Нови ресурси за потенцијални згрижувачки семејства

„Ништо не може да ја замени семејната средина во поглед на влијанието врз растот, развојот и вкупната добросостојба на детето,“ изјави Патриција ДиЏовани, претставничка на УНИЦЕФ. „На секое дете му треба семејство. Децата без родителска грижа честопати доживуваат трауматски настани рано во животот. Затоа, од пресудно значење е љубовта, грижата и вниманието што им ја пружаат згрижувачките семејства.“

Згрижувањето е облик на семејна грижа за децата кои во моментот не можат да живеат со своите семејства. Згрижувачките семејства, роднинското згрижување и малите групни домови прераснаа во главни алтернативни решенија за децата без родителска грижа по успешната деинституционализација и затворањето на големите установи за деца во 2019 година.

Оттогаш УНИЦЕФ обезбедува постојана поддршка за понатамошно зајакнување на системот за детска заштита, со фокус на згрижувачките семејства и роднинското згрижување. Во овој контекст, новата веб страница е една од алатките што придонесуваат да се зајакне и да се прошири мрежата на згрижувачки семејства.

На веб страницата може да се најдат општи информации за згрижување, за процесот низ кој  поминува едно лице за да стане згрижувач, видови згрижување, законски регулативи, како и вести, контакти и информации за финансиските надоместоци и често поставуваните прашања. Постои и интерактивна алатка преку која потенцијалните згрижувачи можат да комуницираат директно со Центрите за поддршка на згрижувачки семејства.

Во земјата има три Центри за поддршка на згрижувачки семејства  кои покриваат конкретни географски области, од кои два се отворени во просториите на поранешните големи институции за деца без родителска грижа.

Првиот Центар за поддршка на згрижувачки семејства беше отворен во јули 2021 година во Скопје, во поранешниот Дом за деца без родителска грижа „11 Октомври“. Вториот е со седиште во Битола, во поранешниот „Дом за доенчиња и мали деца “, а со третиот раководи „СОС детско село“ во Скопје.

Во моментов околу 590 деца се сместени во згрижувачки семејства и околу 100 во мали групни домови, меѓу кои и деца на возраст од 0 до 3 години и деца со попреченост.

Меѓутоа, и покрај значителниот напредок, нема доволно згрижувачки семејства и тие не се рамномерно распределени низ земјата. Затоа преку промоција на згрижувањето, системот за детска заштита има за цел да обезбеди поддршка на згрижувачките семејства на целата територија од државата и да има згрижувачи во сите општини за згрижените деца да можат да одржуваат врска со семејството и заедницата од која потекнуваат.

Унапредувањето и зајакнувањето на системот за згрижување во Северна Македонија се дел од поширока реформа на системот за детска заштита која се раководи со Конвенцијата за правата на детето и Упатството за алтернативна нега на деца на ОН кои нагласуваат дека децата најдобро растат и се развиваат во средина која им обезбедува нега и поддршка од страна на возрасни посветени лица кои одговараат соодветно на нивните потреби.