ການໂຄສະນາເຜີຍແຜ່ແຄມເປນສົ່ງເສີມໂພຊະນາການຂອງແມ່, ເດັກອ່ອນ ແລະ ເດັກນ້ອຍ (MIYCN)
ແຄມເປນ MIYCN ມີຈຸດປະສົງເພື່ອສົ່ງເສີມມາດຕະຖານໃໝ່ຂອງພຶດຕິກໍາການໃຫ້ອາຫານຂອງແມ່ ແລະ ຄອບຄົວ, ປູກຝັງໃຫ້ມີຄວາມເຂົ້າໃຈຫຼາຍຂຶ້ນກ່ຽວກັບພຶດຕິກໍາທີ່ກ່ຽວຂ້ອງກັບໂພຊະນາການທີ່ດີ ແລະ ປັບປຸງຜົນໄດ້ຮັບດ້ານໂພຊະນາການສໍາລັບເດັກໃນ 1000 ມື້ທໍາອິດຂອງຊີວິດເຂົາເຈົ້າ.
- ສາມາດມີໃນ:
- English
- ລາວ
ຢູ່ໃນ ສປປ ລາວ, ການຂາດສານອາຫານຍັງເປັນສິ່ງທ້າທາຍໃນການພັດທະນາອັນສໍາຄັນທີ່ສາມາດສົ່ງຜົນກະທົບໄລຍະຍາດຕໍ່ກັບເດັກ ແລະ ຂັດຂວາງບໍ່ໃຫ້ເຂົາເຈົ້າບັນລຸເປົ້າໝາຍອັນສູງສຸດໃນຊີວິດຂອງເຂົາເຈົ້າ. ກ່ຽວກັບເລື່ອງນີ້, ສປປ ລາວ ປະເຊີນກັບ “ພາລະສາມເທົ່າຂອງການຂາດສານອາຫານ” ຂາດສານອາຫານແບບຊໍາເຮື້ອ, ຂາດຈຸລະສານອາຫານ (“ຄວາມອຶດຫິວທີ່ຊ້ອນຢູ່”), ແລະ ທ່າອ່ຽງທີ່ພົ້ນເດັ່ນຂຶ້ນຂອງພາວະນໍ້າໜັກເກີນ ແລະ ໂລກອ້ວນ.
ເພື່ອປ້ອງກັນການຂາດສານອາຫານໃນເດັກໃນທົ່ວປະເທດ, ມັນສໍາຄັນທີ່ພວກເຮົາຕ້ອງເຂົ້າໃຈຕົວກໍານົດຂອງພຶດຕິກໍາ ແລະ ການປະຕິບັດທີ່ກ່ຽວຂ້ອງກັບໂພຊະນາການ. ໃນສະພາບການຂອງ ສປປ ລາວ, ຄວາມເຊື່ອທາງດ້ານວັດທະນະທໍາບາງຢ່າງ ແລະ ຄວາມເຂົ້າໃຈທີ່ບໍ່ຖືກຕ້ອງຂອງແມ່ກ່ຽວກັບພຶດຕິກໍາກ່ຽວຂ້ອງກັບໂພຊະນາການຍັງສືບຕໍ່ຢູ່, ເຊິ່ງສາມາດມີອິດທິພົນຕໍ່ພຶດຕິກໍາການໃຫ້ອາຫານຂອງແມ່ຍິງຖືພາ ແລະ ສົ່ງຜົນກະທົບທາງລົບຕໍ່ການຢູ່ລອດ, ການເຕີບໂຕ ແລະ ການພັດທະນາຂອງເດັກເກີດໃໝ່, ເດັກອ່ອນ ແລະ ເດັກນ້ອຍ.
