အကျပ်အတည်းကာလအတွင်း ကလေးများအားပံ့ပိုးပေးခြင်း
မြန်မာနိုင်ငံရှိကလေးများ အထောက်အပံ့များကို အမြန်ဆုံးလိုအပ်နေသည်
- ရရှိနိုင်ပါသည်:
- English
- မြန်မာ
မြန်မာနိုင်ငံရှိကလေးသူငယ်များသည် မကြုံစဖူးသည့် လူသားချင်းစာနာထောက်ထားမှုဆိုင်ရာ အကျပ်အတည်းတစ်ခုနှင့် ကြုံတွေ့နေရသည်။ နိုင်ငံတွင်း ပဋိပက္ခများနှင့် အကြမ်းဖက်မှုများ အရှိန်မြင့်လာခြင်း၊ ကိုဗစ်-၁၉ ကမ္ဘာ့ကပ်ရောဂါ၊ ရာသီဥတုနှင့် ဆက်စပ်သည့် ကပ်ဘေးအန္တရာယ်များ၊ ဆင်းရဲမွဲတေမှုမြင့်တက်လာခြင်းနှင့် အများပြည်သူဝန်ဆောင်မှုများ ပိုမိုယိမ်းယိုင် အားနဲလာခြင်း ထိုကဲ့သို့စိန်ခေါ်မှုများစွာကြောင့် ကလေးသူငယ် ၅ သန်း [1] အပါအဝင် ၁၄.၄ သန်း [2] ခန့်သော ပြည်သူများသည် လူသားချင်းစာနာထောက်ထားရေး အကူအညီများလိုအပ်လျှက်ရှိပါသည်။
ချင်းပြည်နယ်၊ ကချင်ပြည်နယ်၊ ကယားပြည်နယ်၊ ကရင်ပြည်နယ်၊ မွန်ပြည်နယ်နှင့် ရှမ်းပြည်နယ်၊ မကွေးတိုင်း၊ စစ်ကိုင်းတိုင်းနှင့် တနင်္သာရီတိုင်းဒေသကြီးများတွင် ဖြစ်ပွားလျှက်ရှိသည့် တိုက်ပွဲများနှင့် မလုံခြုံမှုများကြောင့် အမျိုးသမီးများနှင့် ကလေးသူငယ်များအပါအဝင် လူပေါင်း ၃၂၀,၉၀၀ ကျော်သည် အိုးအိမ်နေရပ်မှစွန့်ခွာထွက်ပြေးနေကြရပါသည်။ ယင်းမှာ ၂၀၂၁ ခုနှစ် ဖေဖော်ဝါရီလ[3] မတိုင်မီ ကာလရှည်ကြာ နေရပ်စွန့်ခွာတိမ်းရှောင်ခဲ့ကြရသော လူပေါင်း ၃၄၀,၀၀၀ ကျော်အပြင် ထပ်တိုးလာသော အရေအတွက်ဖြစ်သည်။ ပဋိပက္ခများမှာ ယခင်ဖြစ်ပွားခြင်းမရှိခဲ့သော နေရာများသို့ပါ ပျံ့နှံ့လာသည့်အတွက် ပြည်နယ်နှင့်တိုင်း ၁၅ ခုအနက် ၁၄ ခုခန့်မှာ မြေမြှုပ်မိုင်းများ၊ ပေါက်ကွဲနိုင်သော စစ်လက်ကျန်ပစ္စည်း ကိရိယာများ၏ အန္တရာယ်များနှင့် ကြုံနေကြရသည်။
ဤအပြန်အလှန်ဆက်နွှယ်နေသည့် အန္တရာယ်များမှာ နိုင်ငံတစ်ဝန်းရှိ ကလေးသူငယ်များ၏ ရှင်သန်ရပ်တည်မှု၊ ဖွံ့ဖြိုးမှုနှင့် ကောင်းကျိုးသုခတို့အပေါ် ခြိမ်းခြောက်လျှက်ရှိပါသည်။
ဘေးသင့်နေသော မျိုးဆက်တစ်ခု
လက်ရှိအကျပ်အတည်းမတိုင်မီက နိုင်ငံရှိကလေးငယ်ဦးရေ ၁၇ သန်းအနက်မှ ၃၄ ရာခိုင်နှုန်းခန့်မှာ poverty line ဆင်းရဲမွဲတေမှုမျဉ်းအောက်တွင် နေထိုင်ကြရသည်။ အဆိုပါဦးရေ၏ နောက်ထပ် ၃၃ ရာခိုင်နှုန်းမှာ ဆင်းရဲမွဲတေမှုမျဉ်း၏ အထက်နားတွင်ရှိသည်ဆိုရုံမျှ နေထိုင်ကြရသည်။ လက်ရှိတွင် ၎င်းတို့သည် လက်ရှိအကျပ်အတည်း[4]၏ အကျိုးဆက်ကြောင့် ဖြစ်ပေါ်လာသည့် စီးပွားရေး ကြပ်တည်းမှုများကြောင့် ပိုမိုဆင်းရဲနွမ်းပါးသည့်အနေအထားသို့ ပြန်လည်ကျရောက်သွားနိုင်ချေများစွာ ရှိနေပါသည်။ ကိုဗစ်-၁၉ တတိယလှိုင်းအပြင် ၂၀၂၁ ခုနှစ် စစ်တပ် အာဏာသိမ်းမှုနောက်ပိုင်း စီးပွားရေးနှင့် နိုင်ငံရေးအခြေအနေများပေါင်းစပ်ဖြစ်ပေါ်လာသည့် အကျိုးဆက်များကြောင့် ၂၀၂၂[5] ခုနှစ်တွင် လူဦးရေထက်ဝက်ခန့်နီးပါးမှာ ဆင်းရဲနွမ်းပါးသည့်အခြေအနေများဆီ တွန်းပို့ခံရနိုင်ချေရှိနေပါသည်။
နိုင်ငံ၏ကလေးသူငယ် အခွင့်အရေးများနှင့်ပတ်သက်၍ ခက်ခက်ခဲခဲ ကြိုးပမ်းခဲ့ရသော အကျိုးရလဒ်များမှာ ယခုအခါချေဖျက်ခံလိုက်ရပြီဖြစ်ပြီး ကလေးများ၏ အသက်၊ ကောင်းကျိုးချမ်းသာနှင့် ကြီးပွားတိုးတက်ရေးတို့ကို ခြိမ်းခြောက်လျှက်ရှိပါသည်။ မြန်မာနိုင်ငံက ပါဝင်လက်မှတ်ရေးထိုးထားသည့် ကလေးသူငယ်အခွင့်အရေးများဆိုင်ရာ ကုလသမဂ္ဂသဘောတူစာချုပ်နှင့် ၂၀၁၉ ခုနှစ် မြန်မာ့ကလေးသူငယ် အခွင့်အရေးများဆိုင်ရာ ဥပဒေတို့အရ ကလေးသူငယ်များ၏ အခွင့်အရေးများကို ကာကွယ်ရန်နှင့် ဖြည့်ဆည်းပေးရန်မှာ အားလုံးအတွက် ဦးစားပေးဖြစ်သင့်ပါသည်။
