Njohuri lidhur me mediat për çdo fëmijë
UNICEF u bën thirrje të gjithë prindërve që të flasin me fëmijët e tyre për përmbajtjen mediatike që ata ndjekin dhe që të gjitha mediat të ofrojnë sasi më të madhe dhe cilësi më të mirë të programeve për fëmijët e moshave të ndryshme
- Crnogorski
- English
- Shqip
PODGORICE, 7 SHKURT 2023 – Me rastin e Ditës së Internetit të Sigurt, e festuar në mbarë botën më 7 shkurt të këtij viti, UNICEF u bën thirrje të gjithë prindërve që të flasin me fëmijët për përmbajtjen mediatike që ata ndjekin, si dhe të kufizojnë kohën dhe zgjedhjen e përmbajtjes mediatike në mënyrën për të mbështetur më së miri zhvillimin e fëmijëve në faza të ndryshme të fëmijërisë dhe adoleshencës.
Sipas sondazhit të fundit të Ipsos për këtë çështje, të kryer në nëntor 2022, ka pasur një rritje të numrit të prindërve në Mal të Zi që ndërmjetësojnë në mënyrë aktive konsumin mediatik të fëmijëve të tyre në vitet e fundit.
Nga viti 2018 deri në vitin 2022, përqindja e prindërve që kufizojnë kohën e fëmijëve të tyre para ekranit u rrit nga 30 në 50 përqind, ndërsa përqindja e prindërve që kufizojnë përmbajtjen mediatike që fëmijët e tyre mund të ndjekin u dyfishua nga 32 në 64 përqind.
Më e rëndësishmja, përderisa në vitin 2018 vetëm një në pesë prindër stimuluan analizën kritike të medias duke folur me fëmijët e tyre për përmbajtjen mediatike që ata ndjekin, një në dy prindër e bëri këtë vitin e kaluar.
“Është inkurajuese që prindërit e Malit të Zi kanë dëgjuar mesazhet e fushatës sonë për edukimin mediatik Le të zgjedhim atë që shikojmë. UNICEF u bën thirrje të gjithë prindërve që të ndihmojnë fëmijët të analizojnë në mënyrë kritike lajmet, reklamat dhe mesazhet e tjera mediatike që hasin çdo ditë", tha Përfaqësuesi i UNICEF në Mal të Zi Juan Santander.
"Gjithashtu u bëjmë thirrje të gjitha mediave, veçanërisht atyre të shërbimit publik, që të ofrojnë programe më cilësore dhe sasiore të programeve përkatëse bashkëkohore për fëmijët e grupmoshave të ndryshme si në internet ashtu edhe në mediat tradicionale. Gjithashtu duam të kujtojmë se çdo student në Mal të Zi ka një shans të mësojë se si të përdorë internetin në mënyrë të sigurt për të mësuar dhe zhvilluar aftësi të ndryshme, falë Platformës Digjitale të Shkollës, të krijuar nga Ministria e Arsimit me mbështetjen e UNICEF,” tha Përfaqësuesi i UNICEF në Mal të Zi Juan Santander.
Në epokën digjitale, edukimi mediatik është bërë një nga aftësitë thelbësore të jetës për qytetarët që të jenë në gjendje të njohin dezinformatat dhe të gjejnë të dhëna dhe informacione të besueshme për tema të ndryshme. Sipas sondazhit të Ipsos nga nëntori 2022, dy nga pesë shtetas të rritur të Malit të Zi nuk kontrollojnë saktësinë e informacionit që hasin dhe që u duken të dyshimta.
Reporterja e re e UNICEF, Andjela Grujić, shprehu shqetësimin për shfaqjen e gjuhës së urrejtjes në internet dhe ndikimin e saj në shëndetin e të rinjve. Ajo vuri në dukje se si një internet i sigurt fillon me sjelljen tonë në internet.
“Nëse do të kisha fuqinë për ta bërë internetin një vend më të sigurt, do të hiqja të gjitha përmbajtjet që nuk janë relevante. Do të hiqja të gjitha format e gjuhës së urrejtjes në internet, sepse mund të ketë pasoja të rënda për viktimat e saj. Njerëzit që dhunohen verbalisht shpesh bëhen depresivë, të pasigurt për veten dhe kanë ankth, dhe disa prej tyre, për fat të keq, bëjnë vetëvrasje. Besoj se ne si shoqëri duhet të marrim iniciativën për ta bërë më të lumtur mjedisin tonë online”.
Edukimi i të rinjve për internetin është mënyra më e mirë për të luftuar për një internet më të sigurt dhe më të lumtur, thotë reporteri i ri i UNICEF, Luka Vujovic.
“Lëndën e Informatikës, e cila tani është e detyrueshme në shkollat fillore dhe disa të mesme, do ta përshtatja me trendet aktuale në internet dhe do ta formësoja atë në mënyrë që njerëzit të mësohen për rreziqet e saj. Gjithashtu do të krijoja një njësi speciale policie të fokusuar vetëm në dhunën në internet, sepse kjo është aktualisht lloji më i përhapur dhe më i pakontrolluar i dhunës”.
Që nga viti 2004, Dita e Internetit të Sigurt festohet në mbarë botën në shkurt për të promovuar përdorimin më të sigurt dhe më të përgjegjshëm të teknologjisë online dhe pajisjeve celulare, veçanërisht midis fëmijëve dhe të rinjve.
Nga bullizimi kibernetik tek rrjetet sociale te identiteti digjital, çdo vit Dita e Internetit të Sigurt synon të rrisë ndërgjegjësimin për çështjet e reja në internet dhe shqetësimet aktuale.
