অসমত শিশু

১৮ বছৰ বয়সৰ অনূৰ্ধ ৪১ শতাংশ জনসংখ্যা থকাৰ পৰিপ্ৰেক্ষিতত (লোকপিয়ল ২০১১), ৰাজ্য চৰকাৰখন আৰু ইয়াৰ 

অংশীদাৰসকলে শিশু আৰু মহিলাৰ কাৰণে সেৱাসমূহৰ মানদণ্ড বৃদ্ধি আৰু সহজ প্ৰাপ্তিৰদ্বাৰা সঠিক দিশত পদক্ষেপ গ্ৰহণ কৰিছে। ২০১৬ত, অসম চৰকাৰখনে বহনক্ষম উন্নয়নৰ লক্ষ্য (এছডিজি)ত উপনীত হ’বলৈ ৰোডমেপ হিচাপে “আছাম ২০৩০- আৱাৰ ড্ৰীম, আৱাৰ কমিটমেন্ট” শীৰ্ষক কৌশলী ভিজন ডুকুমেন্ট প্ৰস্তুত কৰি উলিয়াইছিল, যি লক্ষ্যৰ এটি গুৰুত্বপূৰ্ণ অংশ আছিল শিশুৰ উন্নয়ন সাধন কৰা। গ্ৰহণ কৰা বিশাল আন্তঃগাঁথনিমূলক উন্নয়নসমূহৰ দ্বাৰা ৰাজ্যখনৰ কাৰ্যক্ষমতা প্ৰদৰ্শিত হৈছে, মানদণ্ড আৰু বহনক্ষমতাৰ কাৰণেই এনে হৈছে।

শিশুৰ অধিকাৰ আৰু কল্যাণৰ অগ্ৰগতি

উপান্ত আৰু প্ৰাপ্তিৰ-বাবে-অসুবিধাৰ সন্মুখীন হোৱাসকলৰ ওপৰত বিশেষ গুৰুত্ব আৰোপেৰে, প্ৰতিটো শিশুৰ ওচৰ গৈ পোৱাত অসম চৰকাৰক ইউনিছেফে সহযোগিতা আগবঢ়াইছে।   

চৰকাৰী ব্যৱস্থাক শক্তিশালী কৰা আৰু বঞ্চিত শিশুৰ সংখ্যা হ্ৰাস কৰিবলৈ পুঁজি যোগান, সামাজিক আৰু অৰ্থনৈতিক প্ৰেক্ষাপটত গ্ৰহণ কৰা ফলপ্ৰসূ নীতিসমূহৰ অগ্ৰগতি আৰু কাৰ্যকৰীকৰণত সহযোগিতা কৰিবলৈ, বিশেষতঃ অতিশয় উপান্ত আৰু অসহায় শিশু আৰু কিশোৰসকলৰ কল্যাণৰ অৰ্থে  ইউনিছেফে অসমত ১৫ বছৰৰো অধিক সময় কাম কৰিছে। অসমৰ শিশুৰ স্বাস্থ্যৱান আৰু সমৃদ্ধিশালী বিকাশৰ অৰ্থে ইউনিছেফে ৰাজ্য আৰু ৰাজ্যৰ-বাহিৰৰ পক্ষসমূহৰ সৈতে অংশীদাৰ হৈছে। আমাৰ কামৰ লক্ষ্যসমূহৰ ভিতৰত আছে শিশুৰ সুৰক্ষা, শিক্ষা, পুষ্টি, স্বাস্থ্য, পানী, অনাময় আৰু স্বাস্থ্যবিধি (WASH) আৰু সামাজিক অন্তৰ্ভুক্তি।

