեժ գիծ՝ 055 228811 հեռախոսահամարով
- Ուղիղ կապ Facebook, Instagram, TikTok, Snapchat, Telegram, WhatsApp հարթակներով
- Տեխնիկական, իրավական և հոգեբանական աջակցություն
- Օգտակար նյութեր, ուղեցույցներ և կանխարգելիչ խորհուրդներ:
Ցանկացած երեխա պետք է վստահ լինի, որ առցանց միջավայրում նա պաշտպանված է։ ԿիբեռՉատը այդ վստահության գործիքն է։
Հարթակը մշակված և ադապտացված է ոչ միայն երեխաների և դեռահասների, այլև մեծահասակների կարիքներին համապատասխան, որոնք կարող են հանդիսանալ երեխայի ծնողները, մանկավարժը կամ օրինական խնամակալը։
Ծնողները, ուսուցիչները, հոգեբանները և բոլոր շահագրգիռ կողմերը կարող են օգտվել կայքում առկա ռեսուրսներից՝ երեխաներին աջակցելու և առցանց սպառնալիքներին ճիշտ արձագանքելու համար։
Մանրամասների համար այցելեք՝ chat.cyberhub.am հասցեով կամ պարզապես կապվեք մեզ հետ հարթակում առկա սոցիալական ցանցերով։
ԿիբեռՉատ հարթակը գործում է CyberHUB-AM նախաձեռնության շրջանակում, որը ստեղծվել է Բազմակողմանի տեղեկատվության ինստիտուտի կողմից։ CyberHUB-AM-ը կիբեռանվտանգության հետ կապված միջադեպերի աջակցության թիմ է, որը հանդիսանում է նաև թվային միջադեպերի հետաքննության լաբորատորիա հասարակական կազմակերպությունների, իրավապաշտպանների, ակտիվիստների, լրագրողների և անկախ լրատվամիջոցների համար։ Այժմ այն զբաղվում է նաև երեխաների և դեռահասների հարցերով։
Լրացուցիչ տեղեկությունների համար կապ հաստատեք՝
Զառա Սարգսյան, ՅՈՒՆԻՍԵՖ, [email protected], 055232169 Ալեքսանդր Մարտիրոսյան, CyberHUB-AM, [email protected]
Մամուլի հարցերով պատասխանատու
ՅՈՒՆԻՍԵՖ-ն աշխատում է, որպեսզի Հայաստանում յուրաքանչյուր երեխա լինի սիրված, սնված և խնամված: Հիմնվելով ավելի քան 75-ամյա միջազգային փորձի և Հայաստանի երեխաների համար 30 տարվա հաջողությունների վրա՝ ՅՈՒՆԻՍԵՖ-ը պարտավորություն է ստանձնում բարելավելու ամենախոցելի՝ աղքատության և մեկուսացման մեջ ապրող երեխաների կյանքը: Ծնվելու պահից մինչև ավագ դպրոցի ավարտը՝ ՅՈՒՆԻՍԵՖ-ն աշխատում է իր գործընկերների հետ, որպեսզի Հայաստանում յուրաքանչյուր երեխա և ընտանիք կարողանա օգտվել իր համար նախատեսված քաղաքականություններից և ծառայություններից:
Ստեղծման պահից ի վեր՝ ՅՈՒՆԻՍԵՖ-ն ամբողջությամբ ֆինանսավորվում է անհատների, մասնավոր հատվածի, հիմնադրամների և կառավարությունների կամավոր նվիրատվություններով:
Հայաստանում ՅՈՒՆԻՍԵՖ-ի գործունեությանը ավելի մանրամասն ծանոթանալու համար կարող եք այցելել www.unicef.am և www.babycef.am կայքերը կամ հետևել մեզ հետևյալ սոցիալական հարթակներում` Facebook, Instagram և X-ում:
