Transporti për në shkollë për fëmijët e prekur nga varfëria
UNICEF është i shqetësuar për ata fëmijë, viti shkollor i të cilëve ende nuk ka filluar për shkak të mungesës së transportit për në shkollë
- Gjendet në:
- Crnogorski
- English
- Shqip
PODGORICË, 15 SHTATOR 2023 – Fondi i Kombeve të Bashkuara për Fëmijë (UNICEF) u bën thirrje autoriteteve kombëtare dhe lokale në Mal të Zi që të sigurojnë urgjentisht transportin për në shkollë për çdo fëmijë që ka nevojë, duke garantuar kështu që të gjithë fëmijët të kenë të drejtën e tyre për arsim.
“UNICEF është i shqetësuar për ata fëmijë, viti shkollor i të cilëve ende nuk ka filluar për shkak të mungesës së transportit për në shkollë. Këta janë fëmijë të prekur nga varfëria në të gjithë vendin. Shteti i Malit të Zi ka ratifikuar Konventën e Kombeve të Bashkuara për të Drejtat e Fëmijës dhe ka obliguar veten të sigurojë që çdo fëmijë të ketë qasje në të drejtën e tij për arsim.” tha Sabina Zuniq, Përfaqësuese e përkohshme e UNICEF-it në Mal të Zi.
Ne presim që autoritetet kombëtare dhe lokale ta trajtojnë këtë çështje sa më shpejt të jetë e mundur, sepse çdo ditë pa shkollë pengon zhvillimin e fëmijëve.
Çështja e transportit për në shkollë prek kryesisht fëmijët nga komunitetet rome dhe egjiptiane dhe fëmijët në zonat rurale, veçanërisht ata që jetojnë në Malin e Zi verior, si dhe një numër të konsiderueshëm fëmijësh që po rriten në varfëri. Disa nga këta fëmijë nuk e ndjekin fare shkollimin për shkak të mungesës së transportit, ndërsa të tjerë shpesh vonohen ose duhet ta lënë shkollën herët për shkak të transportit të organizuar dobët.
Sektori privat mund të mbështesë përpjekjet e qeverisë për të rritur numrin e automjeteve për transportimin e fëmijëve në shkollë, kështu që ne gjithashtu u bëjmë thirrje atyre të krijojnë bashkëpunim me shkollat dhe autoritetet lokale dhe kombëtare përmes praktikave të tyre të përgjegjësisë sociale të korporatës.
Çështja e rregullimeve joadekuate të transportit shkollor ka prekur fëmijët në të gjithë Malin e Zi për disa vite. Analiza e Sektorit të Arsimit 2015–2020, e kryer nga UNICEF në bashkëpunim me Ministrinë e Arsimit dhe e prezantuar para publikut vitin e kaluar, identifikoi mungesën e transportit për fëmijët në shkolla si një nga barrierat për aksesin në arsim për çdo fëmijë.
Institucionet u bënë thirrje që urgjentisht ta trajtojnë këtë çështje, e cila çon që më pak fëmijë që rriten në varfëri të ndjekin kopshtin dhe shkollën fillore dhe të mesme në krahasim me bashkëmoshatarët e tyre. Kjo rezulton në arritje më të dobëta arsimore dhe një gjasë të reduktuar për të thyer ciklin ndër breza të varfërisë.
Fondi i Kombeve të Bashkuara për Fëmijët (UNICEF) bashkëpunon me qeveritë në më shumë se 190 vende dhe territore në mbarë botën për të mbështetur çdo fëmijë në qasjen e të drejtës së tyre për arsimim.
