سنوات الطفولة المبكرة فترة مليانة بالحب والمرح، بس ما بتتخيّلوا قديه بتمر بسرعة! خلال هاي المرحلة، بتتغير احتياجات الأطفال بشكل كبير، عشان هيك لازم الأهل يكونوا داعمين لنمو الطفل بشكل صحي وسليم. لازم نفهم التغيرات اللي بتصير في جسم وعقل الطفل في كل مرحلة من مراحل نموه. مع تقدم الطفل، بيبدأ يكتسب مهارات وقدرات جديدة، وهالشي بيأثر على حياته المستقبلية.
في السنة الأولى من حياة الطفل، بتشوف تطورات واضحة مثل المشي والكلام، مع زيادة الوزن والطول، لكن في تغييرات تانية ما بتكون دايمًا ظاهرة زي التطور العقلي والعاطفي، وهاي التغييرات المخفية أبداً ما بتقل أهمية عن التغييرات الظاهرة. ولازم نركز على جميع جوانب نمو الطفل، سواء كانت واضحة أو مخفية.
طريقة لعب الطفل، تصرفاته، وطريقة تفاعله مع الناس بتعكس تطوره.
معالم النمو هي السلوكيات والمهارات اللي بنشوفها في أعمار معينة عند معظم الأطفال، وهي مراحل بيمر فيها كل الأطفال تقريبًا. هاي المعرفة بتساعدنا نعرف إذا كان تطور الطفل طبيعي أو بحاجة لدعم إضافي.
هناك مجالات عدة لتطور الطفل ومنها:
مفاهيم أساسية عن تطور الطفل:
التطور الشمولي يعني دعم نمو الطفل من جميع النواحي: الجسدية، المعرفية، العاطفية والاجتماعية، من يوم ما يولد لحد ما يوصل للبلوغ.
كل جوانب التطور مرتبطة ببعض. إذا تطور جزء من نمو الطفل، بيأثر على باقي الجوانب.
كل مرحلة بتعتمد على اللي قبلها وبتأثر في اللي بعدها.
وكل مرحلة إلها أهميتها وقيمتها الخاصة.
أي تأخير في مرحلة معينة بيأثر على باقي المراحل.
مرحلة الطفولة المبكرة من عمر سنة إلى 3 سنوات
في هاي المرحلة، الطفل بيبدأ يصير أكثر استقلالية، ومع هيك بيظل يحب يرجع لحضن أهله. هاي الفترة مليانة حركة واكتشافات، ولهيك لازم الأهل يكونوا مستعدين ليتعاملوا مع هاي التغيرات.
بتتطور لدى الأطفال مجموعة من المهارات والقدرات في مراحل عمرية مختلفة، من المهم أن ندرك أن كل طفل فريد بذاته، ومن الطبيعي أن تختلف سرعة التطور من طفل لآخر. يمكن يمشي أحد الأطفال قبل الآخر، أو يبدأ بالكلام في وقت أبكر، وهذا أمر شائع وما بيدعو للقلق.
كل الأطفال بيطوّرا مهارات جسدية وعقلية ولغوية وانفعالية واجتماعية ضمن مراحل عمرية معينة، بس بعضهم يمكن يحتاج وقت أطول للوصول إلى معالم معينة، بينما بيوصل إلها التانين بسرعة أكبر فلا تقلقوا إذا تأخر طفلكم عن شغلة معينة، هذا جزء من الفروقات الفردية الطبيعية. من المهم أنه يميز الأهل بين هذه الفروقات وبين التأخر النمائي.
لهيك لازم الأهل يتعرفوا على سمات النمو لكل مرحلة ويتعلموا كيف يتعاملوا مع أي تأخر نمو
سمات النمو والتطور من عمر سنة إلى سنة وثلاثة أشهر(12-15 شهر)
| نموي الجسدي وتطوري الحركي | كيف بتقدروا تدعموني! |
| هلأ بقدر أمشي مسافات أطول من غير مساعدة وبقدر أتحكم أنه ما أوقع. | تأكدوا أنه عندي مساحة آمنة وكبيرة شوي لأقدر أتحرك فيها وأستكشف، وعادي لو وقعت ورجعت وقفت أكتر من مرة. |
| بقدر أركض بس بصعوبة شوي وبطلع بعيني عالأرض. عشان هيك تأكدوا أني بركض بمساحة آمنة. | |
| بقدر أمسك كاسة مي وأشرب لحالي من غير مساعدة. | اسمحولي أحاول لحالي حتى لو وقعت ووسخت ملابسي، أنا هيك عم أتعلم. |
| بقدر أعمل حركات دقيقة بأصابعي بس العب بأشياء فيها كبسات وأزرار مثلاً. | وفروا لي ألعاب بسيطة مثل العجين لتقوية عضلاتي الصغيرة. |
| تطوري العقلي والمعرفي | كيف بتقدروا تدعموني! |
| بقدر أتعرف على الأشياء والأشكال الموجودة في كتاب الصور. | اسألوني أسئلة لما نقرأ مع بعض. |
| صرت أدور على الأشياء اللي بتغيب عن عيوني زي الدباديب أو السيارات الموجودة في صندوق الألعاب. | العبوا معي لعبة تخبوا الألعاب وندوّر عليها مع بعض. |
| أنا بحل المشكلات عن طريق المحاولة والتكرار، زي لما بحاول أحط الأغطية المناسبة على العلبة. | العبوا معي لعبة الأحاجي. |
| أنا بستكشف المكان عن طريق تجربة السبب والنتيجة (يعني برمي الأشياء دايماً زي الأكل عشان أشوف شو رح يصير). | أعطوني ملعقة واتركوني أحاول آكل لحالي زي صحن الرز. وما تزعلوا لو وسّخت أواعيي! |
| بقدر أشير على جزء واحد من جسمي على الأقل. | علموني أسماء أعضاء جسدي من راسي لرجليي. |
| يمكن ببيّن أناني أوقات وما بفكر إلا بحالي. | طولوا بالكم عليي! وعلموني كيف أصير أحس بغيري وأشارك معكم دايماً. |
| تطوري اللغوي | كيف بتقدروا تدعموني! |
| أنا بستخدم إيماءات كتير عشان تِفهموا شو بدي (رح أشير على اللعبة اللي على الرف). | أعطوني الوقت اللي بحتاجه لأحكيلكم شو بدي، بعدين صححولي الكلام (”نعم، هاي طابة!) |
| بنادي على "ماما" أو "بابا" بشكل واضح. | توصلوا معي دايماً! |
| بستخدم الكلمات "مرحبا" وباي" و"لو سمحت" لمّا تذكروني فيهم. | علموني كلمات سهلة زي مرحبا، باي، شكرا. |
| بهز براسي وبقول "نعم" و"لا" وأنا فاهم شو بحكي. | حاولوا تأكدولي الكلام اللي بحكي عن طريق الوصف. |
| تطوري الاجتماعي والانفعالي | كيف بتقدروا تدعموني! |
| بقدر ألعب بعيد عنكم من 5 إلى 10 دقائق. بس مهم تتأكدوا من سلامتي كل شوي. | اعملولي روتين يومي لأقدر ألعب لحالي بس أكيد خلّوا عيونكم عليي! |
| بقدر ألعب مع أطفال الآخرين لفترات قصيرة. | ساعدوني أندمج وألعب مع الأطفال. |
| بضحك على الأفعال المضحكة (زي لبس الصحن على الراس كإنها طاقية). | قدمولي أشياء جديدة، زي الطاقية، واسألوني "شو بنعمل بالطاقية؟ بنحطها على راسنا." وكرّروا هاي الأشياء عشان أتعلم أكتر. |
| بتوتر بس أبعد عن ماما وبابا. | احرصوا دايماً إنكم تودعوني لمّا تروحوا، واحكولي "مع السلامة" عنّا مشوار بنخلص وراجعين عندك، احكولي بوضوح وبس تروحوا احكولي "هينا رجعنا"، أنا هيك بحس بالأمان وبصير أفهم أكتر شو بصير حواليي. |
| بزعل كتير لمّا ما يصير الإِشي اللي بدي ياه. | ساعدوني أعبر عن مشاعري واسميها بوضوح (زي: أنا حزين، معصب، محبط، مبسوط) باستخدام كلماتك وتعابير وجهك ونبرة صوتك لتفهموني أنا شو حاسس. مثلاً، بتقدر تقلي: "إنت هلأ زعلان لإنه ما راح نروح عالمول، بس ما بصير تضرب خلّينا نفكر شو ممكن نلعب مع بعض إشي بالبيت عشان تروق". |
سمات النمو والتطور من سنة وثلاثة أشهر الى سنة ونصف (15 – 18 شهر)
ماما وبابا- شوفوا شو بقدر أعمل! وتذكروا أنه مش كل قدراتي مذكورة هون، هي بعض الأمثلة المهمة بس!
