ဘာသာရေးခေါင်းဆောင်များ
မတူညီကွဲပြားမှု အပေါ် လေးစားခြင်းဖြင့် ကလေးသူငယ် အခွင့်အရေးများကို မြှင့်တင်ပေးခြင်း

- English
- မြန်မာ
၂၀၁၄ ခုနှစ် ဧပြီလတွင် လက်မှတ်ရေးထိုးခဲ့သည့် ပူးတွဲကြေညာချက်အရ ဗုဒ္ဓဘာသာ၊ အစ္စလာမ်ဘာသာ၊ ခရစ်ယာန်ဘာသာနှင့် ဟိန္ဒူဘာသာတို့မှ ဘာသာရေးခေါင်းဆောင်များ သည် ကလေးသူငယ် အခွင့်အရေးများကို အကောင်အထည်ဖော်မှုနှင့် ဘာသာရေးနှင့် လူမျိုးရေး မတူကွဲပြားမှုများကို လေးစားသော သဘောထားပြည့်ဝသည့် လူ့အဖွဲ့အစည်းများကို တည်ဆောက်ရန် ယင်းတို့၏ အလုံးစုံ ကတိကဝတ် ပြုမှုကို ထုတ်ဖော် ပြောကြားခဲ့ကြပါသည်။
ထိုအချိန်မှစ၍ ဘာသာရေးခေါင်းဆောင်များသည် ဘာသာရေး စပ်ကြား အပြန်အလှန် တွေ့ဆုံ ဆွေးနွေးမှုများကို မြှင့်တင်ပြီး ကလေးသူငယ်များအတွက် ငြိမ်းချမ်းရေးနှင့် လူမှုရေးဆိုင်ရာ စည်းလုံးညီညွတ်မှုကို တည်ဆောက်ရန်အတွက် ယူနီဆက်နှင့် အတူတကွ မိတ်ဖက် လုပ်ဆောင်လျက် ရှိပါသည်။
Myanmar Interfaith for Children သည် ၂၀၁၄ ခုနှစ်တွင် Ratana Metta အဖွဲ့အစည်း၊ ယူနီဆက်နှင့် မြန်မာနိုင်ငံရှိ အဓိကဘာသာလေးခု၏ အသရေရှိ ခေါင်းဆောင်များနှင့် ပူးပေါင်းထားသည့် ဘာသာရေးစပ်ကြား ပလက်ဖောင်းတစ်ခု ဖြစ်ပါသည်။
၂၀၁၅ ခုနှစ်တွင် ဘာသာရေးခေါင်းဆောင်များသည် နိုင်ငံရှိ ကလေးသူငယ်တိုင်းအတွက် ကတိကဝတ်အသစ်များကို ပြုလုပ်ရန်အတွက်နှင့် မြန်မာနိုင်ငံ၏ သမိုင်းဝင် ဖြစ်သည့် ၂၀၁၅ ခုနှစ် ရွေးကောက်ပွဲကို အခွင့်အရေးယူ၍ အများပြည်သူနှင့် နိုင်ငံရေးပါတီများအား မီဒီယာတောင်းဆိုမှု မှတဆင့် ပူးတွဲဖော်ပြချက်ကို တင်ပြခဲ့ပါသည်။
၂၀၁၆ ခုနှစ်တွင် ၂၁ရာစု ပင်လုံငြိမ်းချမ်းရေး ညီလာခံမတိုင်မီ ဆုတောင်းပွဲတစ်ခုတွင် ကလေးသူငယ်များကို ငြိမ်းချမ်းရေးဆွေးနွေးပွဲများ၏ အချက်အချာဗဟိုတွင် ထားရှိရန် ဘာသာရေး ခေါင်းဆောင်များက တောင်းဆိုခဲ့ပါသည်။ ငြိမ်းချမ်းရေးညီလာခံ ပြီးပြီးချင်းတွင် Myanmar Interfaith for Children ၏ အဖွဲ့ဝင်များသည် ထိုအချိန်ရှိ ကုလသမဂ္ဂ အတွင်းရေးမှူးချုပ် ဘန်ကီမွန်နှင့် ငြိမ်းချမ်းရေး၊ လူမှုစည်းလုံးညီညွှတ်ရေးနှင့် မြန်မာနိုင်ငံရှိ ကလေးသူငယ်များအတွက် အဓိက စိုးရိမ်ပူပန်မှုများအကြောင်းကို ပြောဆိုရန် တွေ့ဆုံခဲ့ကြပါသည်။
၂၀၁၇ ခုနှစ်တွင် ဒုတိယ ပင်လုံအမျိုးသား ငြိမ်းချမ်းရေးညီလာခံ မတိုင်မီ လူမှုမီဒီယာများတွင် ကျယ်ပြန့်စွာ ဖြန့်ဝေခဲ့သည့် ကလေးသူငယ်များအတွက် ငြိမ်းချမ်းရေးနှင့် လူမှုစည်းလုံးညီညွှတ်ရေး ရှိစေရန်အတွက် ဘာသာရေးခေါင်းဆောင်များက တိုက်တွန်းထားသည့် ဗီဒီယိုအတိုကို ရိုက်ကူးထုတ်လွှင့်ခဲ့ကြပါသည်။