Վաղարշապատի «Հասմիկ» և «Ոստան» նախադպրոցական հաստատություններում բացվել են նոր խմբասենյակներ

ԵՐԵՎԱՆ, դեկտեմբերի 10, 2025 թ.: Դեկտեմբերի 10-ին ԿԳՄՍ նախարարի տեղակալ Արաքսիա Սվաջյանը և ՅՈՒՆԻՍԵՖ-ի ներկայացուցչի տեղակալ Սիլվիա Մեստրոնին ներկա են եղել Արմավիրի մարզի Վաղարշապատի թիվ 1 «Հասմիկ» նախակրթարանի վերանորոգված խմբասենյակի բացման արարողությանը: Համագործակցության շրջանակում խմբասենյակ է բացվել նաև Վաղարշապատի թիվ 8 «Ոստան» մանկապարտեզում: Միջոցառմանը նաև ներկա է գտնվել և ներկաներին շնորհավորել Վաղարշապատ համայնքի ղեկավար Արգիշտի Մեխակյանը:

Նոր խմբասենյակները ստեղծվել են ՅՈՒՆԻՍԵՖ-ի կողմից՝ ԿԳՄՍ նախարարության և Վաղարշապատի համայնքապետարանի հետ համագործակցությամբ և «Կրթությունը չի կարող սպասել» հիմնադրամի ֆինանսական աջակցությամբ։ Յուրաքանչյուրը նախատեսված է 30 երեխայի համար:

Ողջունելով ներկաներին՝ Արաքսիա Սվաջյանն ընդգծել է, որ միջոցառման առիթը համագործակցության լավագույն օրինակներից է. պետությունը, տեղական ինքնակառավարման մարմինը և միջազգային կառույցը՝ ՅՈՒՆԻՍԵՖ-ը, համագործակցել են՝ ապահովելով կրթության հասանելիություն, որը Կառավարության 2021-2026 թթ. ծրագրի կարևոր թիրախներից է. «Կառավարության ծրագրով և ՀՀ կրթության՝ մինչև 2030 թվականի զարգացման պետական ծրագրով մեծ տեղ է հատկացված նախադպրոցական տարիքի երեխաների կրթական համակարգում ընդգրկվածությանը: Հաստատությունների բարեկարգումն ու նոր ենթակառուցվածքների ստեղծումը միտված են կրթության որակի բարելավմանը, մանկապարտեզներ հաճախող երեխաների թվի աճին, որն ուղղված է մինչև 2030 թվականը 3-6 տարեկան երեխաների մինչև 95 տոկոս ընդգրկվածություն ապահովելու նպատակին»:

Կարևորելով նախադպրոցական ուսումնական հաստատություններում կրթության բովանդակությունը՝ նա նշել է, որ պետությունը հետևողական ջանքեր է իրականացնում այս ուղղությամբ՝ նոր ծրագրերի ներդրմամբ, մանկավարժական աշխատողների վերապատրաստումների իրականացմամբ. «Ներկա պահին ընթանում են նախադպրոցական մանկավարժների վերապատրաստման դասընթացները, որոնք նպատակ ունեն բարձրացնել մանկավարժների մասնագիտական կարողությունները: Առանց լավ մասնագետների՝ ամենալավ պայմաններ ունենալու դեպքում անգամ չենք կարող խոսել որակյալ կրթության մասին»:

«Վաղարշապատի թիվ 1 և թիվ 8 մանկապարտեզներում նորաբաց խմբասենյակները հնարավորություն կտան ավելի քան 60 երեխաների ընդգրկվել մանկապարտեզներում և ստանալ վաղ մանկական ուսումնառություն, իսկ թիվ 1 մանկապարտեզում նոր կառուցված մարզադահլիճը և բացօթյա խաղահրապարակը կընդլայնեն նրանց առողջ զարգացման և խաղի հնարավորությունները», - նշել է Հայաստանում ՅՈՒՆԻՍԵՖ-ի ներկայացուցչի տեղակալ Սիլվիա Մեստրոնին։

Սիլվիա Մեստրոնին հայտնել է, որ 2024-2025թթ․ ՀՀ կրթության, գիտության, մշակույթի և սպորտի նախարարության հետ համատեղ ՅՈՒՆԻՍԵՖ-ն աջակցել է Արարատի, Կոտայքի, Վայոց ձորի և Արմավիրի մարզերի 11 մանկապարտեզների՝ խմբասենյակները ընդլայնելու և նոր երեխաներ ընդգրկելու գործում, ինչի շնորհիվ 350 տեղահանված և հյուրընկալ համայնքների երեխաներ հնարավորություն են ստացել հաճախել նախակրթարաններ: «Այս նախաձեռնությունը նպաստում է ազգային ծրագրերին՝ ընդլայնելու վաղ մանկական ուսումնառության հասանելիությունը, ինչը երեխաների կյանքի հիմնարար առաջին քայլերից մեկն է»։

Միջոցառման ընթացքում տեղի է ունեցել նաև ՅՈՒՆԻՍԵՖ-ի և «Սիմֆոնիկ ԴասA» ծրագրի համագործակցությամբ իրականացվող «Սիմֆոնիկ հեքիաթներ» երաժշտական կրթական դասընթացը՝ նախատեսված նախադպրոցական տարիքի երեխաների համար: Ծրագիրը մշակված է երեխաներին վաղ տարիքից ծանոթացնելու դասական երաժշտությանը, նպաստելու ճանաչողական զարգացմանը, հուզական ինտելեկտի և ստեղծագործական մտածողության ձևավորմանը, հիմք դնելով ամբողջ կյանքի ընթացքում ուսումնառությանը և բազմակողմանի աճին։ Այն նաև նպաստում է երեխաների ընդհանուր հոգեսոցիալական բարեկեցությանը: