ကလေးသူငယ် ကာကွယ်စောင့်ရှောက်ရေး
ကလေးများသည် ဘေးဥပဒ်ရန်များမှ ကာကွယ်စောင့်ရှောက်မှုရရှိရန် အခွင့်အရေးရှိပါသည်
- ရရှိနိုင်ပါသည်:
- English
- မြန်မာ
စိန်ခေါ်မှု
ယောက်ျားလေးများနှင့် မိန်းကလေးများအားလုံးသည် အကြမ်းဖက်ခြင်း၊ အမြတ်ထုတ်ခံရခြင်း၊ အလွဲသုံးစားပြုခြင်းနှင့် လျစ်လျူရှုခြင်းတို့မှ အကာအကွယ်ရပိုင်ခွင့် ရှိပါသည်။
ကလေးသူငယ်အခွင့်အရေးများကို ဆိုးရွားသောထိခိုက်မှုများမှ အကာအကွယ်ရပိုင်ခွင့်ကို မြန်မာနိုင်ငံသည် အဖွဲ့ဝင်နိုင်ငံဖြစ်သော ကလေးသူငယ်အခွင့်အရေးများဆိုင်ရာ ကုလသမဂ္ဂ သဘောတူစာချုပ် နှင့် ၂၀၁၉ ခုနှစ်တွင် ပြဌာန်းခဲ့သော မြန်မာနိုင်ငံကလေးသူငယ်အခွင့်အရေးဥပဒေတို့တွင် ပြဌာန်းထားပါသည်။
အကျပ်အတည်းကြုံတွေ့ရသော ကလေးသူငယ်များ
၂၀၂၁ ခုနှစ် ဖေဖော်ဝါရီလ ၁ ရက်နေ့တွင် စစ်တပ်က အာဏာသိမ်းမှုပြီး နောက်ဆက်တွဲအဖြစ် လက်ရှိအကျပ်အတည်းကာလအတွင်း မြန်မာနိုင်ငံရှိ ကလေးငယ်များသည် အသက်ခံရခြင်း၊ ဒဏ်ရာအပြင်းအထန်ရခြင်း၊ ဥပဒေရေးရာ အကြံဥာဏ်ရယူခွင့်မရှိဘဲ မတရားဖမ်းဆီးချုပ်နှောင်ခံလိုက်ရပြီး ၎င်းတို့၏ အိမ်များနှင့် လူမှုအသိုက်အဝန်းများမှ ထွက်ပြေးခဲ့ရပါသည်။
ကလေးများအား အလွဲသုံးစားမှုမှ ကာကွယ်ပေးခြင်း
မြန်မာနိုင်ငံတွင် ကလေးငယ်များအား အကြမ်းဖက်ခြင်း၊ အလွဲသုံးစားခံရခြင်းနှင့် ခေါင်းပုံဖြတ်ခြင်းမှ ကာကွယ်ခြင်းသည် လက်ရှိအကျပ်အတည်း မတိုင်မီကပင် အဓိက စိန်ခေါ်မှုတစ်ခု ဖြစ်နေပါသည်။
- ၂၀၂၀ ခုနှစ်တွင် ကလေး ၅၆ ဦး သေဆုံးပြီး ကိုယ်လက်အင်္ဂါချို့တဲ့သူ ၁၆၀ ဦး ရှိပါသည်။ ဖြစ်ရပ်အများစုတွင် မြေမြှုပ်မိုင်းများနှင့် မပေါက်ကွဲသေးသည့် လက်နက်ကြီးများ ထိမှန်မိခြင်း၏ ရလဒ်ဖြစ်ပါသည်။
- ဖေဖော်ဝါရီ ၁ ရက်နေ့ စစ်တပ်က အာဏာမသိမ်းမီ ကုလသမဂ္ဂက လူသားချင်းစာနာထောက်ထားမှု အထောက်အပံ့များ လိုအပ်နေသူ လူဦးရေ ၁ သန်းကျော်ရှိကြောင်း တွေ့ရှိခဲ့ပါသည်။ ၎င်းတွင် အဓိကအားဖြင့် ကချင်၊ ရခိုင်နှင့် ရှမ်းပြည်နယ်တို့တွင် ကလေးဦးရေ ၄၅၅,၀၀၀ဦး ရှိပါသည်။ ယခု ထိုလူဦးရေသည် ၃ သန်းအထိ မြင့်တက်လာခဲ့ပါသည်။
