Крај за детската сиромаштија
За да ги извлечеме децата и семејствата од сиромаштија треба да изградиме систем за социјална заштита по мерка на децата
- Достапно на:
- English
- Македонски
Предизвик
Развојната и животната перспектива на едно од четири деца во земјата се засегнати поради изложеност на сиромаштија. Над 100.000 деца во моментов живеат во услови на сиромаштија или лишување.
Многу од овие деца се соочуваат со ризик од попречен умствен и физички развој. Всушност, децата соочени со сиромаштија имаат четирипати поголема веројатност да заостанат со растот, т.е. да бидат пониски во споредба со просечната висина за нивна возраст.
Но, тоа не е сѐ. Сиромаштијата им штети на децата и преку негативните ефекти врз нивните семејства. На пример, децата од сиромашни семејства се поизложени на насилни форми на дисциплинирање и со повеќе изгледи да влезат во брак пред 18-тиот роденден. Сиромаштијата создава и продлабочува неможности за успех; само едно од 300 деца кои живеат во сиромаштија оди во градинка, а само 2/3 од децата кои потекнуваат од сиромашни семејства завршуваат средно училиште. Ова се сѐ фактори што им ги намалуваат шансите на децата и родителите да го прекинат циклусот на сиромаштија.
Некои деца се потешко погодени
Само 1 од 10 деца во Пелагонија е засегнато со сиромаштија, додека секое второ дете кое живее во Североисточниот регион се соочува со овој проблем. Семејствата со деца имаат речиси двапати поголеми шанси да живеат во сиромаштија од оние кои немаат деца.
Децата кои живеат во домаќинства со еден родител се особено ранливи, како што се и децата што потекнуваат од семејства со три или повеќе деца.
Социјалните трансфери се важни, но не се доволни
Програмите за извлекување на децата од сиромаштија имаат голем потенцијал, но во моментов се доста неефективни. Социјалните бенефиции, како што е паричната помош, не само што се недоволни како износ, не покривајќи ја основната финансиска сигурност на семејствата со деца, туку често ги спречуваат и ги стигматизираат родителите при обезбедување работа и дополнителен приход со кој семејствата може да се извлечат од сиромаштија.
Други бариери што придонесуваат кон проблемот се: несоодветен пристап за семејствата до информации околу правата и програмите за вработување; обврска за пријавување на кандидатите за социјална помоши ограничен пристап до основните услуги како на пример квалитетни предучилишни установи во подрачјата најпогодени од сиромаштија. Односот меѓу сиромаштијата и дискриминацијата е сложен. Дискриминацијата придонесува кон сиромаштијано, сиромаштијата може и да изолира одредени лица и да наметне општествена стигма, што резултира со дискриминација. Децата од сиромашни семејства често се соочуваат со дискриминација кога пристапуваат кон образование издравствени услуги, а не добиваат ни поддршка од заедницата поради општествената стигма.
Решение
За да ги извлечеме децата и семејствата од сиромаштија, потребен ни е сеопфатен пристап за да им помогнеме да „застанат на нозе“. За децата се потребни бесплатни и достапни здравствени услуги, бесплатен пристап до квалитетно предучилишно образование и парична помош за да се подобри нивната благосостојба. За родителите е потребна поддршка да се вратат на пазарот на трудот, како и обука и советување за да подигаат среќни, здрави и успешни деца што ќе станат корисни членови на општеството.
Заедно со Владата и со другите партнери, УНИЦЕФ работи на реформи во системот за социјална заштита, со што тој ќе стане поподготвен да одговори на потребите на децата. Потребен ни е систем со кој се обезбедува основна финансиска сигурност за децата преку целисходни и ефективни социјални трансфери, истовремено давајќи им време и можности на нивните родители подобро да се грижат за семејствата.
Ние работиме за да обезбедиме секое дете во земјата да добие шанса за опстанок и за напредок. Се залагаме детската сиромаштија да не стане наследство, а погодените семејства конечно да го прекинат циклусот на сиромаштија.