| نموي الجسدي وتطوري الحركي | كيف بتقدروا تدعموني! |
| بقدر أمشي وأركض وبحاول أتسلق كتير أماكن! تأكدوا من سلامتي في هذه المرحلة. | خصيصوا إلي شوية وقت عشان أركض برّا البيت براحتي وبمكان آمن. |
| أنا بتحرك كتير ويمكن أروح على أماكن ممنوع أروح عليها. | تذكروا! إني بحب استكشف كل شي، ومهم تضلكم مراقبيني! وما تعصبوا عليي لإني ما بعرف إذا الأماكن اللي بروح عليها أمان أو لأ. |
| بقدر أمسك الألوان الشمعية الكبيرة لحالي. | وفرولي فرصة ومكان للتلوين والرسم! |
| تطوري العقلي والمعرفي | كيف بتقدروا تدعموني! |
| بحب أعمل الإشي مرة ومرتين زي فتح وإغلاق أغطية العلب، هاد بيساعدني أتعلم كيف اربط بين الأشياء. | خلّوني أكرر حركاتي! أنا بتعلم بهالطريقة. |
| بحب ألعب بالأشياء اللي فيها إحساس زي اللعب بالرمل. | تأكدوا إنكم تشاركوني في كتير أنشطة حسية زي اللعب في الرمل والمي. |
| بقدر أحط مكعبين أو أكتر فوق بعض. | شجعوني العب بالمكعبات. خلّوني أبني بيت كبير بعدين أفكه. |
| تطوري اللغوي | كيف بتقدروا تدعموني! |
| رح أحاول أتواصل معكم من خلال تعبيرات وجهي وكلمات بسيطة. | علموني التعابير المناسبة للمشاعر المختلفة (مبسوط، زعلان، غاضب، خايف) من خلال تسمية مشاعري ومشاعر الآخرين. |
| رح أقدر أتبع تعليمات وطلبات بسيطة، زي: "جيب صحنك". | احكوا معي وجهاً لوجه وحاولوا تنزلوا لمستوى عيوني كل ما كان ممكن. هذا رح يساعدني أفهم اللي بتقولوه من خلال تعابير وجهكم. |
| بحب أقرأ الكتب، وهذا بيساعدني أطور مخزون الكلمات عندي. | تذكروا تطفوا التلفزيون والأجهزة الإلكترونية، وتحكوا معي، نقرأ ونغني مع بعض! |
| تطوري الاجتماعي والانفعالي | كيف بتقدروا تدعموني! |
| بدي أعمل كتير شغلات لحالي، بس لساتني بحاجة الكم انتو مرجع الأمان بالنسبة إلي. | خلّوني أعمل المهام لحالي بس تحت مراقبتكم. |
| ممكن أتأثر بالأطفال التانين إذا شفتهم عم يبكوا. قدرتي على تطوير التعاطف مع التانيين مهمة كتير لتطوري العاطفي. | ساعدوني أعرف مشاعر التانيين وكيف نتفاعل معهم بشكل إيجابي. مثلاً، لما نشوف طفل حزين، احكولي: "شكله زعلان. يلا نلعب معو بلكي بطل زعلان" |
| نوبات الغضب طبيعية بهاي المرحلة من عمري، تذكروا إني بكون بحاحتكم بس أكون زعلان أو متدايق! | اصبروا عليّ- لساتني بتعلم كيف أتعامل مع هذه المشاعر الصعبة! (للمزيد من المعلومات عن نوبات الغضب اضغط هنا) hyper link to tantrums |
نوبات الغضب في مرحلة الطفولة المبكرة:
• نوبات الغضب جزء طبيعي وأساسي من تطور الطفل العاطفي.
