Гадаад Харилцааны Сайд НҮБ-ын Хүүхдийн Сангийн Баянхонгор аймагт хэрэгжүүлж буй төслүүдтэй танилцлаа
2017-2022 онд НҮБ-ын Хүүхдийн Cангаас Баянхонгор аймагт эрүүл мэнд, боловсрол, ус, ариун цэвэр, цэвэр агаар чиглэлүүдээр нийт 5 сая гаруй ам.долларын хөрөнгө оруулалт хийжээ.
- Боломжтой:
- English
- Mongolian
Гадаад Харилцааны Сайд Хатагтай Б.Батцэцэг болон НҮБ-ын Хүүхдийн Сангийн Суурин төлөөлөгч Эваристе Коуасси-Комлан нарын энэхүү айлчлал нь Суурин төлөөлөгч 2021 оны 11 дүгээр сард Монгол Улсад томилогдон ажиллаж эхэлснээс хойших анх удаагийн хамтарсан айлчлал юм.
НҮБ-ын Хүүхдийн Сангийн 2017-2022 оны Улс Орны Хөтөлбөрийн хүрээнд хэрэгжүүлсэн ажлуудын үр дүн, ололт амжилт, сайн туршлагуудыг Гадаад Харилцааны Сайд Хатагтай Б.Батцэцэгт танилцууллаа. Мөн НҮБ-ын Хүүхдийн Сангийн ирэх таван жилийн Улс Орны Хөтөлбөрийн хүрээнд Баянхонгор аймаг болон НҮБ-ын Хүүхдийн Сангийн хамтран ажиллах үйл ажиллагааны төлөвлөгөөг сайдад танилцууллаа. Тус хөтөлбөрт одоогоор хэрэгжиж буй хөтөлбөрийн чиглэлүүдээс гадна аймаг, сум орон нутгийн олон нийтийн хөгжлийн төвүүдээр дамжуулан өсвөр насны хүүхдүүд болон сурагчдад англи хэл сурах боломж бүрдүүлэх ажил багтсаныг илэрхийлэв.
Айлчлалын хүрээнд сайд Б.Батцэцэг БАМ 1020 - Агаарын чанарын хяналтын лавлах станц, агааржуулалтын систем, гал тогоо, ариун цэврийн байгууламжуудаар бүрэн шинэчилсэн 5-р цэцэрлэг, бага оврын бохирын ус цэвэршүүлэх байгууламж, Монгол гэрийн халаалт, дулаалга, агаар сэлгэлтийн ЧИП багц ашигладаг гэр цэцэрлэг зэрэг газруудаар зочиллоо.
"Өнгөрсөн жилүүдэд НҮБ-ын Хүүхдийн Сан Баянхонгор аймагт амжилттай ажиллаж, томоохон хөрөнгө оруулалтууд хийсэнд баяртай байна"
Сайд Б.Батцэцэг хэлэхдээ “Өнгөрсөн жилүүдэд НҮБ-ын Хүүхдийн Сан Баянхонгор аймагт амжилттай ажиллаж, томоохон хөрөнгө оруулалтууд хийсэнд баяртай байна” гэлээ. Гадаад харилцааны яам нь улс орны гадаад харилцаа, гадаад бодлогод хяналт тавьж, гадаад улс орон, олон улсын байгууллагатай харилцаа, хамтын ажиллагааг бүхий л салбарт хөгжүүлэх үүрэг хүлээдэг. Сайд Б.Батцэцэг НҮБ-ын Хүүхдийн Сан болон Баянхонгор аймгийн ЗДТГ-ын хамт олны хичээл зүтгэлийг өндрөөр үнэлэв.
