UNICEF Child Friendly Spaces: tumutulong sa mga batang may kapansanan pagkatapos ng Bagyong Odette
Pagbibigay ng masaya at ligtas na lugar para maglaro at matuto sa panahon ng sakuna
Kahit hindi panahon ng bagyo, laging nag-aalala si Dante Longos para sa kaligtasan ng kanyang dalawang anak na sina DM, 10 at Clinton, 8. Noong sila’y pinanganak, nakitaan sila ng sintomas ng developmental disability. Dahil dito, hindi nila alintana ang mga panganib na nasa kanilang paligid.
Nang tumama ang Bagyong Odette sa kanilang lugar sa Cagdianao, Dinagat Islands, naglaro at nagtampisaw sina DM at Clinton sa tubig-baha na pumasok sa kanilang bahay na siyang ikinabahala ng kanilang ama. Napilitan si Dante na bitbitin ang dalawang anak paakyat sa mas ligtas na lugar.
Kinahiligan ng magkapatid ang maglaro sa labas at malapit sa may dagat. “Bigla na lang silang gumagala, hindi mo sila masuway,” ayon kay Dante, na madalas buong araw nasa trabaho bilang construction worker. Tanging ang 78 anyos na ina niyang si Bienvenida ang nagbabantay sa mga bata.
“Isang araw, bigla na lang akong nakatanggap ng tawag – dinala na pala si Clinton sa ospital. Naglaro daw sa dagat at muntikan nang malunod.”
Mas nakahinga raw nang maluwag si Dante nang magkaroon ng isang UNICEF Child Friendly Space sa Cagdianao.
Upang makagawa ng isang Child Friendly Space ay nagtatayo ang UNICEF ng mga tent kung saan ligtas na nakakapaglaro ang mga bata sa pangangalaga ng UNICEF, implementing partners tulad ng Community and Family Services International (CFSI) at mga Youth Animators o Volunteers.
Ang mga Youth Animator ay mga kabataang nais tumulong mula sa kanilang komunidad. Pinangungunahan nila ang paglalaro at iba pang aktibidad na layong tulungan ang mga batang makabangon mula sa mental and emotional stress na dulot ng kalamidad.
Nagsisilbi rin ang Child Friendly Space na daan para matukoy ang mga bata, tulad nina DM at Clinton, na nangangailangan ng karagdagang tulong at referral sa espesyalista.
“Wala kaming pera kaya di namin sila kailanman naipatingin sa doktor,” ani Lola Bienvenida. “Hindi pa sila pormal na na-diagnose.”
Ayon kay Bienvenida, bago ang pandemya ay natuturuan ng guro ng Special Education (SPED) ng lokal na elementarya ang magkapatid. Nahirapan silang makisabay mula nang naging printed module na sinasagutan sa bahay ang mga aralin.
“Kung mayroon lang magaling na gurong makatututok sa kanila, tiyak na mas bubuti ang lagay ng mga bata.”
Bagamat nasa ikalawang baitang na ng elementarya ang dalawa, hindi pa rin sila marunong magsulat.
Ipinaalam na ang kaso nina DM at Clinton sa mga espesyalista – bagamat may kakulangan pa rin daw ng mga angkop na espesyalista sa Dinagat Islands o sa katabing Surigao City.
Patuloy na pinoprotektahan ng UNICEF ang mga karapatan ng bawat bata lalo na’t sa panahong ng sakuna. Kabilang dito ang mga batang may kapansanan o Children with Disabilities (CWD). Tinitiyak din na maaabot sila ng mga programa at ang kanilang mga pangangailangan ay isasaalang-alang sa pagpaplano at pamamahala ng mga ito.
“Ang kwento nina DM at Clinton ay isa lamang sa mga pagsubok na pinagdadaanan ng ating children with disabilites at ng kanilang pamilya. Sinisikap nating mabigyan sila ng masaya at ligtas na lugar para maglaro at matuto sa ating Child Friendly Spaces. Layunin din nating mapalakas ang kakayahan ng mga pamilya at tagapangalagana tugunan ang pangangailangan ng kanilang anak, lalo na sa panahon ng sakuna,” pahayag ni Kristine Roda Alingod, UNICEF Programme Officer for Children with Disabilities. #