• الأطفال في مرحلة الطفولة المبكرة لسه بيطوروا قدراتهم في التفكير المنطقي، ولسه عم يتعلموا كيف يسيطروا على مشاعرهم.
• من المهم نتعامل مع هاي المرحلة بشكل صحيح، لأنو ممكن تخلق تحديات في التحكم بالعواطف مستقبلاً.
• نوبات الغضب هي فرصة لنعلّم الأطفال مهارات التحكم الذاتي، اللي بتساعدهم يعرفوا ويفهموا مشاعرهم ويتعاملوا معها بشكل أفضل، وهالشي رح يقلل من الانفجارات العاطفية وبيحسن قدرتهم على التعامل مع الإحباط أو خيبة الأمل.
كيف نتعامل مع نوبات الغضب:
الوقاية:لازم نكون حريصين ونلاحظ إشارات الطفل الجسدية، يعني لو كان تعبان أو جوعان أو غاضب، لازم نلبي احتياجاته ونحكي معه بهدوء.:
التعامل مع نوبة الغضب من خلال:
• نتعاطف مع الطفل ونحكي معه عن مشاعره، مثلا: "بفهم إنك زعلان لأنك لازم تترك منطقة اللعب هلأ، بس لازم نروح عالبيت وناكل، ووعد مني رح نلعب في البيت."
• نساعد الطفل يمر بالنوبة، بعض الأطفال ممكن يحتاجوا عناق، والبعض الآخر ممكن يحتاجوا إننا نتركهم لحظة، بس نضل قريبين منهم جربوا التنين لتعرفوا طفلكم من أي نوع.
• نوجه انتباههم لشيء تاني، مثلا نجيبلهم لعبة أو نشاط يعجبهم لنبعدهم عن النوبة.
السمات المقلقة لنوبات الغضب:
• السلوك العدواني زي الضرب أو العض بشكل متكرر.
• إيذاء الذات.
• النوبة تستمر أكثر من 15 دقيقة.
• النوبات المتكررة (أكثر من 5 مرات في اليوم).
• عدم القدرة على تهدئة النفس.
إذا لاحظت أي من هاي الأعراض، لازم تستشير مختصين مثل طبيب الأطفال أو أخصائيي الطفولة المبكرة.
سمات النمو والتطور من سنة ونصف الى سنتين
ماما وبابا- شوفوا شو بقدر أعمل! وتذكروا أنه مش كل قدراتي مذكورة هون، هي بعض الأمثلة المهمة بس
| نموي الجسدي وتطوري الحركي | كيف بتقدروا تدعموني! |
| بقدر آكل بالملعقة لحالي! | حاولوا ما تعملوا كل شيء عني؛ عشان تقوّوا استقلاليتي وقدرتي على حل المشكلات بس لما أعمل الأشياء لحالي كونوا معي لتتأكدوا من سلامتي. |
| بساعدكم لما تغسلّوا إيدي! | احكوا معي أو غنوا عن اللي عم تعملوه. زي، مثلا: "ماما عم تغسل إيدك هلأ" أو غنوا: "هيك منغسل إيدينا، منغسل إيدينا." |
| بحب أفتح الخزانات والأدراج، تذكر إنني كتير فضولي. مهم تتأكدوا إنني بكتشف الأشياء بطريقة آمنة. | وفّرولي الأمان ابعدوا كل الأشياء الخطيرة عني. إذا شفتوني بلعب بالأشياء الخطيرة اللي مش لازم ألمسها، حاولوا تشتتوا انتباهي بسرعة وتعطوني لعبة تانية أو تخلوني أروح لمكان تاني. خلي كلمة "لا" مخصصة للسلوكيات الخطيرة. وما تتعاملوا معي بالصراخ. |
| بقدر أطلع الدرج بدون مساعدة، بس مهم تراقبوني. | العبوا معي برّا البيت واسمحولي أتسلق أشياء بسيطة أو أطلع وأنزل الأدراج براحتي. |
| بقدر أمسك قلام التلوين وأخربش أي مكان! | خلينا نقعد نلون ونرسم مع بعض بمكان مخصص ورجيني كيف أعمل خطوط وأشكال. |
| تطوري العقلي والمعرفي | كيف بتقدروا تدعموني! |
