အချိန်မီကုသမှုရရှိခြင်းက ကလေးငယ်ကို အာဟာရချို့တဲ့မှုကနေ ကာကွယ်ပေးနိုင်

၂၀၂၀ ခုနှစ် သန္တာရှင်းသန့်ကို မမွေးဖွားခင်မှာ မိဘနှစ်ဦးစလုံးက ရန်ကုန်မြို့ရှိ ဟိုတယ်ကြီးတစ်ခုမှာ လစာကောင်းကောင်းနဲ့ အလုပ်လုပ်ခဲ့ကြပါတယ်။ မဇာခြည်ခိုင်က သားဦးလေးရတော့မယ်လို့ သိလိုက်ရတဲ့အချိန်မှာ တစ်ခုတည်းသော စိုးရိမ်မှုက ဗိုက်ထဲကကလေးငယ် ကိုဗစ် ဗိုင်းရပ်စ်ပိုး ကူးစက်ခံရမှာကိုပဲဖြစ်ပါတယ်။

ဒါပေမဲ့ သိပ်မကြာခင်မှာပဲ ကိုဗစ် ကူးစက်ပျံ့နှံ့မှုကို တားဆီးဖို့ အစီအမံတွေအနေနဲ့ ဟိုတယ်ကို ပိတ်ခဲ့ရပါတယ်။ မဇာခြည်ခိုင်တို့လင်မယားနှစ်ဦးစလုံး အလုပ်မရှိတော့တဲ့အတွက် မဇာခြည်ခိုင်ရဲ့ စိုးရိမ်ပူပန်မှုတွေ ပိုတိုးလာခဲ့ရပါတယ်။ လင်မယားနှစ်ယောက် ခင်ပွန်းဖြစ်သူရဲ့ဇာတိရွာဖြစ်တဲ့ ဧရာဝတီတိုင်းအတွင်းက စက်ကွင်းရွာကို ပြန်လာခဲ့ကြပြီး ယောက္ခမတွေအိမ်မှာ ပြောင်းရွှေ့နေထိုင်ခဲ့ရပါတယ်။

ကလေးမွေးပြီးလို့ လုပ်ငန်းတွေပြန်ဖွင့်တာနဲ့ ရန်ကုန်ကို ပြန်လာဖို့ သူတို့မျှော်လင့်ခဲ့ကြပါတယ်။ ဒါပေမဲ့လည်း ၂၀၂၁ ခုနှစ် ဖေဖော်ဝါရီလမှာ စစ်တပ်က အာဏာသိမ်းလိုက်တဲ့အတွက် သူတို့အနေနဲ့ သူတို့ရဲ့အရင်ဘဝကို ပြန်ရဖို့မဖြစ်နိုင်ကြတော့ပါဘူး။

“အခု ကျွန်မခင်ပွန်းက သူ့မိဘတွေရဲ့ ဝက်မွေးမြူရေးလုပ်ငန်းရယ်၊ တလင်းနယ်တာတို့၊ တခြားလယ်အလုပ်တွေကို ကူလုပ်ပေးနေပါတယ်။ ကျွန်မတို့မိသားစု စားလောက်ရုံပဲရပါတယ်၊ အပိုဝင်ငွေရယ်လို့လုံးဝ မရှိဘူး” လို့ မဇာခြည်ခိုင်က ပြောပြပါတယ်။

၂၀၂၂ နှစ် ဇန်နဝါရီမှာ မဇာခြည်ခိုင်က ရွာကတခြားမိခင်တွေ ပြောနေတဲ့ Nourish Delta အစီအစဉ်အကြောင်း ကြားသိခဲ့ပါတယ်။ ဒီအစီအစဉ်က UNICEF နဲ့ World Vision က ပံ့ပိုးတဲ့ စီမံချက်တစ်ခုဖြစ်ပြီး အမျိုးသမီးတွေနဲ့ ကလေးငယ်တွေမှာဖြစ်တတ်တဲ့ အာဟာရချို့တဲ့မှုကို ကာကွယ်တားဆီးဖို့နဲ့ ကုသဖို့ရည်ရွယ်ပါတယ်။ မဇာခြည်ခိုင်က သမီးဖြစ်သူ သန္တာရှင်းသန့်က သိပ်ပိန်လွန်းနေတယ်လို့ ခံစားရတာကြောင့် အစီအစဉ်ကို ခေါ်သွားဖို့ ဆုံးဖြတ်ခဲ့ပါတယ်။ “ကျွန်မသူ့ကို နို့ဖြတ်လိုက်ပြီးနောက်ပိုင်းမှာ ကလေးက အစားသိပ်မစားတော့သလိုပဲ” လို့ မဇာခြည်ခိုင်က ဆိုပါတယ်။

