Հոգեբանական առաջին օգնություն
Ի՞նչ է հոգեբանական առաջին օգնությունն ու ինչպե՞ս աջակցել երեխաներին արտակարգ իրավիճակների ժամանակ
Պատերազմ, բնական և տեխնածին աղետներ, վթարներ, հարկադիր տեղահանում... Արտակարգ իրավիճակների հետևանքով ծագող ճգնաժամերը, գրեթե միշտ նույնն են՝ գալիս են անսպասելի, փոխում են կյանքի բնականոն հունը, և որպես կանոն՝ մարդիկ պատրաստ չեն դրանց: Շատ կարևոր է, որ նման իրավիճակում մարդը ստանա հոգեբանական առաջին օգնություն:.
- Ի՞նչ է հոգեբանական առաջին օգնությունը
- Ո՞վ ունի դրա կարիքը
- Ինչպե՞ս ցուցաբերել
Ի՞նչ է հոգեբանական առաջին օգնությունը
Հոգեբանական առաջին օգնությունը մարդասիրական աջակցություն է կյանքի դժվարին իրավիճակում հայտնված մարդուն: ՀԱՕ հիմնական նպատակն է հետագա հնարավոր հոգեբանական խնդիրներն ու բարդությունները կանխարգելելը կամ նվազեցնելը: ՀԱՕ հիմնական քայլերն են.
- Կարիքների գնահատում
- Անվտանգության, հանգստի զգացողության ապահովում
- Հուզական աջակցության տրամադրում, սփոփում
- Գործնական օգնության և հասանելի ծառայությունների մասին տեղեկատվության տրամադրում
- Հետագա վնասների կանխարգելում:
Ովքե՞ր ունեն հոգեբանական առաջին օգնության կարիք
Ցանկացած մեկը, որը հայտնվել է դիսթրեսի մեջ կարող է ՀԱՕ կարիք ունենալ:
*ԴԻՍԹՐԵՍ - սթրեսի տեսակ է, որը կարող է օրգանիզմի դիմադրողականության թուլացման և հյուծման պատճառ դառնալ՝ հանգեցնելով մարդու առողջության վատթարացմանը և ծանր հիվանդությունների:
Անհրաժեշտ է առաջնահերթություն տալ նրանց, որոնք ունեն՝
- կյանքին սպառնացող ծանր վնասվածքներ,
- հոգեկան անկայուն վիճակ,
- ինքնավնասման սպառնալիք,
- ուրիշներին վնասելու սպառնալիք:
Ճգնաժամային իրավիճակներում մարդկանց որոշ խմբեր ունեն առանձնահատուկ ուշադրության կարիք: Կախված իրավիճակից՝ ռիսկային խմբեր կարող են լինել.
- երեխաները և դեռահասները,
- տարեցները,
- առողջական խնդիրներով, ֆիզիկական կամ հոգեկան սահմանափակ հնարավորություններով մարդիկ,
- հղի կանայք և մանկահասակ երեխաներ ունեցող մայրերը,
- խտրականության կամ բռնության ռիսկի ենթարկված մարդիկ,
- առանձին էթնիկ կամ կրոնական խմբերի ներկայացուցիչները,
- բազմակի տեղափոխությունների և տեղահանումների ենթարկված մարդիկ,
- նախկինում տրավմատիկ փորձառություն ունեցողները,
- զգալի նյութական կորուստ ունեցողները:
Հոգեբանական առաջին օգնության առանձին գլուխներին կարող եք ծանոթնալ ստորև
Եթե ուսուցիչ եք կամ ծնող կամ երեխաների հետ աշխատող այլ ոլորտների մասնագետ, ապա այս ուղեցույցը ձեզ համար է։
Սույն նյութը ստեղծվել է Միացյալ Թագավորության կառավարության և անվտանգության հիմնադրամի ֆինանսական աջակցության շնորհիվ։
Բովանդակության համար պատասխանատու է Հայկական Կարմիր խաչի ընկերությունը և պարտադիր չէ, որ այն արտահայտի Միացյալ Թագավորության կառավարության, ինչպես նաև իրականացվող գործընկերների տեսակետները։