| بقدر أشير على عيني أو أذني أو أنفي لما تطلبوا مني. | علموني أسماء أعضاء الجسم من خلال الغناء والإشارة إلها: "هاي أنفك، هاي أنفي" وحطوا أيدكم عليهم لحتى أعرفهم . |
| صرت أفهم اذا انتوا راضين عن تصرفاتي أو لأ | استخدموا كلمات إيجابية وامدحوني لما أتصرف بشكل صح، مثلاً احكولي: "شوف كيف حطيت اللعبة بمكانها، برافو!" |
| بقدر أساعدكم لما تغيرولي أواعيي. | شجعوني إني أختار وألبس أواعيي لحالي. |
| لعبة الغميضة (الاختباء) من ألعابي المفضلة! وكمان بتعلم منها الأدراك أنه لما ما أكون شايف الأشياء، مش يعني إنها مش موجودة. | العبوا معي وخبوا الألعاب وشجعوني أدوّر عليهم. |
| عم بتعلم كتير لما أقلدكم أو أقلد الأطفال التانيين. | كونوا واعيين لكلماتكم وتصرفاتكم قدامي، وتذكروا إني بتعلم منكم، وبقلدكم . |
| تطوري اللغوي | كيف بتقدروا تدعموني! |
| بستمر باستخدام الإيماءات و"حديث الأطفال" عشان أتواصل (مثلاً: بأشر على الكلب وبحكي "عو"). | شجعوني وساعدوني على تسمية الأشياء وتكرار عبارات معينة. |
| بقدر أعبّر عن رغباتي ومشاعري, مثلا بقدر أحكي ("بدي كيكة"). | شجعوني أني أعبّر عن رغباتي ومشاعري المختلفة واسمعوا شو بدي. |
| بدندن أو بحاول أغني. | خلّونا نغني مع بعض! هاد الإشي بيساعدني على تطور دماغي وتنمية مهاراتي الإدراكية. |
| تطوري العقلي والمعرفي | كيف بتقدروا تدعموني! |
| بقدر أتحمل التغيير في روتيني اليومي وبيئتي من دون ما اتضايق. | احكوا معي وساعدوني أكون جاهز لأي تغيير ممكن يصير بحياتي. |
| بحب أقلد ماما وبابا! | كونوا منتبهين لتصرفاتكم قدامي وخلّوني أشارككم في عمل الشغلات البسيطة. |
| ممكن أتصرف بخجل قدام الناس اللي ما بعرفهم. | تقبّلوا مشاعري المختلفة (زي الخجل) وما تعاتبوني، وساعدوني أهدى لما أحتاج. ساعدوني أتأقلم مع الأماكن الجديدة وأتعامل مع الناس الجداد. |
| ببادر باللعب والابتسام والتواصل البصري مع الأطفال أو الكبار. | خلّوني ألعب مع أطفال تانيين، بالحديقة أو بالمكتبة. اللعب مع غيري بساعدني أتعلم قيمة المشاركة والصداقة. |
| بقدر أشغل حالي لمدة 15 دقيقة إذا كان في شخص كبير قريب مني، و10 دقائق لحالي. | وفّرولي فرص لـ "اللعب الحر"، عشان أقدر أكتشف اهتماماتي وأجرب أشياء جديدة. |
| بغضب أحياناً وبيجيني نوبات غضب (للمزيد من المعلومات عن نوبات الغضب اضغط هنا). وكمان بفهم معنى كلمة "لا"، بس لساتني بحاجة للمساعدة عشان أتحكم بمشاعري لما ما أقدر أعمل شي. | اهتموا بمشاعري وأوصفوها: "بعرف إنك زعلان لأننا رح نروّح من الحديقة. ما في مشكلة إنك تحس بالغضب. أنا هون معك عشان أساعدك." |
مؤشرات التأخر (من سنة إلى سنتين):
• كل طفل هو شخص مميز وفريد
• طبيعي يكون في اختلاف بمعدلات تطوّر الأطفال
• إذا كنت مش متأكد إذا فيه تأخر نمو، لازم تتصرف بسرعة
• التصرف المبكر بساعد في:
تحديد إذا فيه مشكلة أو لأ.