ကလေးသူငယ်များနှင့် လူငယ်မျိုးဆက်တစ်ခုလုံးအပေါ် လက်ရှိအကျပ်အတည်း၏ ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ ပညာရေးဆိုင်ရာနှင့် စီးပွားရေးဆိုင်ရာအရ ကြီးမားသော ရိုက်ခတ်မှုများကြောင့် ထိခိုက်နစ်နာနေကြရခြင်းမှ ကာကွယ်ရန် အဆောတလျင်လုပ်ဆောင်ချက်များသာမက ရေရှည်လုပ်ဆောင်ချက်များလည်း လိုအပ်နေပါသည်။
ယူနီဆက်က မည်သို့တုံ့ပြန်ဖြေရှင်းနေသနည်း
လက်ရှိအကျပ်အတည်းစတင်ချိန်မှစ၍ ယူနီဆက်သည် ပြည်တွင်းနှင့် နိုင်ငံတကာ အစိုးရမဟုတ်သော အဖွဲ့အစည်းများ၊ အရပ်ဘက်လူမှုအဖွဲ့အစည်းများနှင့် ပုဂ္ဂလိကကဏ္ဍမိတ်ဖက်အဖွဲ့အစည်းများအပါအဝင် ၎င်း၏ကျယ်ပြန့်၍ အမျိုးမျိုးကွဲပြားခြားနားသော မိတ်ဖက်အဖွဲ့အစည်းကွန်ရက်များမှတစ်ဆင့် နိုင်ငံအတွင်းရှိ အားနည်းထိခိုက်လွယ်ဆုံး ကလေးငယ်များအတွက် အရေးပေါ်လူသားချင်းစာနာထောက်ထားရေးဆိုင်ရာ အကူအညီများကို ပံ့ပိုးပေးလျှက်ရှိပါသည်။
ယူနီဆက်အနေဖြင့် -
- လူပေါင်း ၁၀၀,၀၀၀ နီးပါးထံသို့ မရှိမဖြစ်အရေးပါသော အခြေခံကျန်းမာရေးစောင့်ရှောက်မှု ဝန်ဆောင်မှုများ ပံ့ပိုးပေးထားခြင်း
- ကလေးငယ်ပေါင်း ၃၂,၀၀၀ ခန့်အတွက် နမိုးနီးယားအဆုတ်ရောင်ရောဂါနှင့် ဝမ်းပျက်ဝမ်းလျှောရောဂါကုသရန် ဆေးဝါးများ ထောက်ပံ့ပေးခြင်း
- ကလေးငယ်ဦးရေ ၃၀,၀၀၀ နီးပါးခန့်အတွက် မရှိမဖြစ်လိုအပ်သော အာဟာရဖြည့်စွက်စာများ ပံ့ပိုးပေးခြင်း
- ကလေးငယ်ဦးရေ ၃၀၀,၀၀၀ နီးပါးခန့်ထံ သင်ကြားရေးအထောက်အကူပစ္စည်းများ ဖြန့်ဝေပေးခြင်း
- ရန်ကုန်မြို့ရှိ လှိုင်သာယာမြို့နယ်နှင့် ရွှေပြည်သာမြို့နယ်များမှ အမျိုးသမီးနှင့် ကလေးငယ် ၁၀,၀၀၀ ကျော်အတွက် အရေးပေါ်ကျန်းမာရေးဝန်ဆောင်မှုများ ပံ့ပိုးပေးခြင်း
- လူပေါင်း ၅၆၂,၀၀၀ ကျော်ထံ အရေးပါသော ရေ၊ သန့်ရှင်းရေးနှင့် တစ်ကိုယ်ရေသန့်ရှင်းရေးသုံးပစ္စည်းများ (Hygiene Kits) ထောက်ပံ့ပေးခြင်း
- ရန်ကုန်မြို့ လှိုင်သာယာမြို့နယ်တွင်နေထိုင်သူဦးရေ ၅၀,၀၀၀ ခန့်အပါအဝင် ပဋိပက္ခကြောင့် ထိခိုက်ခံစားရသူပေါင်း ၂၂၇,၀၀၀ ကျော်အတွက် သန့်ရှင်းသော သောက်သုံးရေများ ဖြန့်ဝေပေးခြင်း
- ကလေးငယ်ဦးရေ ၃၀,၀၀၀ ခန့်နှင့် လူကြီးဦးရေ ၅,၀၀၀ ကျော်အတွက် စိတ်ကျန်းမာရေးနှင့် လူမှုစိတ်ပိုင်းပံ့ပိုးရေး(MHPSS) ဝန်ဆောင်မှုများပေးခြင်း စသည်ဖြင့်ဆောင်ရွက်ပေးထားပြီးဖြစ်ပါသည်။
ကလေးငယ်များအား အလွန်အမင်းဆင်းရဲမွဲတေမှုများမကြုံရစေရန် ကာကွယ်ပေးခြင်း
၂၀၂၀ ခုနှစ်တွင် ပြုလုပ်ခဲ့သော ယူနီဆက်၏ လေ့လာမှု တစ်ခုက ကိုဗစ်-၁၉ ရောဂါသည် မူလကပင် နွမ်းပါးသောအိမ်ထောင်စုများတွင် နေထိုင်နေကြရသည့် မြန်မာနိုင်ငံရှိ ကလေးငယ်စုစုပေါင်းဦးရေ၏ သုံးပုံတစ်ပုံနီးပါးခန့်အပြင် နောက်ထပ် ကလေးငယ်ဦးရေသုံးပုံတစ်ပုံခန့်ကိုလည်း ဆင်းရဲတွင်းထဲသို့ တွန်းပို့နိုင်ကြောင်း ခန့်မှန်းထားပါသည်။
ဆင်းရဲမွဲတေမှုသိသိသာသာ တိုးမြင့်လာခြင်းသည် ကလေးငယ်သန်းပေါင်းများစွာအား အခြေခံဝန်ဆောင်မှုများ လက်လှမ်းရယူနိုင်မှု လျော့နဲလာရခြင်း၊ ၎င်းတို့၏အလားအလာများကို ဖြည့်ဆည်းနိုင်မည့် အခွင့်အလမ်းများ ဆုံးရှုံးစေခြင်းနှင့် ညှဉ်းပန်းနှိပ်စက်ခံရခြင်း၊ ခေါင်းပုံဖြတ် အမြတ်ထုတ်ခံရခြင်း အန္တရာယ်များ ကြုံတွေ့စေနိုင်ခြင်းတို့ ဖြစ်စေနိုင်ပါသည်။
ယူနီဆက်က မည်သို့တုံ့ပြန်ဖြေရှင်းနေသနည်း
- ယူနီဆက်အနေဖြင့် ဤအကျပ်အတည်းသည် ကလေးသူငယ်များအပေါ် အထူးသဖြင့် ဝင်ငွေဆုံးရှုံးသွားသော မိသားစုများမှ ကလေးငယ်များ၊ မိမိတို့၏ စောင့်ရှောက်အုပ်ထိန်းသူများဖမ်းဆီးထိန်းသိမ်းခံလိုက်ရသော ကလေးငယ်များနှင့် သင်ကြားရေး သို့မဟုတ် ကျန်းမာရေးစောင့်ရှောက်မှု လက်လှမ်းမီမရရှိနိုင်သော ကလေးငယ်များအပေါ် မည်သို့သက်ရောက်မှုရှိနေသည်ကို စောင့်ကြည့်မည့် လုပ်ငန်းစဉ်များကို ဖော်ဆောင်ထားပါသည်။ ဤစောင့်ကြည့်လေ့လာရေး လုပ်ငန်းစဉ်မှ ရရှိလာသည့် အချက်အလက်ဒေတာများနှင့် အထောက်အထားများက ယူနီဆက်အား ကလေးသူငယ်များကို ဆင်းရဲမွဲတေမှု၏ အဆိုးဝါးဆုံး သက်ရောက်မှုရန်များမှ ကာကွယ်ပေးနိုင်မည့် လုပ်ငန်းလုပ်ဆောင်ချက်များကို သိရှိစေမည်ဖြစ်သည်။
