Körpənizin qidalanması: 6–12 ay
Körpəniz bu yaşında həyatının digər dövrləri ilə müqayisədə daha çox enerji və bəsləyici maddələrə ehtiyac duyur.
- Available in:
- English
- Azərbaycanca
Körpə uşaqlar sağlam, güclü və ağıllı böyümək üçün hər gün kifayət qədər bəsləyici qidalarla qidalanmalıdır. Təxminən 6 aylıq körpəniz sürətlə böyüyür və həyatının digər dövrləri ilə müqayisədə daha çox enerji və qidalı maddələrə ehtiyac duyur.
Qısaca: 6-12 aylıq körpənizin qidalanması
6 ayın sonunda ana südü hələ də körpənizin əsas qida və enerji mənbəyi hesab edilir, lakin bu dövrdən etibarən onun qida rasionuna bərk qidalar da əlavə edilməlidir.
Körpənizin mədəsi kiçik olur və onun gün ərzində tez-tez az miqdarda yumşaq bəsləyici qidaya ehtiyacı olur.
Taxıl və kök yumrularına əlavə olaraq, körpənizi hər gün müxtəlif qidalarla - xüsusən də heyvan mənşəli məhsullar (süd, yumurta, ət, balıq və quş əti), meyvə və tərəvəzlərlə bəsləyin.
Ana südü 6 aylıq körpə üçün mühüm qida mənbəyi olmağa davam edir; lakin təkcə ana südü artıq kifayət etmir. Ona görə də indi körpənizin artan ehtiyaclarını qarşılamaq üçün ana südündən əlavə, onu bərk qida ilə da bəsləməyə başlamalısınız.
Körpənizin əmizdirilməsinin mümkün qədər çox davam etməsi üçün körpənizə ilk qidaları ana südü ilə qidalandırdıqdan sonra və ya əmizdirmələr arası verməyə çalışın.
Körpənizi bərk qida ilə bəsləməyə başlayanda onun xəstələnməməsi üçün xüsusi diqqət yetirin. O, iməkləyərək ətrafı araşdırdıqca mikroblar onun əllərindən ağzına keçə bilər. Yemək hazırlamazdan və hər qidalandırmadan öncə özünüzün və körpənizin əllərini sabunla yuyaraq körpənizi xəstələnməkdən qoruyun.
Körpənizin ilk qidası
Körpəniz 6 aylıq olanda o, yenicə çeynəməyi öyrənir. Onun ilk yeməkləri sıyıq və ya yaxşı əzilmiş meyvə və tərəvəzlər kimi yumşaq olmalıdır ki, udmaq çox asan olsun. Sıyıq çox sulu olduqda, tərkibindəki bəsləyici maddələrin elə də çox olmadığını bilirdinizmi? Onu daha da bəsləyici etmək üçün qaşıqdan axmayacaq dərəcədə qatılaşana qədər bişirin.
Körpənizin ac olduğuna dair əlamətləri gördükdə, məsələn, əllərini ağzına aparanda onu qidalandırın. Əllərinizi yuduqdan sonra körpənizə gündə iki dəfə yalnız iki-üç qaşıq yumşaq yemək verməklə başlayın. Bu yaşda onun mədəsi kiçik olduğundan hər yeməkdə o, yalnız az miqdarda yeyə bilir.
Yeni yeməyin dadı körpənizi təəccübləndirə bilər. Ona bu yeni yeməklərə və ləzzətlərə alışması üçün vaxt verin. Səbirli olun və körpənizi yeməyə məcbur etməyin. Onun doyduğunu göstərən əlamətləri izləyin və bundan sonra onu qidalandırmağı dayandırın.
Körpəniz böyüdükcə onun mədəsi də böyüyür və o, getdikcə daha çox yemək yeyə bilir.
Körpənizin qidalanması: 6–8 ay
6-8 aydan etibarən körpənizi gündə iki-üç dəfə yarım fincan yumşaq yeməklə qidalandırın. Körpəniz baldan başqa hər şeyi yeyə bilər, balı isə bir yaşına qədər yeməməlidir. Yeməklər arası meyvə püresi kimi sağlam bir qəlyanaltı da əlavə etməyə başlaya bilərsiniz. Körpəniz artan miqdarda bərk qida qəbul etməyə başlasa da, o, eyni miqdarda ana südü almağa davam etməlidir.
Körpənizin qidalanması: 9–11 ay
9-11 aydan etibarən körpəniz gündə üç-dörd dəfə yarım fincan yemək və sağlam qəlyanaltı qəbul edə bilər. İndi yumşaq yeməyi əzmək əvəzinə onu kiçik parçalara ayırmağa başlaya bilərsiniz. Körpəniz hətta barmaqları ilə də yemək yeməyə başlaya bilər. Körpəniz ac olduqda onu əmizdirməyə davam edin.
Hər yemək həm körpənizin yeməsi üçün asan, həm də bəsləyicilərlə zəngin olmalıdır. Hər bir dişləyin faydalı olmasını təmin edin.
Qidalar enerji və bəsləyici maddələrlə zəngin olmalıdır. Taxıl və kartofdan əlavə, körpənizin hər gün tərəvəz və meyvələr, paxlalılar və toxumlar, bir az enerji ilə zəngin yağ və xüsusilə də heyvan mənşəli qidalarla (süd məhsulları, yumurta, ət, balıq və quş əti) qidalandığından əmin olun. Hər gün müxtəlif yeməklərlə qidalanmaq körpənizə ehtiyac duyduğu bütün bəsləyici maddələri almaq imkanı verir.
Körpəniz yeni yeməkdən imtina edərsə və ya ağzından çıxararsa, onu məcbur etməyin. Bir neçə gün sonra yenidən cəhd edin. Siz həmin yeməyi körpənizin bəyəndiyi başqa bir qida ilə qarışdırmağa və ya üzərinə bir az ana südü sıxmağa da cəhd edə bilərsiniz.
Əmizdirilməyən körpələrin qidalanması
Əgər körpənizi əmizdirmirsinizsə, o, daha tez-tez yeməlidir. O, həmçinin bədəninin ehtiyac duyduğu bütün bəsləyici maddələri almaq üçün digər qidalar, o cümlədən süd məhsulları ilə də qidalanmalıdır.
- Körpəniz 6 aylıq olanda ana südü ilə qidalanan körpələrdə olduğu kimi ona bərk qidalar verməyə başlayın. Gündə dörd dəfə iki-üç qaşıq yumşaq və əzilmiş qida ilə başlayın ki, bu da ana südü olmadığından onu lazımi bəsləyicilərlə təmin etsin.
- 6-8 aydan etibarən körpənizə gündə dörd dəfə yarım fincan yemək və bir dəfə sağlam qəlyanaltı lazım olacaq.
- 9-11 aydan etibarən körpənizə gündə dörd-beş dəfə yarım fincan yemək və iki dəfə sağlam qəlyanaltı lazım olacaq.