- ဤကလေးများ အများစုသည် ကလေးသူငယ် ကာကွယ်စောင့်ရှောက်ရေးစနစ် အားနည်းသည့် အခြေအနေများတွင် တည်ရှိနေပြီး ကလေးများအခြေအနေကို စောင့်ကြည့်ခြင်းသည် စိန်ခေါ်မှုအခက်အခဲရှိနေပါသည်။
ဆင်းရဲနွမ်းပါးမှုကြောင့် ထိခိုက်လွယ်သော ကလေးများအား ကာကွယ်ခြင်း
တစ်ကမ္ဘာလုံးအတိုင်းအတာအရ ကလေးတွေဟာ ၎င်းတို့၏ အိမ်၊ မိသားစုများ၊ ကျောင်းများ၊ စောင့်ရှောက်မှုနှင့် တရားမျှတမှုစနစ်များ၊ အလုပ်ခွင်များ နှင့် လူမှုအသိုက်အဝန်းတွေမှာ ဆိုးရွားတဲ့ ဘေးဥပဒ်ရန်များ ရနိုင်ပါသည်။ အကြမ်းဖက်ခြင်း၊ အနိုင်ကျင့်ခြင်းနှင့် လျစ်လျူရှုခြင်းသည် လူ့အဖွဲ့အစည်းအားလုံးတွင် ဖြစ်ပွားနိုင်ပါသည်။
သို့သော်လည်း ဆင်းရဲနွမ်းပါးပြီး အပယ်ခံကလေးများသည် ၎င်းတို့အား ကာကွယ်ပေးသည့် သို့မဟုတ် ကုထုံးများပေးမည့် ၀န်ဆောင်မှုများရရှိနိုင်ရန် ပိုမိုရုန်းကန်ရလေ့ရှိပါသည်။
- အသက် ၅-၁၅ နှစ်အရွယ် မြန်မာနိုင်ငံရှိ ကလေးအားလုံး၏ ထက်ဝက်ခန့်သည် ဆင်းရဲသော အိမ်ထောင်စုများတွင် နေထိုင်ကြပါသည်။
- ဤအသက်အုပ်စုရှိ ကလေး ၁.၂ သန်းခန့်သည် အလုပ်လုပ်နေကြပြီး မကြာခဏ အန္တရာယ်ရှိသော အခြေအနေများတွင် အလုပ်လုပ်ကြပါသည်။
- ဘုန်းတော်ကြီးသင် ပညာရေးကျောင်းများ၏ စောင့်ရှောက်မှုအောက်၌ ရှိသောကလေးများ အပါအ၀င် ကလေးသူငယ် ၂၅၀,၀၀၀ ခန့်သည် ကလေးစောင့်ရှောက်ရေး အဖွဲ့အစည်းဌာနများတွင် နေထိုင်ကြသည်။
ကလေးများ အများအပြားသည် ရွှေ့ပြောင်းနေထိုင်သူများ သို့မဟုတ် ပညာရေး သို့မဟုတ် အလုပ်အကိုင်များကိုရှာဖွေရန် မိမိတို့၏ အသိုက်အဝန်းမှ ပြောင်းရွှေ့နေကြသော မိသားစုများဝင်များနှင့်အတူ ထွက်ပြေးနေကြပါသည်။ မြန်မာနိုင်ငံလူဦးရေ၏ ငါးပုံတစ်ပုံခန့်သည် တစ်သက်တာ ရွှေ့ပြောင်းနေထိုင်သူများ ဖြစ်ကြပါသည်။ ၎င်းတို့နှင့်အတူ ရွှေ့ပြောင်းနေထိုင်သော ကလေးများသည် ပိုမို၍ အထိအခိုက်လွယ်ပါသည်။ တစ်ခါတစ်ရံ လူကုန်ကူးခံရခြင်း၊ အဓမ္မလက်ထပ်ခြင်း (သို့) စီးပွားဖြစ် လိင်ပိုင်းဆိုင်ရာ အမြတ်ထုတ်ခြင်းခံရခြင်း အန္တရာယ်တို့ပင် ကျရောက်တတ်ပါသည်။