تحديد المشاكل المحتملة وتجنبها.
من المهم إنك تتخذ خطوات مبكرة لدعم الطفل وتحكي مع الطبيب إذا كنت:
ما بحكي جمل مكونة من كلمتين ("هاي لعبتي").
مفرداتي ما بتكون من 5 إلى 10 كلمات (لما أوصل سنة و3 شهور).
ما بقدر أحكي بين 15-20 كلمة (لما أوصل سنة و6 شهور).
ما بقدر أحكي بين 40-50 كلمة وبستخدم جمل من كلمتين لثلاث كلمات (لما أوصل سنتين).
ما بقدر أتبّع تعليمات بسيطة.
ما بقلد تصرفات أو بكرر كلمات.
ما بمشي بشكل ثابت، وما بقدر أدفع الألعاب اللي فيها عجلات.
بنسى مهارة كنت بعرفها من قبل.
سمات النمو والتطور من سنتين الى ثلاث سنوات
| نموي الجسدي وتطوري الحركي | كيف بتقدروا تدعموني! |
| بلّشت أستخدم إيدي اليمين أو اليسار أكتر من التانية. | خلّوني استخدم الإيد اللي برتاح عليها أكتر. |
| بقدر أستخدم الحمام مع شوية مساعدة. | اصبروا عليّ وأنا عم بتعلم هاي المهمة الصعبة، وما تعاتبوني وتعصبوا علي إذا أخطأت. |
| بقدر أرمي الكرة الكبيرة وبجرب أمسكها أو أشوطها. | أعطوني كرات ووفرولي مكان علشان أشوطها، أو أدحرجها، أو أرميها. |
| بقدر ألبس حذائي (بس ما بقدر أربط رباطه). | خلّوني ألبس أواعيي لحالي مع مساعدتكم إذا كنت بحاجة، وخلّوني أختار على ذوقي الألوان أو شو ألبس. |
| بقدر ألبس أواعيي لحالي بشوية مساعدة. | |
| بقدر أطلع على الدرج درجة درجة باستخدام رجليي بالتناوب، يعني مرة برجلي اليمين ومرة برجلي الشمال. | خلّوني أتسلق أماكن مش عالية وأطلع وأنزل الأدرارج وألعب، بس راقبوني. |
| تطوري العقلي والمعرفي | كيف بتقدروا تدعموني! |
| بتذكر شو صار مبارح. | شجعوني على التفكير المنطقي خلال روتيننا اليومي، اسألوني مثلاً: "شو بنسوي قبل ما ننام؟ بنفرشي أسنانّا " |
| بعرف شوية الأرقام (بس مش دايماً بحكيهم بالترتيب الصح). | إلعبوا معي ألعاب العد، زي لما نعد على أصابعنا "واحد، اثنين، ثلاثة..." وأنا بشير لأصابع إيدي أو أصابع رجلي. |
| بقدر أتصفح كتاب لحالي. | اسألوني أسئلة بسيطة عن الكتب والقصص. ممكن تسألوني: "مين هدول؟"، "شو عملوا؟"، و"وين راحوا؟" عشان تساعدوني أفكر. |
| بقدر أجمع الأشياء اللي إلهم نفس الوظيفة مع بعض، زي لما أحط الأكواب والصحون مع بعض. | خلوّني أساعدكم في تجهيز الوجبة، زي لما أحمل أشياء للطاولة زي الكاسات البلاستيكية أو المحارم. |
| بقدر أتبع بعض القوانين البسيطة أو الطلبات اللي بتحتاج خطوة وحدة، زي: "حط الصحن على الطاولة." | دوروا على طرق لحتى أشارك في الأنشطة اليومية. مثلا خلوني أحط الجرابات جوّا السلة. |