- ယူနီဆက်အနေဖြင့် အာဟာရနှင့် မိခင်နှင့် မွေးကင်းစကလေး ကျန်းမာရေးတို့အတွက် ရပ်ရွာအခြေပြု ဝန်ဆောင်မှုများကို တိုင်းရင်းသားကျန်းမာရေး အဖွဲ့အစည်းများ (EHOs) နှင့် NGO မိတ်ဖက်အဖွဲ့အစည်းများမှတစ်ဆင့်ပေးနိုင်ရန် တိုင်းရင်းသား လူနည်းစုဒေသများ၊ စစ်ဘေးရှောင် IDP စခန်းများနှင့် အခြားထိခိုက်လွယ်သော ဒေသများတွင် လုပ်ငန်းများဆောင်ရွက်လျှက်ရှိပါသည်။
- ယူနီဆက်သည် မိတ်ဖက်အဖွဲ့အစည်းများနှင့် လက်တွဲလျှက် ရန်ကုန်မြို့ရှိ လှိုင်သာယာမြို့နယ်နှင့် ရွှေပြည်သာမြို့နယ်တို့မှ ကိုယ်ဝန်ဆောင်အမျိုးသမီးများနှင့် ကလေးငယ်များအား အွန်လိုင်းမှတစ်ဆင့် ဆွေးနွေးပေးခြင်း၊ ဆေးဝါးများပံ့ပိုးခြင်း၊ ပြင်ပလူနာကြည့်ရှုကုသပေးခြင်းနှင့် ဆေးရုံသို့လွှဲပေးခြင်းများ အပါအဝင် အရေးပေါ်ကျန်းမာရေး ဝန်ဆောင်မှုများ စတင်ပေးအပ်လျှက်ရှိပါသည်။ ၂၀၂၁ ခုနှစ် ဧပြီလမှစ၍ အမျိုးသမီးနှင့် ကလေးငယ် ၁၀,၀၀၀ ကျော်( အသက် ၇ နှစ်အောက်ကလေးငယ် ၉,၀၃၂ ဦးနှင့် ကိုယ်ဝန်ဆောင်အမျိုးသမီး ၁,၀၀၀ ဦး) ပံ့ပိုးမှုများ ရရှိထားပြီးဖြစ်ပါသည်။
- ယူနီဆက်သည် အသက် ၂ နှစ်နှင့် ၅ နှစ်ကြားကလေးငယ်ရှိသည့် မိသားစုများနှင့် အသက် ၅ နှစ်အောက် မသန်စွမ်းကလေးငယ်ရှိသူ မိသားစုများအား အဓိကဝန်ဆောင်မှုများ လက်လှမ်းမီရရှိရန်အတွက် မိသားစုဝင်ငွေနှင့် ငွေပေးချေမှုများကို တစ်ဖက်တစ်လမ်းမှ ထောက်ပံ့ရန် စည်းကမ်းသတ်မှတ်ချက်မထားသည့် ငွေသားထောက်ပံ့မှုများ စတင်ပေးအပ်နေပြီဖြစ်သည်။ ယခုအချိန်အထိ ရန်ကုန်မြို့ လှိုင်သာယာမြို့နယ်မှ ကိုယ်ဝန်ဆောင်အမျိုးသမီးနှင့် ကလေးငယ် ၅,၃၀၀ ကျော်မှာ ပံ့ပိုးမှုများ ရရှိထားပြီးဖြစ်သည်။
ယူနီဆက်က ထပ်တိုး ကိုယ်ဝန်ဆောင်နှင့် ကလေးငယ် ၂၇,၅၀၀ ကျော်ကို လူသားချင်းစာနာထောက်ထားမှုဆိုင်ရာ ငွေသားအထောက်အပံ့များ တိုးချဲ့ပေးနိုင်ရန်၊နှင့် ရန်ကုန်မြို့ရှိ ဆင်ခြေဖုံးမြို့နယ်များတွင် နေထိုင်သူ ထပ်တိုးကိုယ်ဝန်ဆောင်နှင့် ကလေးငယ် ၃၀,၀၀၀ ကျော်ကို အရေးပေါ်ကျန်းမာရေး ဝန်ဆောင်မှုများပေးနိုင်ရန် ကြိုးပမ်းဆောင်ရွက်လျှက်ရှိသည်။
ကလေးသူငယ်များကို ကျန်းမာရေးနှင့်ညီညွတ်အောင်ထားခြင်း
ကျန်းမာရေးဝန်ဆောင်မှုများ ရရှိခြင်းပြတ်လပ်ခြင်း လက်လှမ်းရယူနိုင်ခြင်း မရှိသောကြောင့် ကလေးငယ် ၇၀၀,၀၀၀ နီးပါးခန့်သည် ပုံမှန်ကာကွယ်ဆေးထိုးနှံမှုမရရှိနိုင်သကဲ့သို့ ကလေးငယ် ၅ သန်းနီးပါးခန့်မှာလည်း ဗီတာမင်အေ ဖြည့်စွက်ဆေးများနှင့် လွဲချော်နေရာ ကူးစက်ရောဂါပိုးဝင်ရောက်ခြင်းနှင့် မျက်စိကွယ်ခြင်း အန္တရာယ်များရှိလာနိုင်ပါသည်။ ကိုဗစ်-၁၉ ကူးစက်မှုများသည် သန်းပေါင်းများစွာသော ဘဝများအပေါ် ဆက်လက်သက်ရောက်မှုရှိနေပြီး လက်ရှိကျန်းမာရေးဝန်ဆောင်မှု အားနဲ ပြတ်လပ်မှုများ ဆက်လက်ဖြစ်ပေါ်နေပါက နောက်ထပ် ကလေးငယ်ပေါင်း ၂၅,၀၀၀[6] ခန့် သေဆုံးနိုင်သည်ဟု ခန့်မှန်းထားသည်။
ထို့အပြင် ထောက်ပံ့ရေးပစ္စည်းများရရှိနိုင်မှု အကန့်အသတ်ရှိခြင်း၊ ပို့ဆောင်ရေးပြတ်တောက်မှုများနှင့် ဘဏ်လုပ်ငန်းကန့်သတ်ချက်များကြောင့် ရေ၊ ပတ်ဝန်းကျင်သန့်ရှင်းရေးနှင့် တစ်ကိုယ်ရေသန့်ရှင်းရေး WASH ဝန်ဆောင်မှုများ ရရှိအသုံးပြုနိုင်ရေးမှာ ပြတ်တောက်မှုများ ရင်ဆိုင်နေရသည်။ နိုင်ငံတစ်ဝန်းရှိ ကလေးငယ် ၃ သန်းကျော်မှာ နေအိမ်တွင် သန့်ရှင်းသောရေမရရှိနိုင်ခြင်းကြောင့် သေဆုံးနှုန်းသိသိသာသာမြင့်မားပြီး အထူးသဖြင့် အသက် ၅ နှစ်အောက်ကလေးများတွင် သေဆုံးနှုန်းမြင့်သည့် ဝမ်းပျက်ဝမ်းလျှောကပ်ရောဂါဖြစ်ပွားနိုင်သည့် အန္တရာယ်နှင့် ရင်ဆိုင်နေကြရသည်။