မြန်မာနိုင်ငံတွင် ကလေးသူငယ် အများအပြား၏ အထိအခိုက်လွယ်မှုများသည် COVID-19 နှင့် လက်ရှိအကျပ်အတည်းကြောင့် ပိုမိုဆိုးရွားလာခဲ့ပါသည်။ ရလဒ်အနေနှင့် ကလေးများသည် လုံခြုံမှုမရှိတော့ပါ။
အလိုအပ်ဆုံးသော ကလေးများအား အကူအညီပေးရန် အခက်အခဲများနှင့် လူသားချင်းစာနာထောက်ထားမှု ၀န်ထမ်းများရင်ဆိုင်နေရသော အန္တရာယ်များ မြင့်တက်လာမှုသည် အရေးကြီးသော ကလေးသူငယ်ကာကွယ်စောင့်ရှောက်ရေး ၀န်ဆောင်မှုများပေးရန် ကြိုးပမ်းမှုများကို အဟန့်အတားဖြစ်စေပါသည်။
ဖြေရှင်းနည်း
အကူအညီ ရယူခြင်း
လျင်မြန်စွာတိုးတက်နေသော လူသားချင်းစာနာထောက်ထားမှု အခြေအနေကို တုံ့ပြန်သည့်အနေနှင့် ယူနီဆက်သည် မြန်မာနိုင်ငံတွင် ၎င်း၏ အလုပ်လုပ်ပုံကို လိုက်လျောညီထွေဖြစ်အောင် လုပ်ဆောင်လျက်ရှိပါသည်။ လိုအပ်နေသောသူများသည် အရေးကြီးသော၊ အရည်အသွေးရှိသော ကလေးသူငယ် ကာကွယ်စောင့်ရှောက်ရေး ၀န်ဆောင်မှုများကို အတိုင်းအတာတစ်ခုအထိ ရယူနိုင်စေရန် နိုင်ငံအတွင်းရှိ ကျွန်ုပ်တို့၏ ကျယ်ပြန့်သော အတွေ့အကြုံများနှင့် မိတ်ဖက် ကွန်ယက်များကို အသုံးပြုပါသည်။
- ကချင်၊ ကရင်၊ ရှမ်း၊ ချင်း၊ ရခိုင်ပြည်နယ် မြောက်ပိုင်းနှင့် အလယ်ပိုင်း၊ ရန်ကုန်နှင့် မန္တလေးဒေသများကို အထူးအာရုံစိုက်ကာ ကလေးကာကွယ်ရေး သတင်းအချက်အလက်များနှင့် ၀န်ဆောင်မှုများဖြင့် တစ်နိုင်ငံလုံးမှ ကလေးသူငယ်နှင့် လူကြီး လူဦးရေ တစ်သန်းကို လက်လှမ်းမီရန် ကျွန်ုပ်တို့ ရည်မှန်းပါသည်။
ဥပဒေရေးရာ အကူအညီ
ဥပဒေနှင့် ငြိစွန်းနေသော ကလေးများနှင့် လူငယ်များကို အရည်အသွေးရှိ ဥပဒေရေးရာ အကူအညီများ၊ အကြံဥာဏ်များ၊ အကြံပေးမှုများနှင့် ကိုယ်စားပြုမှုများကို ရရှိရန် ကျွန်ုပ်တို့ ကူညီလုပ်ဆောင်နေပါသည်။
- ဖေဖော်ဝါရီနှင့် ဇွန်လ ၂၀၂၁ ကြားတွင် ယူနီဆက် နှင့် ၎င်း၏ မိတ်ဖက်များသည် ကလေးနှင့် လူငယ် ၇၀၀ ကျော်အား ဥပဒေရေးရာ ၀န်ဆောင်မှုများပေးခဲ့ပါသည်။ ဆန္ဒပြပွဲများတွင် ပါဝင်ခဲ့သူအများစုကို ရာဇသတ်ကြီးပုဒ်မ ၅၀၅ (က) အရ တရားစွဲဆိုခဲ့ပါသည်။
- ဤအမှုများတွင် အနည်းဆုံး ကလေးရှစ်ဦးနှင့် လူငယ် ၁၆ ဦး သည် မြို့နယ်များရှိ စစ်အုပ်ချုပ်ရေး ဥပဒေအောက် စစ်ခုံရုံးများ၌ တရားရင်ဆိုင်နေရပါသည်။
