Квалитетна исхрана за секое дете
Здрав почеток за ослободување на целосниот потенцијал на децата
- Достапно на:
- English
- Македонски
Предизвик
Квалитетната исхрана не е важна само за одржување на доброто здравје, туку е суштинска за правилен физички и ментален развој, особено кај децата во првите три години од животот.
За жал, лошата исхрана сѐ повеќе станува проблем во земјата. Дебелината кај децата започна да расте во изминатите неколку години и сега околу една третина од децата се со прекумерна тежина (машки 39%, девојчиња 32%).
Во комбинација со слабата физичка активност, ова придонесе кон зголемување на бројот на деца кои живеат со дијабетес тип 2, кардиоваскуларни заболувања, поголем општ ризик по здравјето и понизок квалитет на животот.
Добар почеток значи во целост да се користи она што веќе го имаме во изобилство
Еден од најзагрижувачките аспекти на сѐ понеправилната исхрана е високиот внес на сол и шеќер преку храната што се јаде дома, во градинките и училиштата. Истражувањето на УНИЦЕФ во 2017 годинаво училиштата и градинките покажа седумпати поголем внес на сол од дневните количества препорачани од СЗО.
Исто така, во градинките и училиштата загрижува високиот внес на прости шеќери кои припаѓаат на групата моносахариди и кои треба да се заменат со храна богата со растителни влакна, нешто што е лесно достапно. Според една студија на Светската здравствена организација (СЗО), просечната понуда на овошје и зеленчук во земјата е околу 813g по лице, што е значително повеќе од препорачаниот минимум на Организацијата за храна и земјоделство (ФАО) на СЗО од 600g.
Иако земјата има околу 300 сончеви денови годишно, изненадувачки голем број деца во земјата не добиваат доволно витамин D.
Доењето е темел за добра исхрана и ги штити децата од болести
Доените деца имаат барем шестпати поголеми шанси за опстанок во првите месеци отколку децата што не се дојат. Детето кое се храни исклучиво со мајчино млеко има 14 пати помала веројатност да почине во првите шест месеци во споредба со недоеното дете, а со доењето драстично се намалува и смртноста од акутна респираторна инфекција и дијареа, два главни причинители на смртност кај децата (Лансет 2008).
Меѓутоа, во земјата, исхраната исклучиво со доење во моментов изнесува само 23% кај децата од шест месеци или помали, што е значително пониско од светскиот просек од 40%. Тоа значи дека само едно од четири деца ги користат придобивките од исклучиво доење, како што се здрав развој на мозокот, подобри когнитивни и образовни резултати.
Решение
За да се ослободи целосниот потенцијал на децата, ги анализираме клучните проблеми на исхраната со кои тие се соочуваат, како основа за акција околу подобрување на исхраната за сите деца во земјата. УНИЦЕФ ја поддржа проценката на статусот на микронутриенти и внесот на јод кај доенчињата и децата, како и јодниот статус на бремените жени.
Подготвуваме уште една проценка на навиките во исхраната и факторите за дебелина кај децата, вклучувајќи и проценка на економските ефекти од дебелината и прекумерната тежина во земјата, како и бихевиорална студија за факторите кои водат кон преваленца на дебелината. Врз основа на резултатите од овие проценки, ќе се реализираат конкретни планови и активности за секое дете во земјата да добие најдобар почеток на животот.
Работиме на подигање на свеста за важноста на исклучивото доење во првите шест месеци, како и за влијанието на квалитетот на храната врз развојот на децата, особено во првите пет години од животот.