ယူနီဆက်က မည်သို့တုံ့ပြန်ဖြေရှင်းနေသနည်း
- ယူနီဆက်သည် အရေးပေါ်စောင့်ရှောက်မှု လိုအပ်နေသော ကလေးငယ်များအတွက် ရှေးဦးသူနာပြုပစ္စည်းများနှင့် မရှိမဖြစ်လိုအပ်သော ဆေးဝါးများကို ထောက်ပံ့ပေးရန် မိတ်ဖက်အဖွဲ့အစည်းများနှင့် ပူးပေါင်းဆောင်ရွက်လျှက်ရှိပါသည်။ လူဦးရေ ၁၀၀,၀၀၀ နီးပါးခန့်မှာ ယူနီဆက်မှ ပံ့ပိုးသည့် မရှိမဖြစ်လိုအပ်သော အခြေခံကျန်းမာရေးစောင့်ရှောက်မှု ဝန်ဆောင်မှုများ ရရှိထားပါသည် - အဆိုပါလူဦးရေ၏ ၁၅ ရာခိုင်နှုန်းခန့်မှာ အားနည်းထိခိုက်လွယ်သော ကိုယ်ဝန်ဆောင်အမျိုးသမီးများ သို့မဟုတ် အသက် ၅ နှစ်အောက်ကလေးများဖြစ်သည်။
- နိုင်ငံ၏ ဒေသအများစုတွင် ပုံမှန်ကာကွယ်ဆေးထိုးလုပ်ငန်းများ ခေတ္တရပ်ဆိုင်းထားသော်လည်း ယူနီဆက်က မိတ်ဖက်အဖွဲ့အစည်းများနှင့် ပူးပေါင်း၍ အချို့ဒေသများတွင် ဝက်သက်၊ ဆုံဆို့နှင့် ပိုလီယိုရောဂါ ကာကွယ်ဆေးများ ပုံမှန်ထိုးနှံပေးနိုင်ရန် ဆက်လက်လုပ်ဆောင်လျှက်ရှိပါသည်။
- ယူနီဆက်မှ Royal College of Paediatric and Child Health နှင့် ပူးပေါင်းလျှက် စိတ်ဒဏ်ရာနှင့် အရေးပေါ်ကလေးကျန်းမာရေး စောင့်ရှောက်မှုနှင့်ပတ်သက်၍ ကျန်းမာရေးလုပ်သားများအတွက် ဆေးပညာဆိုင်ရာ လမ်းညွှန်မှုများပေးမည့် မြန်မာ့ဆေးဘက်ဆိုင်ရာလမ်းညွှန် ဝက်ဘ်ဆိုက်တစ်ခုကို စမ်းသပ်ထုတ်လွှင့်ထားပါသည်၊
- ယူနီဆက်သည် ရခိုင်ပြည်နယ်၊ ကချင်ပြည်နယ်၊ ရှမ်းပြည်နယ်နှင့် ချင်းပြည်နယ်တို့ရှိ အသက် ၅ နှစ်အောက်ကလေးငယ် ၃၂,၀၀၀ ကျော်အတွက်လုံလောက်မည့် နမိုးနီးယားအဆုတ်ရောင်ရောဂါနှင့် ဝမ်းပျက်ဝမ်းလျှောရောဂါများအတွက်အပါအဝင် ဆေးဝါးများ ထောက်ပံ့ထားပါသည်။ ယခုအချိန်အထိ အသက် 5 နှစ်အောက် ကလေး ၁၃,၀၀၀ ကျော်သည် ဝမ်းပျက်ဝမ်းလျှောနှင့် အဆုတ်ရောင်ရောဂါအတွက် ကုသမှုကို ခံယူနေရပြီဖြစ်သည်။
- ယူနီဆက်သည် ၂၀၂၁ ခုနှစ်တွင် ရခိုင်ပြည်နယ်၊ ကချင်ပြည်နယ်နှင့် ရှမ်းပြည်နယ်မြောက်ပိုင်းကဲ့သို့ လူသားချင်းစာနာထောက်ထားမှုဆိုင်ရာ တုံ့ပြန်ဖြေရှင်းရေး စီမံကိန်း ((HRP)[7] အစီအစဉ်တွင်ပါ၀င်သော ဒေသများနှင့်၊ တိုးချဲ့ HRP[8] စီမံကိန်းမှ ပါ၀င်သော ထပ်တိုးဒေသများဖြစ်သည့် ချင်းပြည်နယ်၊ စစ်ကိုင်းတိုင်း၊ ကရင်ပြည်နယ်နှင့် အခြားပဋိပက္ခကြောင့် ထိခိုက်ခံစားနေရသော ဒေသများတွင် လူပေါင်း ၅၆၂,၀၀၀ ကျော်ထံ အရေးပါသော ရေ၊ ပတ်ဝန်းကျင်သန့်ရှင်းရေးနှင့် တစ်ကိုယ်ရေသန့်ရှင်းရေး WASH ထောက်ပံ့ရေးပစ္စည်းများ ပံ့ပိုးပေးထားပြီးဖြစ်ပါသည်။
- ယူနီဆက်သည် ၂၂၇,၀၀၀ ကျော်သော ပဋိပက္ခကြောင့် ထိခိုက်ခံစားနေရသူများ၊ ကာလရှည်စစ်ဘေးရှောင်စခန်းများတွင် နေထိုင်ရသူများ၊ ယာယီနေရပ်စွန့်ခွာတိမ်းရှောင်နေကြရသူများနှင့် အိမ်ရှင်ရပ်ရွာအသိုက်အဝန်းများကို သန့်ရှင်းသောသောက်သုံးရေများ ပံ့ပိုးပေးထားပါသည်။ ၎င်းတွင် လှိုင်သာယာမြို့နယ်ရှိ လူပေါင်း ၅၀,၀၀၀ ခန့်အတွက် နေ့စဉ်သောက်ရေ ပံ့ပိုးမှုလည်း အပါအဝင်ဖြစ်သည်။
- ထို့အပြင် ရပ်ရွာလူထုထံတိုက်ရိုက်ပံ့ပိုးမှုများမှတစ်ဆင့် ယူနီဆက်သည် လူပေါင်း ၃၈,၆၀၀ ခန့် (ကလေးငယ် ၆,၄၅၀ ကျော်အပါအဝင်)အတွက် အခြေခံသောက်သုံးရေရရှိရန်နှင့် လူပေါင်း ၁၀,၃၀၀ ကျော် (ကလေးငယ် ၃,၄၀၀ ကျော်အပါအဝင်)အတွက် အခြေခံသန့်ရှင်းရေးဝန်ဆောင်မှုများရရှိရန် ကူညီပံ့ပိုးပေးခဲ့ပါသည်။
- လူမှုမီဒီယာနှင့် ရေဒီယိုတို့မှတစ်ဆင့် လက်ဆေးရန်အားပေးလှုံ့ဆော်သည့် အစီအစဉ်မှတဆင့် လူပေါင်း ၃.၁ သန်း ထံ ရောက်ရှိအသိပေးနိုင်ခဲ့သည်။ .