Гадаад Харилцааны Яам нь “НҮБ-ын Хүүхдийн Сангийн 2017-2022 оны Улс Орны Хөтөлбөрт” гарын үсэг зурж, Монгол Улсын Засгийн Газрыг төлөөлөн хөтөлбөрийн хэрэгжилтэд нь хяналт тавин ажилласан. Сайд Б.Батцэцэг хэлэхдээ“Өнөөдөр би НҮБ-ын Хүүхдийн Сантай хамтарсан айлчлал хийж тус байгууллагын Баянхонгор аймагт хийсэн ажлуудтай газар дээр нь танилцаж байгаадаа баяртай байна. Орон нутгийн засаг захиргаа болон НҮБ-ын Хүүхдийн Сан хоорондын хамтын ажиллагааны сайн туршлага, инновацлаг шийдлүүдийг улсын хэмжээнд хэрэгжүүлэх боломж байна” гэлээ. Мөн тэрээр агаар, орчны бохирдолтой тэмцэх, баталгаат ундны усаар иргэдийг хангах, хөдөө орон нутгийн хүүхдүүдийн боловсрол, эрүүл мэндийн үйлчилгээг сайжруулах зэрэг үйл ажиллагааны ач холбогдлыг онцлон тэмдэглэв. Тэрээр “НҮБ-ын Хүүхдийн Сангийн 2023-2027 оны Улс Орны Хөтөлбөрийн хүрээнд ЧИП багц, байгальд ээлтэй ус цэвэрлэх байгууламж зэрэг шийдлүүдийг өргөжүүлэн улсын хэмжээнд сургууль, эрүүл мэндийн төвүүдэд суурилуулах хэрэгтэй” гэж онцоллоо.
Баянхонгор аймаг нь агаарын бохирдол ихтэй аймгуудын тоонд багтдаг бөгөөд аймгийн удирдлагууд агаарын бохирдлыг бууруулах чиглэлээр хүчин чармайлт гаргаж байсан хэдий ч цогт стратеги, үйл ажиллагаа дутмаг байсан билээ. 2018 онд НҮБ-ын Хүүхдийн Сан Баянхонгор аймагт ажиллаж эхлэн агаарын бохирдлыг бууруулахад чиглэсэн “Утаагүй Баянхонгор” 2019-2022 оны үйл ажиллагааны хөтөлбөрийг боловсруулан батлуулсан. Тус хөтөлбөрийн хүрээнд эрүүл мэндийн анхан шатны тусламж үйлчилгээг бэхжүүлэх, агаарын чанарын хяналтыг сайжруулах, цэцэрлэгийн дотоод орчны агаарын чанарыг сайжруулах, эрчим хүчний хэмнэлттэй, хямд өртөгтэй, нүүрснээс татгалзсан шийдэл болох Монгол гэрийн дулаалга, халаалт, агаар сэлгэлтийн ЧИП багцыг нэвтрүүлэх зэрэг ажлууд амжилттай хэрэгжиж байна.
Баянхонгор аймгийн Засаг дарга Д.Мөнхсайхан амжилтад хүрэхийн тулд түншүүдийн харилцан ойлголцол, урам зориг чухал байсныг хуваалцлаа. “НҮБ-ын Хүүхдийн Сантай хамтран ажилласнаар бидний түншлэлийн харилцаа сайжирч хамтарсан санхүүжилтээр орон нутгийн хөгжлийн хөтөлбөрийг хамтран хэрэгжүүлэх боломж бий болсон. Тухайлбал, агаарын бохирдлын эсрэг олон нийт, залуучууд, салбар бүрийн төлөөллүүдийн оролцоог нэгтгэсний үр дүнд Баянхонгор аймгийн төвийн нийт гэрт амьдардаг өрхийн 10 орчим хувь буюу 500 айл ЧИП багц хэрэглэж байна. Энэ үр дүн нь иргэд цэвэр эрчим хүчний шийдэл рүү шилжиж, эрүүл мэндээ агаарын бохирдлоос хамгаалах хүсэл дүүрэн байгааг харуулж байна” гэв.
НҮБ-ын Хүүхдийн Сангийн Суурин төлөөлөгч Эваристе Коуасси-Комлан “2023-2027 оны Улс Орны Хөтөлбөрийн хүрээнд Баянхонгор аймгаар зогсохгүй Монгол Улсын хэмжээнд эрүүл мэнд, боловсрол, хүүхэд хамгаалал, уур амьсгалын өөрчлөлт, ус, ариун цэвэр, нийгмийн бодлого гэсэн 5 чиглэлээр үргэлжлүүлэн ажиллана” гэдгээ илэрхийллээ.
