یونیسف کی بنوں، خیبر پختونخوا میں ہونے والے حملے کی مذمت

اقوام متحدہ کے بچوں کے عالمی ادارے، یونیسف نے گزشتہ روز بنوں، خیبر پختونخوا میں ہونے والے لرزہ خیز حملے کی شدید مذمت کی ہے، جس میں پانچ بچے جاں بحق ہو گئے، جن میں کم عمر ترین بچہ ایک سال کا تھا، جبکہ اس حملے میں متعدد خواتین اور بچے زخمی بھی ہوئے۔ رمضان المبارک کے مقدس مہینے کے دوران اس المناک واقعے سے متاثر ہونے والے تمام افراد اور خاندانوں سے یونیسف نے دلی تعزیت کا اظہار کیا ہے۔
یونیسف نے اس موقع پر زور دے کر کہا کہ  بچوں کی زندگیاں بہت عزیز ہیں، ان کی حفاظت کی جانی چاہیے، مگر وہ تشدّد کا شکار ہیں۔  ادارے کا کہنا تھا کہ  دُنیا کو ہوش میں لانے اور  بامعنی اقدامات پر آمادہ کرنے کیلئے مزید کتنے بچوں کو اپنی جانیں گنوانی ہونگی؟ یونیسف نے ہر قسم کے تشدّد کے فوری خاتمے اور تمام بچوں کے بنیادی حقوق کے تحفظ اور پاسداری کا مطالبہ کیا ہے۔