- အားဖြည့်ထားသော ဖြစ်ရပ်စီမံခန့်ခွဲမှုစနစ်မှ တစ်ဆင့် ဥပဒေရေးရာ အထောက်အပံ့များ ရရှိသော ကလေးများ၏ ၂၀ ရာခိုင်နှုန်းခန့်သည် ဆေးကုသမှု၊ ကျန်းမာရေးစောင့်ရှောက်မှု၊ စိတ်ကျန်းမာရေးနှင့် စိတ်ပိုင်းဆိုင်ရာ လူမှုရေး ၀န်ဆောင်မှုများနှင့် မိသားစုပြန်လည်ပေါင်းစည်းရေး အကူအညီများအပါအ၀င် အထူးဖြစ်ရပ်ခန့်ခွဲမှု အထောက်အပံ့ကို ရရှိပါသည်။
- တစ်နိုင်ငံလုံး အတိုင်းအတာ တရားမျှတမှု ဖုန်းလိုင်းသည် ကလေးသူငယ်များနှင့် လူငယ်များကို အရည်အသွေးရှိ ဥပဒေရေးရာ အကြံဥာဏ်များကို အချိန်မီ ရရှိစေပါသည်။ ၎င်းနှင့်အတူ သတင်းအချက်အလက်ကို တိုင်းရင်းသားဘာသာစကားခြောက်မျိုးဖြင့် ဖြန့်ခဲ့ခြင်းသည် လူငယ်များအတွက် ၎င်းတို့၏ အခွင့်အရေးများနှင့် ဥပဒေရေးရာ အကူအညီများကို မည်သို့ရယူနိုင်ပုံကို ပိုမိုနားလည်စေရန် ကူညီပါသည်။
ပဋိပက္ခ အခြေအနေများရှိကလေးများ
ယူနီဆက်သည် ပဋိပက္ခများဖြစ်ပွားနေသော ဆယ်ကျော်သက်များအပါအ၀င် ကလေးငယ်များအား စိတ်ပိုင်းဆိုင်ရာ လူမှုရေးအကူအညီများ ပံ့ပိုးပေးပါသည်။ လက်လှမ်းမီမှု အကန့်အသတ်ရှိသည့် အခြေအနေများတွင် ယူနီဆက်သည် လူမှုအခွင့်အရေး ချိုးဖောက်မှုများအား လူထုအခြေပြု စောင့်ကြည့်လေ့လာမှု အားကောင်းလာစေရန် အစိုးရ၊ အစိုးရမဟုတ်သောအဖွဲ့အစည်းများနှင့် အရပ်ဘက် လူ့အဖွဲ့အစည်းများ၏ စွမ်းရည်ကို မြှင့်တင်ရန် ရင်းနှီးမြုပ်နှံပြီး ကလေးသူငယ် ကာကွယ်စောင့်ရှောက်ရေးအဖွဲ့များကို အရေးပေါ် ဘေးဒဏ်သင့်ဒေသများ၌ ထိန်းသိမ်းထားပါသည်။ ကျွန်ုပ်တို့၏ အတွေးအခေါ်ပိုင်းဆိုင်ရာ စွန့်စားမှု ပညာရေးသင်တန်းသည် ကလေးများနှင့် လူမှုအသိုင်းအဝိုင်းကို ပိုမိုလုံခြုံစေရန် ကူညီပါသည်။ လက်နက်ကိုင်တပ်ဖွဲ့များသို့ ကလေးစစ်သားစုဆောင်းခြင်းကို အဆုံးသတ်စေရန် ယူနီဆက်သည် ပါတီများအားလုံးနှင့် ဆက်လက်ပူးပေါင်းနေပါသည်။
ရွေ့လျားမှုလမ်းကြောင်းပေါ်က ကလေးများ