ယူနီဆက်သည် မြန်မာနိုင်ငံတစ်ဝန်းရှိ အားနည်းထိခိုက်လွယ်ဆုံးမြို့နယ် ၈၈ ခုတွင်လုပ်ဆောင်လျက်ရှိသော မိခင်၊ မွေးကင်းစကလေးနှင့် ကလေးသူငယ်ကျန်းမာရေးနှင့် HIV စီမံချက်များ တိုးချဲ့ရန်အတွက် ထပ်တိုးရန်ပုံငွေ အမေရိကန်ဒေါ်လာ ၁၅ သန်း နှင့် လူပေါင်း ၁ သန်းကျော် အတွက် အရေးပါသော တစ်ကိုယ်ရေသန့်ရှင်းရေး ထောက်ပံ့ပစ္စည်းများနှင့် ဝန်ဆောင်မှုများအပါအဝင် သန့်ရှင်းသောသောက်ရေ၊ ဘေးကင်းစိတ်ချရသော သန့်ရှင်းရေးဝန်ဆောင်မှုများ ပေးနိုင်ရန်အတွက် ထပ်တိုးရန်ပုံငွေ အမေရိကန်ဒေါ်လာ ၂၉ သန်း လိုအပ်လျက်ရှိပါသည်။
ကလေးများအား အာဟာရပြည့်ဝအောင်ထားခြင်း
လက်ရှိ နိုင်ငံအကျပ်အတည်းမတိုင်မီကပင် မြန်မာနိုင်ငံရှိ ကလေးငယ်ပေါင်းများစွာမှာ အာဟာရချို့တဲ့မှုကို ကြုံတွေ့ခံစားနေကြရပြီးဖြစ်ကာ ၇ ရာခိုင်နှုန်းနီးပါးမှာ သေးကွေးကြုံလှီခြင်း (၎င်းတို့၏အရပ်နှင့်စာလျှင် ကိုယ်အလေးချိန် အလွန်အမင်းနည်းနေခြင်း)နှင့် ၂၇ ရာခိုင်နှုန်းနီးပါးမှာ ပုညှက်ခြင်း (၎င်းတို့၏အသက်နှင့်စာလျှင် အရပ်ပုလွန်းနေခြင်း) [9] တို့ကို ခံစားနေကြရပါသည်။ လက်ရှိနိုင်ငံအကျပ်အတည်းသည် မြို့ပြရော ကျေးလက်တွင်ပါ နေထိုင်သည့် မိသားစုများအတွက် မိမိတို့သားသမီးများကို အာဟာရပြည့်ဝသည့်အစားအစာများ ကျွေးမွေးနိုင်ရန် ပို၍ခက်ခဲလာစေပါသည်။5 WASH ဝန်ဆောင်မှုများ ရရှိခွင့်ဆုံးရှုံးခြင်းသည် ဝမ်းပျက်ဝမ်းလျှောရောဂါများ ဖြစ်ပွားခြင်းကို ဦးတည်လာနိုင်ပြီး ကျန်းမာရေးစနစ်လျော့နဲပြတ်တောက်ခြင်းကဲ့သို့ပင် အခြေအနေကို ပို၍ဆိုးရွားလာစေနိုင်ပါသည်။ အထူးသဖြင့် ဤအခြေအနေသည် အချိန်ကြာမြင့်စွာအာဟာရချို့တဲ့ခြင်းကို ခံစားရနေရသော အသက် ၂ နှစ်အောက်ကလေးငယ်များအတွက် ပို၍ပြင်းထန်ဆိုးရွားအန္တရာယ်များဖြစ်သော သေဆုံးခြင်း သို့မဟုတ် ပြန်လည်ပြောင်းလဲ၍မရနိုင်သော ရုပ်ပိုင်းဆိုင်ရာနှင့် အသိဉာဏ်ပိုင်းဆိုင်ရာ နှောင့်နှေးမှုများဖြစ်ပေါ်စေနိုင် ပါသည်။ ကလေးငယ်များ၊ ၎င်းတို့၏မိသားစုများ၊ ရပ်ရွာအသိုက်အဝန်းများနှင့် တိုင်းပြည်တစ်ခုလုံးအတွက် - ဤအကျိုးသက်ရောက်မှုများမှာ - ကြီးမားသောပျက်စီးဆုံးရှုံးမှုများ ဖြစ်ပေါ်စေနိုင်ပါသည်။
ယူနီဆက်က မည်သို့တုံ့ပြန်ဖြေရှင်းနေသနည်း
- ယူနီဆက်နှင့် ၎င်း၏မိတ်ဖက်အဖွဲ့အစည်းများသည် ရှမ်းပြည်နယ်၊ ရန်ကုန်တိုင်း၊ ပဲခူးတိုင်းနှင့် ကရင်ပြည်နယ်ရှိ အသက် ၆-၅၉ လကြားကလေးငယ် ၂၀,၄၉၀ ဦးခန့်အတွက် အသင့်သုံးကုထုံးအစားအစာဘူး ၅,၀၀၀ နီးပါးကို ပံ့ပိုးပေးထားပြီးဖြစ်ပါသည်။
- ယူနီဆက်သည် အနုအာဟာရချို့တဲ့မှုကို ကာကွယ်ရန်အတွက် ရခိုင်ပြည်နယ်၊ ကချင်ပြည်နယ်၊ ရှမ်းပြည်နယ်၊ ကရင်ပြည်နယ်နှင့် ရန်ကုန်တိုင်းတို့မှ အသက် ၆-၅၉ လကြား ကလေးငယ်ဦးရေ ၁၄၇,၄၀၀ ကျော်နှင့် ကိုယ်ဝန်ဆောင်နှင့် နို့တိုက်မိခင်ဦးရေ ၃၅,၄၀၀ ကျော်အတွက် အနုအာဟာရမျိုးစုံပါဖြည့်စွက်စာများကို ထောက်ပံ့ပေးထားပါသည်။
- ယူနီဆက်သည် ဒေသခံ NGOs ၊ EHOs များနှင့်လက်တွဲလျှက် မွေးကင်းစနှင့် ရင်ခွင်ပိုက်ကလေးငယ်အား အစာအာဟာရကျွေးမွေးခြင်းနှင့်ပတ်သက်၍ မိခင်များအား ဆွေးနွေးအကြံပေးခြင်းနှင့် ပံ့ပိုးမှုပေးခြင်းများ လုပ်ဆောင်လျှက်ရှိပြီး ၂၀၂၁ ခုနှစ်အတွင်း စောင့်ရှောက်မှုပေးသူပေါင်း ၂၈,၅၀၀ ကျော်ကို ပံ့ပိုးပေးနိုင်ခဲ့ပါသည်။
- ယူနီဆက်သည် ကြိုတင်ကာကွယ်နိုင်ပြီး ကုသနိုင်သော အာဟာရဝန်ဆောင်မှုများကို အရှိန်မြှင့်တင်နိုင်ရန် မိတ်ဖက်အဖွဲ့အစည်းများကိုလည်း ကူညီပေးလျှက်ရှိပါသည်။