এই লক্ষ্যসমূহ সফলকাম কৰি তুলিবলৈ, বহনক্ষম সমাধানসূত্ৰ নিৰ্ণয়ৰ অৰ্থে ইউনিছেফে বিস্তৃত কৌশল প্ৰয়োগ কৰিছে। আমাৰ ৰাজ্যখনত দীৰ্ঘদিনীয়া কাৰ্যসূচী ৰূপায়ণৰ অৰ্থ এয়ে যে অসমত আমাৰ আছে একক আৰু সুবিধাজনক স্থিতি, তৃণমূল স্তৰত ৰূপায়ণ আৰু বহনক্ষম নীতিৰ ৰূপৰেখা অংকন উভয়তে আছে কাৰিকৰী অভিজ্ঞতা। 

গৱেষণামূলক তথ্যৰ আহৰণ আৰু শিশুৰ কাৰণে ৰাজহুৱা নীতি গঠনত ইয়াৰ প্ৰয়োগ কৰাটো হৈ পৰিছে এটা ধাৰাবাহিক প্ৰক্ৰিয়া। চৰকাৰৰ বিভিন্ন স্তৰত বিভাগসমূহৰ সৈতে কৰা কামৰ জৰিয়তে, মহিলা আৰু শিশুৰ সমস্যাৰাজি চৰকাৰৰ কৰ্মসূচীৰ অগ্ৰাধিকাৰলৈ অনাত অসমত ইউনিছেফে এটা পৰ্যায়ভিত্তিক প্ৰচেষ্টা গ্ৰহণ কৰি আহিছে।

অসমত ইউনিছেফৰ লক্ষ্যৰ ভিতৰত পৰিয়াল আৰু সমাজৰ মাজত মানসম্পন্ন সেৱাসমূহৰ চাহিদাৰ সৃষ্টি কৰাটোও পৰে। শিশু, পিতৃ-মাতৃ আৰু সামাজিক নেতৃত্বসকলৰ সৈতে বিস্তৃত প্ৰচাৰ কাৰ্যক্ৰম আৰু কৌশলী হস্তক্ষেপৰ জৰিয়তে, শিশু উন্নয়ন প্ৰসংগসমূহত অংশগ্ৰহণ আৰু জড়িতকৰণৰ মাত্ৰা বৃদ্ধি হৈছে।                

যোৱা ১৫ বছৰে অসমত কাৰ্যসূচী ৰূপায়ণৰ জৰিয়তে ইউনিছেফে ৰাজ্যখনত একক আৰু সুবিধাজনক স্থান লাভ কৰিবলৈ সক্ষম হৈছে। ভাৰত চৰকাৰৰ দ্বাৰা চিহ্নিত উচ্চ অগ্ৰাধিকাৰমূলক জিলাসমূহত শীৰ্ষ ৰূপায়ণকাৰী অংশীদাৰ হিচাপে, ইউনিছেফে চৰকাৰ আৰু সামাজিক সংস্থাসমূহৰ সৈতে নিকপকপীয়া অংশীদাৰিত্ব স্থাপন কৰিছে আৰু অসমত শক্তিশালী উপস্থিতিৰ দিশত অগ্ৰসৰ হৈ আহিছে।

অসমত ইউনিছেফৰ ক্ষেত্ৰীয় কাৰ্যালয়ৰ কাৰণে হস্তক্ষেপৰ মূল এলেকা হিচাপে পৰিগণিত হৈছে সমগ্ৰ স্বাস্থ্য ব্যৱস্থাটোত গৱেষণামূলক তথ্য আহৰণ কৰা আৰু পথৰ কন্টক চিনাক্তকৰণৰ বাবে বিস্তৃত পাৰ্থক্য বিশ্লেষণৰ ব্যৱস্থা কৰা। যাৰ জৰিয়তে স্বাস্থ্য প্ৰণালী খণ্ডৰ ক্ষেত্ৰত মহিলা আৰু শিশুৱে স্বাস্থ্যৰ অধিকাৰ লাভ কৰিছে আৰু পাৰ্থক্য দূৰ হৈছে। 