လူကုန်ကူးမှုတိုက်ဖျက်ရေးဦးစီးဌာန၊ မြန်မာရဲတပ်ဖွဲ့၊ လူမှုဖူလုံရေးဌာနတို့မှ ယူနီဆက်၏ နှစ်ရှည်လများစွာ ပူးပေါင်းဆောင်ရွက်မှုသည် ကလေးသူငယ်များ၏ အခွင့်အရေးနှင့် လိုအပ်ချက်များအပေါ် လူကုန်ကူးမှု ဥပဒေပြဌာန်းခြင်းနှင့် လူကုန်ကူးခြင်းဆိုင်ရာ လုပ်ထုံးလုပ်နည်းများ ဖွံ့ဖြိုးတိုးတက်ရေးကို သေချာစေရန် ဖြစ်ပါသည်။
လုပ်ဖော်ကိုင်ဖက်များနှင့်အတူ ယူနီဆက်သည် လူကုန်ကူးခံရသော ကလေးသူငယ်များ၏ အခွင့်အရေးနှင့် လိုအပ်ချက်များကို ဖြေရှင်းရန် သင့်လျော်သော ဥပဒေများနှင့် လုပ်ထုံးလုပ်နည်းများ ဖွံ့ဖြိုးတိုးတက်ရေးကို ကူညီပံ့ပိုးနေပါသည်။ ၂၀၁၇ခုနှစ်တွင် ယူနီဆက်သည် အမျိုးသမီးများနှင့် မိန်းကလေးများအား တရုတ်နိုင်ငံသို့ လူကုန်ကူးမှုကို တားဆီးရန် ရည်ရွယ်သည့် ဆက်သွယ်ရေးနှင့် သတင်းအချက်အလက်များကို ထောက်ပံ့ပေးခဲ့ပါသည်။ ထိုနှစ်တွင်ပင် လူကုန်ကူးခံရသူ ၁၃၀ သည် လူ့အဖွဲ့အစည်းအတွင်းသို့ ပြန်လည်ပေါင်းစည်းခဲ့ပါသည်။
စိတ်ပိုင်းဆိုင်ရာ လူမှုရေးအကူအညီ
ယူနီဆက်သည် မြန်မာနိုင်ငံတွင် စိတ်ပိုင်းဆိုင်ရာ အကူအညီလိုအပ်နေသော ကလေးငယ်များအား ထောက်ပံ့ပေးနေပါသည်။
ဤအရာများတွင် ဖြစ်ရပ်စီမံခန့်ခွဲမှု ၀န်ဆောင်မှုများနှင့် အလွဲသုံးစားခံရမှုများ၊ အကြမ်းဖက်မှုများမှ အသက်ရှင်ကျန်ရစ်သူများအတွက် တစ်ဦးချင်းဆွေးနွေးတိုင်ပင်မှု အချိန်များပေးသည့် စိတ်ကျန်းမာရေး ကျွမ်းကျင်သူများထံသို့ ညွှန်ပေးခြင်းတို့ ပါဝင်ပါသည်။
ဆယ်ကျော်သက်များနှင့် လူငယ်များအတွက် ပြင်းထန်သော စိတ်ဖိစီးမှုများကို ရင်ဆိုင်ရန် အာရုံစိုက်သော ရွယ်တူအားပေးသည့် အုပ်စုများကို ရှေ့ပြေးစမ်းသပ်ခဲ့ပြီး ချဲ့ထွင်ဆောင်ရွက်လိမ့်မည် ဖြစ်ပါသည်။
၂၀၂၁ ခုနှစ်၊ မေလတွင် ယူနီဆက်သည် စိတ်ကျန်းမာရေးနှင့် စိတ်ပိုင်းဆိုင်ရာ လူမှုဆက်ဆံရေး အထောက်အပံ့များကို ကလေး ၁၉,၂၀၀ ကျော်နှင့် မိဘ ၄,၂၀၀ ကျော်ကို ပေးအပ်ခဲ့ပါသည်။
- အမျိုးသားစိတ်ကျန်းမာရေးနှင့် လူမှုဆက်ဆံရေးဆိုင်ရာ အကြံဥာဏ် အကူအညီပေးသည့် ဖုန်းလိုင်းသည် တိုင်းရင်းသားဘာသာစကားများစွာဖြင့် ကလေးများအား ထောက်ပံ့ပေးပါသည်။ ၂၀၂၁ ခုနှစ် ဖေဖော်ဝါရီလ မှစ၍ ခေါ်ဆိုမှု အရေအတွက်သည် ၁၇၄ ခုအထိ ပိုမိုများပြားစွာ တိုးလာပြီး အများစုမှာ ပြင်းထန်သော စိတ်ပိုင်းဆိုင်ရာ ဒုက္ခခံစားနေရသော လူငယ်များမှ ဖြစ်ပါသည်။ အကူအညီရယူလိုသူများထဲမှ ၁၃၄ ဦး သည် အထူးပြုအကြံဥာဏ်အချိန်များကို ဆက်လက်ရယူခဲ့ပါသည်။