ယူနီဆက်သည် အားနည်းထိခိုက်လွယ်သော ကလေးများနှင့် အမျိုးသမီးများအတွက် ပြင်းထန်အာဟာရ ချို့တဲ့ကလေးငယ်များအား စောင့်ကြည့်စစ်ဆေးခြင်းနှင့် ကုသမှုပေးခြင်း၊ အနုအာဟာရဖြည့်စွက်စာများ၊နှင့် မိခင်နို့တိုက်ကျွေးခြင်းအပါအဝင် ကျန်းမာရေးနှင့်ညီညွတ်သော အပြုအမူများနှင့် အလေ့အကျင့်များကို အားပေးမြှင့်တင်ရန်အလို့ငှာ ရပ်ရွာအသိုက်အဝန်းတွင်ရော ကျန်းမာရေးဌာနတွင်ပါ ပြုလုပ်ပေးလျှက်ရှိသည့် မိခင်၊ မွေးကင်းစနှင့် ရင်ခွင်ပိုက်ကလေးငယ် အစာအာဟာရကျွေးမွေးရေးဆိုင်ရာ ဆွေးနွေးအကြံပေးခြင်းများကဲ့သို့ အသက်ကယ် အထောက်အပံ့များပေးနိုင်ရန် ထပ်တိုးရန်ပုံငွေ အမေရိကန်ဒေါ်လာ ၂၃ သန်း လိုအပ်ပါသည်။
ကလေးများအား သင်ယူနိုင်အောင် ပြုလုပ်ပေးခြင်း
၂၀၂၀ ခုနှစ်မှစ၍ ကလေးသူငယ်နှင့် လူငယ်ပေါင်း ၁၂ သန်း နီးပါးခန့်၏ သင်ယူလေ့လာမှုများမှာ ကိုဗစ်-၁၉ ရောဂါကြောင့် ဆက်လက်သင်ယူနိုင်ခြင်း လျော့နဲ (သို့) ပြတ်တောက်လျှက်ရှိပါသည်။ ဘေးကင်းလုံခြုံပြီး ဆက်လက်လေ့လာသင်ယူနိုင်မည့် အခွင့်အလမ်းများ အကန့်အသတ်ရှိခြင်း (သို့) လျော့နဲခြင်းကြောင့် ကလေးငယ်များမှာ ယခုအထိ လေ့လာသင်ယူခွင့်မရနိုင်ဘဲဖြစ်နေပြီး ၎င်း၏အကျိုးဆက်ကြောင့် အများစုမှာ ပညာရေးတတ်မြောက်မှု နှင့် ပြီးမြောက်မှု ရလဒ်သို့ လုံး၀အမှီမလိုက်နိုင်တော့ဘဲ ဖြစ်သွားစေနိုင်ပါသည်။
ယူနီဆက်က မည်သို့တုံ့ပြန်ဖြေရှင်းနေသနည်း
- ယူနီဆက်သည် ၎င်း၏မိတ်ဖက်များနှင့်အတူ များစွာသောပြည်နယ်နှင့်တိုင်းဒေသကြီးများရှိ ကလေးငယ်ဦးရေ ၃၀၀,၀၀၀ နီးပါးထံ သင်ကြားရေးအထောက်အကူပြုပစ္စည်းများ ဖြန့်ဝေပေးလျှက်ရှိပါသည်။ တိုင်းရင်းသားလူနည်းစုဒေသများရှိ ကလေးငယ် ၁၈၀,၀၀၀ ကျော် ဘေးကင်းလုံခြုံစွာ ဆက်လက်လေ့လာသင်ယူနိုင်ရန်အတွက် တိုင်းရင်းသားအခြေခံပညာရေး အစီအစဉ်များထံ အိမ်တွင်းအခြေပြု သင်ကြားရေးအထောက်အကူပစ္စည်းများလည်း ပံ့ပိုးပေးလျှက်ရှိပါသည်။
- ကျွန်ုပ်တို့သည် ငယ်ရွယ်သောကလေးငယ်များ သင်ယူလေ့လာရေးနှင့် ဘာသာစကားဖွံ့ဖြိုးရေးတို့အတွက် အဆင်သင့်ဖြစ်နေစေရန် တိုင်းရင်းသားဘာသာစကားဆရာများအပါအဝင် အရပ်ဘက်လူမှုအဖွဲ့အစည်း မိတ်ဖက်များကို လေ့ကျင့်သင်တန်းပေးခြင်းအပြင် ပုံပြင်စာအုပ်များကို တိုင်းရင်းသားဘာသာစကားများဖြင့် ဖန်တီးခြင်း၊ ထုတ်ဝေခြင်းတို့ဖြင့် ကူညီပေးနေပါသည်။
- ယူနီဆက်အနေဖြင့် မူလတန်းနှင့် အလယ်တန်းကျောင်းနေအရွယ် ကလေးငယ်များအတွက် သင်ယူလေ့လာရေး အခွင့်အလမ်းများပေးရန် ပြည်တွင်းနှင့် နိုင်ငံတကာ NGOs များနှင့် လက်တွဲလုပ်ဆောင်နေပါသည်။ ယူနီဆက်သည် မြန်မာနိုင်ငံရှိ ကလေးငယ်ဦးရေ ၆၀,၀၀၀ ကျော်အတွက် မှတ်စုစာအုပ်များ၊ ဘောပင်များနှင့် ခဲတံများပါဝင်သည့် မရှိမဖြစ်လိုအပ်သော သင်ကြားရေးဆိုင်ရာပံ့ပိုးရေးပစ္စည်းများကို ဖြန့်ဝေပေးထားပြီးဖြစ်ပါသည်။
- ကျွန်ုပ်တို့သည် ကပ်ရောဂါမစတင်မီကပင် ပုံမှန်ကျောင်းပညာရေးမရရှိခဲ့သည် ကလေးငယ်များအတွက် ကျောင်းပြင်ပပညာရေး ပို့ချပေးရန် ပြည်တွင်းနှင့် နိုင်ငံတကာ NGOsများနှင့် ပူးပေါင်းဆောင်ရွက်လျှက်ရှိပါသည်။
ယူနီဆက်သည် အချို့ တဲ့ဆုံး အလိုအပ်ဆုံး ကလေးငယ်များနှင့် ဆယ်ကျော်သက်လူငယ်များအတွက် အစောပိုင်းလေ့လာသင်ယူမှု၊ အရည်အသွေးဖွံ့ဖြိုးမှုအစီအစဉ်များအပါအဝင် သင်ယူလေ့လာနိုင်မည့်အခွင့်အလမ်းများပံ့ပိုးပေးနိုင်ရန် ထပ်ဆောင်းရန်ပုံငွေ အမေရိကန်ဒေါ်လာ ၂၂ သန်း လိုအပ်လျက်ရှိပါသည်။
ကလေးများကို ဘေးကင်းလုံခြုံအောင်ထားခြင်း