World Vision အဖွဲ့က သန္တာရှင်းသန့်ကို စစ်ဆေးကြည့်ပြီးနောက်မှာတော့ လတ်တလောအပြင်းအထန်အာဟာရချို့တဲ့ခြင်းကို ခံစားနေရတာကို တွေ့ရှိခဲ့ကြပါတယ်။

“ကျွန်မတို့ ဒီအစီအစဉ်ကို အချိန်မီလေးရောက်လာခဲ့လို့ တော်သေးတယ်” လို့ မဇာခြည်ခိုင်က ပြောပြပါတယ်။

ဒီအစီအစဉ်က မဇာခြည်ခိုင်ကို အာဟာရနဲ့ပတ်သက်ပြီး ဆွေးနွေးအကြံပေးခဲ့သလို အသင့်ရရှိနိုင်တဲ့ အစားအစာတွေကို အသုံးပြုပြီး ဟင်းသီးဟင်းရွက်၊ ငါး၊ ပဲနဲ့ အသားတွေပါဝင်ပြီး အာဟာရသတ်မှတ်ချက်အားလုံး ပြည့်စုံတဲ့ “ကြယ်လေးပွင့်အစားအစာ” တစ်ခု ပြင်ဆင်ပုံတို့ကိုလည်း နည်းပြသင်ကြားပေးခဲ့ပါတယ်။

“ကျွန်မသမီးအတွက် မြေပဲထောပတ်အနီထုပ်လေးတွေ (အဆင်သင့် စားသုံးနိုင်သော အာဟာရပြည့်အစာ - RUTF)လည်း ရခဲ့တယ်။ ပြီးတော့ တခြားအတွေ့အကြုံရှိတဲ့ မိခင်တွေနဲ့ စကားပြောခွင့်ရပြီး သူတို့ဆီကနေလည်း သင်ယူခွင့်ရခဲ့တယ်” လို့ မဇာခြည်ခိုင်က ဆိုပါတယ်။

အိမ်မှာ သမီးရဲ့ တိုးတက်မှုကို မပြတ်စောင့်ကြည့်ဖို့အတွက် လက်မောင်းလုံးပတ်တိုင်းတိပ် (MUAC) ကိုလည်း မဇာခြည်ခိုင်ရခဲ့ပါတယ်။ “ကျွန်မတို့ အခြေအနေကို အဖွဲ့က လတိုင်း လာစစ်ဆေးပေးပါတယ်။”

Japan Committee for UNICEF (ယူနီဆက်ဆိုင်ရာ ဂျပန်ကော်မတီ)ရဲ့ ပံ့ပိုးမှုကြောင့် မဇာခြည်ခိုင်တို့ရွာက ကလေးငယ်တွေနဲ့ အမျိုးသမီးတွေက အာဟာရအစီအစဉ်ကနေ အကျိုကျေးဇူးတွေ ရရှိခဲ့ကြပါတယ်။ ဒီအစီအစဉ်မှာ ပညာပေးကဏ္ဍ၊ မွေးကင်းစကလေးငယ် တိုးတက်မှုစောင့်ကြည့်စစ်ဆေးခြင်းနဲ့ နောက်ဆက်တွဲ ပြုစုစောင့်ရှောက်ခြင်းကဏ္ဍ၊ ဆွေးနွေးတိုင်ပင်ခြင်းကဏ္ဍ၊ ဖြည့်စွက်အစားအစာများနဲ့ အနုအာဟာရဆေးပြားများ ဆေးမှုန့်များအပြင် လတ်တလောအပြင်းအထန်အာဟာရချို့တဲ့ ကလေးငယ်တွေအတွက် အဆင်သင့် စားသုံးနိုင်သော အာဟာရပြည့်အစာတွေ ပါဝင်ပါတယ်။

“ကျွန်မသမီးလေးရဲ့ ကိုယ်အလေးချိန်က“အစိမ်း”ဇုံထဲ အပြည့်အဝ မရောက်သေးပေမဲ့ တိုးတက်လာနေပါပြီ။ ကျွန်မတို့ ဆွေးနွေးတိုင်ပင်လို့ရပြီး ပုံမှန် စစ်ဆေးမှုလုပ်ပေးတဲ့အတွက်လည်း ဝမ်းသာရပါတယ်။ အခုဆိုရင် ကျွန်မသမီးလေး ပိုပြီးကောင်းကောင်းမွန်မွန် စားနိုင်လာနိုင်နေပါပြီ။”