Burimet e reja për familjet e mundshme kujdestare

“Nuk ka asgjë që mund ta zëvendësojë një mjedis familjar për sa i përket ndikimit në rritjen, zhvillimin dhe mirëqenien e përgjithshme të fëmijës,” tha Patricia Di Xhovani, përfaqësuese e UNICEF-it. “Çdo fëmijë ka nevojë për një familje. Fëmijët pa kujdes prindëror shpesh kanë përjetuar ngjarje traumatike herët në jetën e tyre. Prandaj, dhënia e dashurisë, kujdesit dhe vëmendjes që ata kërkojnë, mund të jetë gjithçka për ta dhe ta ndryshojë pozitivisht jetën e tyre.”

Shërbimet e kujdestarisë e paraqesin një formë të përkujdesit me bazë familjare për fëmijët për të cilët të jetuarit me familjet e tyre nuk është opsion për momentin. Kujdesi strehues dhe farefisnor, së bashku me shtëpitë e grupeve të vogla, janë bërë alternativat kryesore të ngjashme me familjen për fëmijët pa kujdes prindëror pas deinstitucionalizimit të suksesshëm të fëmijëve nga institucionet në shkallë të gjerë në vitin 2019.

Që atëherë, UNICEF-i ofron mbështetje të vazhdueshme për fuqizimin e mëtejshëm të sistemit të kujdesit ndaj fëmijëve, me fokus në kujdesin familjar dhe farefisnor. Në këtë kontekst, burimet e reja të internetit të shpalosura sot janë një nga mjetet për ta forcuar dhe zgjeruar rrjetin e familjeve kujdestare.

Faqja e internetit përmban informacione të përgjithshme për kujdestarinë adoptuese, procesin e të qenit kujdestar, llojet e kujdestarisë, legjislacionin përkatës, lajmet, kontaktet, informacionet rreth ndihmës financiare dhe pyetjet e parashtruara më së shpeshti. Gjithashtu ekziston një mjet ndërveprues ku kujdestarët e mundshëm mund t’i dërgojnë pyetjet e tyre me interes drejtpërdrejt në qendrat mbështetëse të kujdestarisë përmes faqes së internetit.

Në vend funksionojnë tre qendra mbështetëse të kujdestarisë, të cilat i mbulojnë zonat e veçanta gjeografike, dy prej të cilave janë ngritur në ambientet e ish-institucioneve të mëdha për fëmijët pa përkujdesje prindërore.

Qendra e parë e kujdestarisë është themeluar në korrik të vitit 2021 në Shkup në ish-institucionin për fëmijë pa përkujdesje prindërore “11 Tetori”. Qendra e dytë është e vendosur në Manastir në ish entin për fëmijë të vegjël pa përkujdesje prindërore “Shtëpia për fëmijë dhe foshnje”, ndërsa e treta drejtohet nga fshati SOS për fëmijë në Shkup.

Aktualisht, ka rreth 590 fëmijë në kujdestari dhe rreth 100 fëmijë në shtëpi të vogla grupore, duke përfshirë fëmijë nga 0-3 vjeç dhe fëmijë me aftësi të kufizuara.

Megjithatë, pavarësisht progresit të konsiderueshëm, numri i familjeve kujdestare ekzistuese nuk është i mjaftueshëm dhe nuk është i shpërndarë në mënyrë të barabartë në të gjithë vendin. Kjo është arsyeja pse përmes promovimit të strehimit, sistemi i kujdesit për fëmijët synon ta krijojë një rrjet familjesh kujdestare, të gatshme për të ofruar kujdes dhe mbrojtje për fëmijët në çdo komunë dhe për të lehtësuar mbajtjen e një lidhjeje me familjen, komunitetin dhe sfondin kulturor të fëmijës.

Promovimi dhe forcimi i sistemit të kujdestarisë në Maqedoninë e Veriut janë pjesë e një reforme më të gjerë të kujdesit ndaj fëmijëve, e mbështetur nga Konventa për të Drejtat e Fëmijës dhe Udhëzimet e OKB-së për kujdesin alternativ të fëmijëve, e cila vërteton që fëmijët të rriten dhe zhvillohen më së miri në një mjedis edukues dhe të kujdesshëm, të mbështetur nga të rritur, të përkushtuar dhe të përgjegjshëm.