လက်ရှိနိုင်ငံအကျပ်အတည်းမတိုင်မီကပင် မြန်မာနိုင်ငံတွင် ကလေးငယ်များကို အကြမ်းဖက်မှု၊ ညှဉ်းပန်းနှိပ်စက်မှုနှင့် ခေါင်းပုံဖြတ်အမြတ်ထုတ်မှုများမှ ကင်းဝေးအောင်ထားရှိရန်မှာ အကြီးစားစိန်ခေါ်မှုတစ်ရပ် ဖြစ်ခဲ့ပါသည်။ ၂၀၂၁ ခုနှစ် ဖေဖော်ဝါရီလမှစပြီး ပစ်ခတ်မှု၊ လေကြောင်းတိုက်ခိုက်မှု၊ အဆင်ခြင်မဲ့ လက်နက်ကြီးပစ်ခတ်မှု၊ ပေါက်ကွဲစေသောကိရိယာပစ္စည်းများအသုံးပြုမှုနှင့် လူသားဒိုင်းအဖြစ်အသုံးပြုမှုများကြောင့် အနည်းဆုံးကလေးငယ် ၁၁၄ ဦး သေဆုံးခဲ့ရပါသည်။ ၂၀၂၁ ခုနှစ် ပထမ ၁၀ လအတွင်း အောက်ပါဒေသများရှိ မြေမြှုပ်မိုင်းများ သို့မဟုတ် အခြားပေါက်ကွဲမှုများကြောင့် ထိခိုက်ဒဏ်ရာရသူပေါင်း ၂၁၇ ဦးတွင် အမျိုးသမီးနှင့် ကလေးငယ် ၁၀၂ ဦး ပါဝင်ခဲ့ပါသည် -
- ရှမ်းပြည်နယ် (စုစုပေါင်း သေကြေထိခိုက်ဒဏ်ရာရသူများအနက် ၃၄ ရာခိုင်နှုန်း)
- ရခိုင်ပြည်နယ် (၂၂ ရာခိုင်နှုန်း)
- ကချင်ပြည်နယ် (၁၇ ရာခိုင်နှုန်း)
- ပဲခူးတိုင်း၊ ချင်းပြည်နယ်၊ ကယားပြည်နယ်၊ ကရင်ပြည်နယ်၊ မွန်ပြည်နယ်၊ မကွေးတိုင်း၊ စစ်ကိုင်းတိုင်းနှင့် တနင်္သာရီတိုင်း (၂၈ ရာခိုင်နှုန်း)
များစွာသော ကလေးငယ်နှင့် လူငယ်များမှာ တရားဥပဒေရေးရာအကြံပြုချက်များ ရယူနိုင်ခွင့်မရှိကြဘဲ တစ်ဖက်သတ် ဖမ်းဆီးခံနေရပါသည် သို့မဟုတ် မိမိတို့ အိမ်နှင့်အသိုက်အဝန်းကို စွန့်ခွာထွက်ပြေးနေကြရပါသည်။ အရေးအကြီးဆုံးမှာ နေ့စဉ်နှင့်အမျှ ပဋိပက္ခအကြမ်းဖက်မှုမြင်ကွင်းများနှင့် ထိတွေ့နေရခြင်းသည် ကလေးငယ်များ၏ စိတ်ပိုင်းနှင့် ခံစားချက်ပိုင်းဆိုင်ရာ ကောင်းကျိုးသုခအပေါ် ရေရှည်သက်ရောက်မှုရှိနိုင်ပါသည်။
ယူနီဆက်က မည်သို့တုံ့ပြန်ဖြေရှင်းနေပါသနည်း
- ယူနီဆက်သည် ဥပေဒရေးရာကူညီပေးသူများနှင့် ပူးပေါင်းလျှက် ဥပဒေနှင့်ထိတွေ့နေရသည့် ကလေးငယ်များနှင့် လူငယ်များအား ဥပဒေရေးရာ အကြံဉာဏ်၊ သီးသန့်ဖုန်းလိုင်းဖြင့် ခေါ်ဆိုခြင်းမှတစ်ဆင့် ဥပဒေဆိုင်ရာ ဆွေးနွေးတိုင်ပင်မှုများ ပြုလုပ်ပေးခြင်းနှင့် ဥပဒေအရ ရှေ့နေလိုက်ပါဆောင်ရွက်ပေးခြင်းတို့ အပါအဝင် အရည်အသွေးကောင်းမွန်သော ဥပဒေရေးရာ အထောက်အကူ ဝန်ဆောင်မှုများပေးခြင်းဖြင့် တရားမျှတမှုရရှိအောင် ပံ့ပိုးပေးလျှက်ရှိပါသည်။ ယူနီဆက်အနေဖြင့် ၂၀၂၁ ခုနှစ် ဖေဖော်ဝါရီလ ၁ ရက်နေ့မှ ဒီဇင်ဘာလ ၃၁ ရက်နေ့အထိ ကလေးငယ် ၉၃၈ ဦး နှင့် လူငယ် ၁၀၃၇ ဦး တို့အား ပံ့ပိုးပေးထားပြီးဖြစ်ပါသည်။
- ယူနီဆက်သည် မိတ်ဖက်အဖွဲ့အစည်းများနှင့်လက်တွဲလုပ်ကိုင်လျှက် ၂၀၂၁ ခုနှစ် ဇွန်လတွင် နိုင်ငံတစ်ဝန်းလုံးမှ ၂၄ နာရီ ၇ ရက်ပတ်လုံး ခေါ်ဆိုနိုင်သော အခမဲ့ တရားရေးဆိုင်ရာ သီးသန့်ဖုန်းလိုင်းတစ်ခုကို ဖွင့်လှစ်ခဲ့ပြီး ဘာသာစကား ခုနှစ်မျိုးအသုံးပြုလျှက်ရှိသည့် နိုင်ငံလုံးဆိုင်ရာ စိတ်ကျန်းမာရေးနှင့် စိတ်လူမှုပိုင်းဆိုင်ရာအထောက်အပံ့ပေးသောဝန်ဆောင်မှု (Mental Health Psychosocial Support Service – MHPSS) ကူညီပေးရေးဖုန်းလိုင်းကိုလည်း ပံ့ပိုးပေးထားပါသည်။ ကျွန်ုပ်တို့သည် နေရပ်စွန့်ခွာတိမ်းရှောင်နေရသူ ကလေးငယ်များနှင့် ၎င်းတို့၏မိသားစုများအတွက် လူမှုစိတ်ပိုင်းနှင့် နှစ်သိမ့်ဆွေးနွေးအကြံပေးခြင်းဆိုင်ရာ ရွေ့လျားဝန်ဆောင်မှုများကိုလည်း စတင်မိတ်ဆက်ခဲ့ပါသည်။