ສະນັ້ນ, ໜຶ່ງໃນບູລິມະສິດຂອງໂຄງການໂພຊະນາການຂອງອົງການຢູນິເຊັບ ແມ່ນເພື່ອປັບປຸງການປະຕິບັດການລ້ຽງດູເດັກອ່ອນ ແລະ ເດັກນ້ອຍ. ໂດຍກ່ຽວເນື່ອງກັບເລື່ອງນີ້, ອົງການຢູນິເຊັບ ໂດຍການສະໜັບສະໜູນຂອງສະຫະພາບເອີຣົບ ກຳລັງເຮັດວຽກຮ່ວມກັບກະຊວງສາທາລະນະສຸກ ໃນການໂຄສະນາເຜີຍແຜ່ສົ່ງເສີມໂພຊະນາການຂອງແມ່, ເດັກອ່ອນ ແລະ ເດັກນ້ອຍ (MIYCN), ເຊິ່ງມີຈຸດປະສົງເພື່ອສົ່ງເສີມມາດຕະຖານໃໝ່ຂອງພຶດຕິກໍາການໃຫ້ອາຫານຂອງແມ່ ແລະ ຄອບຄົວ, ປູກຝັງໃຫ້ມີຄວາມເຂົ້າໃຈຫຼາຍຂຶ້ນໃນຊຸມຊົນກ່ຽວກັບພຶດຕິກໍາທີ່ກ່ຽວຂ້ອງກັບໂພຊະນາການທີ່ດີ ແລະ ປະກອບສ່ວນເຂົ້າໃນການປັບປຸງຜົນໄດ້ຮັບດ້ານໂພຊະນາການສໍາລັບເດັກໃນ 1000 ມື້ທໍາອິດຂອງຊີວິດເຂົາເຈົ້າ.
ເນື່ອງຈາກຍັງມີປະເພນີທີ່ບອກສອນກັນມາແບບປາກຕໍ່ປາກຂອງສັງຄົມລາວ ແລະ ລະດັບການຮູ້ໜັງສືທີ່ແຕກຕ່າງກັນໃນຄົວເຮືອນ ແລະ ຊຸມຊົນ, ແຄມເປນ MIYCN ຈະສຸມໃສ່ການເຜີຍແຜ່ຂໍ້ມູນຂ່າວສານກ່ຽວກັບການໃຫ້ອາຫານຜ່ານສື່ກາງທີ່ມີຫຼາຍຮູບແບບເຊັ່ນ: ວິທະຍຸ, ໂທລະພາບ ແລະ ຮູບພາບ, ຄຽງຄູ່ກັບສື່ດິຈິຕອລ ແລະ ສື່ສັງຄົມອອນລາຍ ເພື່ອເຂົ້າເຖິງກຸ່ມເປົ້າໝາຍ.
ການໂຄສະນາສື່ມວນຊົນຫຼາຍຮູບແບບແມ່ນໄດ້ຮັບການແນະນຳໂດຍຍຸດທະສາດການສື່ສານເພື່ອການປ່ຽນແປງພຶດຕິ ກຳແຫ່ງຊາດ (SBCC) ກ່ຽວກັບໂພຊະນາການ, ເຊິ່ງໄດ້ຮ່ວມກັນພັດທະນາໂດຍລັດຖະບານແຫ່ງ ສປປ ລາວ ແລະ ບັນດາຄູ່ຮ່ວມພັດທະນາ, ລວມທັງສະຫະພາບເອີຣົບ, ທະນາຄານໂລກ, ອົງການຢູນິເຊັບ, ອົງການ FAO, ອົງການ WFP ແລະ ອົງການ USAID.
ຄາດວ່າການໂຄສະນາແຄມເປນດັ່ງກ່າວຈະດໍາເນີນເລີ່ມຕັ້ງແຕ່ເດືອນກັນຍາຫາເດືອນທັນວາ 2021.
ດາວໂຫລດເຄື່ອງມືເພື່ອການສື່ສານທັງໝົດ ກ່ຽວກັບໂພຊະນາການຂອງແມ່, ເດັກອ່ອນ ແລະ ເດັກນ້ອຍ