- ၂၀၂၁ ခုနှစ် ဇန်နဝါရီလမှ ဇွန်လအတွင်း ကလေးသူငယ် ၂,၉၀၀ ကျော်သည် ကလေးသူငယ်ကာကွယ်စောင့်ရှောက်ရေး အထောက်အပံ့ကို ရရှိခဲ့ပါသည်။
ကလေးသူငယ် ကာကွယ်စောင့်ရှောက်ရေးနှင့် တိုးချဲ့ရေး
ယူနီဆက်သည် လက်ရှိ၀န်ဆောင်မှုများကို ဆက်လက် ထိန်းသိမ်းထားရန် မိတ်ဖက်များကို ပံ့ပိုးပေးနေစဉ်တွင် မြန်မာနိုင်ငံအရှေ့တောင်ပိုင်းနှင့် ချင်းပြည်နယ်ကဲ့သို့သော လူသားချင်းစာနာထောက်ထားမှုဆိုင်ရာ တည်နေရာအသစ်များသို့ ကလေးသူငယ် ကာကွယ်ရေး ၀န်ဆောင်မှုကို အရေးပေါ် တိုးချဲ့လုပ်ဆောင်နေပါသည်။
ဤလုပ်ငန်းတွင် ကလေးသူငယ် ကာကွယ်စောင့်ရှောက်ရေးပစ္စည်းများ ဖြန့်ဝေခြင်း၊ အသိပညာပေးခြင်းနှင့် ဖြစ်ရပ်စီမံခန့်ခွဲမှု ၀န်ဆောင်မှုများနှင့် မြန်မာနိုင်ငံတွင် ကလေးသူငယ်ကာကွယ်စောင့်ရှောက်ရေးကို ပံ့ပိုးပေးသည့် ကျွန်ုပ်တို့၏ ကြာရှည်ပြီဖြစ်သောအတွေ့အကြုံကို လိုက်လျောညီထွေဖြစ်အောင် ဆက်လက်ဆောင်ရွက်ခြင်းတို့ ပါ၀င်ပါသည်။
- ၂၀၂၀ တွင် မိန်းကလေး၊ ယောက်ျားလေးနှင့် အမျိုးသမီး ၁၈,၃၀၀ ကျော်သည် ယူနီဆက် မှ ပံ့ပိုးပေးသော အသိပညာပေးခြင်းနှင့် အသက်ရှင်ကျန်ရစ်သူ အကူအညီများအပါအ၀င် ကျားမအခြေပြု အကြမ်းဖက်မှုဆိုင်ရာ ဝန်ဆောင်မှုများကို ရရှိခဲ့ပါသည်။ ရခိုင်ပြည်နယ်၊ ကချင်နှင့် ရှမ်းပြည်နယ်တို့တွင် ကလေးသူငယ်ကာကွယ်စောင့်ရှောက်ရေး ၀န်ဆောင်မှုများနှင့် အထောက်အပံ့များကို ပဋိပက္ခဒဏ်ခံကလေးငယ် စုစုပေါင်း ၆၃,၄၅၀ ဦး ရရှိခဲ့ပါသည်။
အရေးတကြီး လိုအပ်နေသည့် အချိန်များတွင် ယူနီဆက် နှင့် မိတ်ဖက်များသည် ကလေးသူငယ်များကို ကာကွယ်စောင့်ရှောက်ပေးသော ၀န်ဆောင်မှုများကို အတိုင်းအတာအထိ ဖြန့်ဖြူးရေးအတွက် သေချာစေရန် ကြိုးပမ်းမှုများကို ထပ်တိုးလုပ်ကိုင်နေပါသည်။
ကလေးများသည် မြန်မာနိုင်ငံ၏ အနာဂတ်ဖြစ်ပါသည်။ ၎င်းတို့အား အန္တရာယ်ကင်းစွာ ကာကွယ်၍ ၎င်းတို့၏ အခွင့်အရေးများကို ကာကွယ်ထားရပါမည်။