- ယူနီဆက်နှင့် မိတ်ဖက်အဖွဲ့အစည်းများသည် ကချင်ပြည်နယ်၊ ရှမ်းပြည်နယ်၊ ရခိုင်ပြည်နယ် အလယ်ပိုင်းနှင့် မြောက်ပိုင်း၊ ချင်းပြည်နယ်နှင့် ကရင်ပြည်နယ်တို့ရှိ ကလေးငယ်ဦးရေ ၄၀,၀၀၀ နှင့် လူကြီးဦးရေ ၁၁,၀၀၀ တို့အား ရပ်ရွာအသိုက်အဝန်းများနှင့် ကလေးငယ်များနှင့်အကျွမ်းဝင်သည့်နေရာများတွင် စိတ်ကျန်းမာရေးနှင့် စိတ်လူမှုပိုင်းဆိုင်ရာအထောက်အပံ့ပေးသောဝန်ဆောင်မှု (Mental Health Psychosocial Support Service – MHPSS) ဝန်ဆောင်မှုများ ပေးနိုင်ခဲ့ပါသည်။ ကျွန်ုပ်တို့သည် ဆယ်ကျော်သက်များနှင့် လူငယ်များအတွက် လူမှုစိတ်ပိုင်းဆိုင်ရာ ဘဝတူပံ့ပိုးရေးအုပ်စုများကိုလည်း ထူထောင်ထားပြီးဖြစ်ပါသည်။
- ယူနီဆက်သည် ညှဉ်းပန်းနှိပ်စက်မှုနှင့် အကြမ်းဖက်မှုတို့မှ ရှင်သန်လွတ်မြောက်လာသူ ကလေးငယ်များအား တစ်ဦးချင်းနှစ်သိမ့်ဆွေးနွေးမှုရယူရန်နှင့် ကုထုံးခံယူရန်အတွက် စိတ်ကျန်းမာရေးပညာရှင်များထံ လွှဲပြောင်းပေးမှုများကိုလည်း ပံ့ပိုးပေးထားပါသည်။ ယူနီဆက်၏ မိတ်ဖက်အဖွဲ့အစည်းများသည် မိန်းကလေးငယ်များ၊ ယောက်ျားလေးငယ်များနှင့် အမျိုးသမီးဦးရ ၁၂,၀၀၀ နီးပါးအား ကျားမအခြေပြု အကြမ်းဖက်မှုအတွက် အန္တရာယ်လျှော့ချရေး၊ ကာကွယ်ရေးနှင့် တုံ့ပြန်ဖြေရှင်းရေး ဝန်ဆောင်မှုများ ပေးအပ်နိုင်ခဲ့ပါသည်။
- ကလေးငယ် ၅၇,၆၀၀ ဦးအပါအဝင် လူပေါင်း ၁၂၀,၀၀၀ ကျော်တို့သည် မြေမြှုပ်မိုင်းနှင့် အခြားမပေါက်ကွဲသေးသည့်ပစ္စည်းများ၏ အန္တရာယ်ကို ခွဲခြားသိရှိပြီး ရှောင်ရှားနိုင်မည့် အရည်အသွေးများ တည်ဆောက်ပေးသည့် ကလေးသူငယ် အကာအကွယ်ပေးရေးဆိုင်ရာ အမြင်ဖွင့်ဆွေးနွေးပွဲကဏ္ဍများတွင် ပါဝင်တက်ရောက်ခဲ့ကြပါသည်။
- ယူနီဆက်သည် နေရပ်စွန့်ခွာတိမ်းရှောင်နေရသူ ကလေးငယ်များအား ကလေးသူငယ် အကာအကွယ်ပေးရေးပစ္စည်းများနှင့် ကစားစရာပစ္စည်းများကို ဖြန့်ဝေပေးလျှက်ရှိပါသည်။ ယခုအချိန်အထိ တစ်နိုင်ငံလုံးအတိုင်းအတာအားဖြင့် ခုရေ ၆,၀၀၀ နီးပါး ဖြန့်ဝေပေးထားပြီးဖြစ်သည်။
- ယူနီဆက်သည် ကြီးလေးသော ကလေးသူငယ်အခွင့်အရေး ချိုးဖောက်မှုများအား စောင့်ကြည့်ပြီး သတင်းပေးပို့သည့် လုပ်ဆောင်ချက်များကို ပံ့ပိုးပေးလျှက်ရှိပါသည်။
ယူနီဆက်သည် ထပ်တိုးရန်ပုံငွေများဖြင့် ကလေးသူငယ်များအပေါ် အကြမ်းဖက်မှုများနှင့် နိုင်ငံတစ်ဝန်းရှိ ကြီးလေးသော ချိုးဖောက်မှုများကို ကာကွယ်တားဆီးရန်နှင့် တုံ့ပြန်ဖြေရှင်းရန်အတွက် ကလေးသူငယ် ကာကွယ်ပေးရေးဆိုင်ရာ ကြားဝင်ပံ့ပိုးမှု နယ်ပယ်နှင့် အတိုင်းအတာကို တိုးချဲ့သွားနိုင်မည်ဖြစ်သည်။
ယူနီဆက်အနေဖြင့် မြန်မာနိုင်ငံရှိကလေးတိုင်းထံ ရောက်ရှိအောင်ကြိုးပမ်းဆောင်ရွက်နေသည့် ယူနီဆက်၏ လုပ်ဆောင်ချက်များအတွက် သဒ္ဒါထက်သန်စွာ ပံ့ပိုးကူညီပေးကြသော ဩစတြေးလျ၊ ဥရောပသမဂ္ဂ၊ Gavi, the Vaccine Alliance၊ ဂျာမနီ၊ Global Partnership for Education (ပညာရေးအတွက် ကမ္ဘာလုံးဆိုင်ရာ မိတ်ဖက်ပူးပေါင်းမှု)၊ ဂျပန်၊ ဂျပန်အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ၊ ကိုရီးယား၊ နော်ဝေး၊ ဆွီဒင်၊ ထိုင်း၊ ဗြိတိန်၊ အမေရိကန်ပြည်ထောင်စုနှင့် အခြားကုလသမဂ္ဂအေဂျင်စီများအပါအဝင် မိတ်ဖက်အဖွဲ့အစည်းများအား အထူးကျေးဇူးတင်ရှိပါသည်
ဤကြိုးပမ်းဆောင်ရွက်မှုအားလုံးဖြင့် ယူနီဆက်နှင့် ၎င်း၏မိတ်ဖက်အဖွဲ့အစည်းများသည် မြန်မာနိုင်ငံရှိကလေးများ၏ ဘဝများ၊ ကောင်းကျိုးသုခနှင့် အနာဂတ်များ အန္တရာယ်ကျရောက်နေသည့် ယခုလိုအရေးကြီးသည့်အချိန်မျိုးတွင် ကလေးသူငယ်များအပေါ် ပျက်ကွက်ခြင်းမရှိအောင် ကြိုးပမ်းဆောင်ရွက်သွားမည်ဟု ခိုင်မာစွာဆုံးဖြတ်ထားပါသည်။
ကျွန်ုပ်တို့သည် အစဉ်အမြဲ ကလေးများဘက်မှ ခိုင်မာစွာ ရပ်တည်သွားပါမည်။