গৱেষণালব্ধ প্ৰমাণ আৰু ক্ষেত্ৰভিত্তিক বাস্তৱিকতাৰ দ্বাৰা আহৰণ কৰা হস্তক্ষেপৰ জৰিয়তে ইউনিছেফে নীতি প্ৰস্তুত কৰাত জড়িত হ’ব পাৰিছে। ইয়াৰ সৈতে সংযোজিত হৈ আছে পুষ্টি কাৰ্যক্ৰমৰ কাৰণে বহনক্ষম নীতিৰ ৰূপৰেখা অংকনত আমি কৰা কাম, তথা তৃণমূল পৰ্যায়ত গ্ৰহণ কৰা কাৰ্যকৰী ব্যৱস্থা।

অসমৰ শিক্ষাৰ ক্ষেত্ৰখনত শীৰ্ষ অংশীদাৰ হিচাপে, সকলো শিশুৰ বাবে সঠিক-স্তৰ ভিত্তিত শিক্ষণ ফলাফলৰ সৈতে ইউনিছেফে মানসম্পন্ন প্ৰাৰম্ভিক শিশু অৱস্থা আৰু প্ৰাথমিক শিক্ষা লাভ কৰাটো সুনিশ্চিতকৰণৰ অৰ্থে লক্ষ্য নিৰ্ধাৰণ কৰিছ, বিশেষতঃ অনগ্ৰসৰ সকলৰ ক্ষেত্ৰত। আমাৰ কামৰ লক্ষ্য হিচাপে অন্তৰ্ভুক্ত হৈছে সকলো স্তৰতে শিক্ষাব্ৰতীসকলক সামথ্যৱান কৰি তোলা, সঠিক আৰু উদ্ভাৱনীমূলক পাঠ্যক্ৰম আৰু শিক্ষণ প্ৰণালী প্ৰস্তুত কৰা, আন্তঃ-আৰু অন্তৰ-কাৰ্যক্ৰম সহযোগিতা আৰু জনসাধাৰণৰ অংশগ্ৰহণ সুনিশ্চিত কৰা। বিশেষতঃ কন্যা শিশুকে ধৰি উপান্ত শ্ৰেণীটোৰ কাৰণে, সমাজ আৰু সুবিধা স্তৰত বহনক্ষম, সুৰক্ষিত আৰু ব্যয়সাধ্য ডব্লিউএএছএইচ সেৱাসমূহৰ সমতুল্য প্ৰাপ্তিৰ অৰ্থে ইউনিছেফে ৰাজ্য চৰকাৰ আৰু সামাজিক সংগঠনসমূহৰ সৈতে ঐকান্তিকভাৱে কাম কৰি আহিছে। 

সামাজিক আৰু চাৰিত্ৰিক পৰিৱৰ্তনৰ লগতে নিগমবদ্ধ আন্তঃগাঁথনিমূলক উন্নয়নৰ কাৰণে কাম কৰিবলৈ ৰূপৰেখা অংকন কৰাটোও আমাৰ সহযোগিতাৰ ভিতৰতে পৰে।

অসমত শিশু সুৰক্ষাৰ ক্ষেত্ৰখনত প্ৰতিষ্ঠিত কাৰিকৰী বিশেষজ্ঞ হিচাপে, শিশু সুৰক্ষা প্ৰণালীৰ উন্নয়ন সাধন, ৰাজহুৱা বিত্তীয় ব্যৱস্থাৰ শক্তিশালীকৰণ, শিশু সুৰক্ষাৰ দায়িত্বত থকাসকলৰ সামথ্য বৃদ্ধি কৰা, সু-শাসন আৰু দায়বদ্ধতাৰ ক্ষেত্ৰত মাত মতা, প্ৰগতিশীল নীতিৰ সিদ্ধান্ত গ্ৰহণৰ অৰ্থে তথ্য আৰু প্ৰমাণ আহৰণ কৰা, আৰু সংবিধিবদ্ধ সংস্থা আৰু শিশু সুৰক্ষা সেৱাসমূহৰ মাজত সহযোগিতা বৃদ্ধিৰ অৰ্থে ইউনিছেফে বিভিন্ন চৰকাৰী বিভাগ আৰু সামাজিক সংস্থাসমূহৰ সৈতে কাম কৰি আহিছে।