| خيالي لسا عم يتطور. ممكن أحتاج مساعدة أحيانًا لحتى أفرق بين الأشياء الحقيقية والخيالية. يعني ممكن أخاف أحيانًا، وهاد إشي طبيعي. | أعطوني ألعاب أو أشياء تشجعني على استخدام خيالي، زي ملابس تنكرية للعب، أو طناجر للطبخ عشان أمثل خطوات الطبخ، أو مكعبات عشان أبني أشكال مختلفة. |
| تطوري اللغوي | كيف بتقدروا تدعموني! |
| بستخدم عبارات مكونة من 3 إلى 5 كلمات. | شجعوني على تسمية الأشياء وتكرار عبارات معينة. |
| بسأل أسئلة صغيرة بتبدأ بـ"مين، شو، وين". | شجعوني على "سرد القصص" معكم أو تكملة القصة لمّا نقرأها مع بعض. |
| بطلب منك (بالحكي) إني أستخدم الحمام في كل مرة بحتاج فيها تقريباً. | شجعوني أعبّر عن احتياجاتي الجسدية وامدحوني لمّا احكيلكم إني بدّي أروح على الحمّام. |
| تطوري الاجتماعي والانفعالي | كيف بتقدروا تدعموني! |
| بقدر أعبر عن مشاعري. | ساعدوني في فهم مشاعري وهدّوني وتتعاطفوا معي لما أكون منزعج. |
| بحس بالذنب لما حدا يشوفني وأنا بعمل إشي غلط. | حطوا قواعد بسيطة وواضحة أقدر أتبعها، زي استخدام إيدي شوي شوي وأنا بلعب أو ما أنط من مكان عالي. علّمني الطريقة الصح بدون ما تعصبوا عليي. |
| بلعب بشكل عفوي وطبيعي مع طفلين أو ثلاثة في مجموعة (بعمر 3 سنين تقريباً). | شجعوني على اللعب مع أطفال تانين، هاد الإشي بساعدني أتعلم قيمة الصداقة وكيف أتفاعل وانسجم مع الناس. |
| بحس إنه كل شيء حواليي مرتبط فيني، ومش قادر آخذ وجهات نظر الناس التانية بعين الاعتبار – هون بتصير المشاركة صعبة بالنسبة إليّ، زي لما ما بقدر أشارك انتباه أمي مع أختي الصغيرة. | كونوا صبورين معي عشان أتعلم عن مشاركة الأشخاص والأشياء وتقبلها. |
| بحس بالإرهاق لما أحس بمشاعر مش قادر أعبّر عنها. | استمروا في وصف المشاعر لحتى أفهمها أكتر وأقدر أوصل اللي حاسس فيي. |
| بقلدكم في شغل البيت أو بساعدكم في المهام البسيطة. | خلّوني أساعد في تحضير الوجبات عن طريق إعطائي مهام بسيطة، زي غسل الفواكه والخضروات أو التحريك. |
مؤشرات التأخر (من سنتين لثلاث) :
• كل طفل هو طفل مميز وفريد.
• من الطبيعي الأطفال يتطوروا بمعدلات مختلفة.
• لازم نتصرف بسرعة إذا كان عنّا شكوك بأي تأخر نمائي.
• التصرف المبكر بيساعد في:
• تحديد إذا في مشكلة أو لا.
• تحديد المشاكل المحتملة ومنعها.
من المهم نتخذ إجراءات سريعة لدعم الطفل ونحكي مع الطبيب إذا:
ما قلدت التصرفات أو الكلمات بعد ما أكمل عمر 3 سنين.
بتكلم بشكل غير واضح أو ما بقول جمل أو ما بفهم التعليمات البسيطة.
ما بقدر أطلع الدرج أو أنزل.
ما بعمل تواصل بصري معكم.
ما بعمل ألعاب ظاهرية أو ألعاب خيالية.
عندي ضعف في المهارات الحركية الدقيقة (مثلاً ما بقدر أمسك معلقة).
ما بقدر أستخدم حوالي 900 كلمة (بحلول عمري 3 سنين).
بنسى مهارة كنت بعرفها من قبل