Цочролд хариу үзүүлэх нийгмийн хамгааллын тогтолцоо
МУ-ын ЗГ болон НҮБ-ын Хүүхдийн Сан хамтран “Цочролд хариу үзүүлэх нийгмийн хамгааллын тогтолцоо”-г бэхжүүлэх чиглэлээр хамтран ажиллаж байна.
НҮБ-ын Хүүхдийн Сан Монгол Улсын Засгийн газартай сүүлийн жилүүдэд цочролд хариу үзүүлэх нийгмийн хамгааллын тогтолцоог бэхжүүлэх чиглэлээр хамтран ажиллаж байна. Уур амьсгалын өөрчлөлтийн улмаас Монгол Улсад газар хөдлөлт, ган гачиг, үер, хүчтэй салхи зэрэг байгаль цаг уурын гамшиг, цочролын хамрах хүрээ, давтамж улам нэмэгдэж байна. Энэхүү уур амьсгалын өөрчлөлттэй холбоотой цочролд хүүхэд гэр бүл, ялангуяа, алслагдмал орон нутагт амьдарч буй хүүхэд, гэр бүл илүү өртөж, судалгаагаар энэ нь хүүхдийн өсөлт, хөгжилд урт хугацааны сөрөг нөлөөтэй болох нь тогтоогдсон. Нөгөө талаар Монгол Улсын нийгмийн хамгааллын тогтолцоо нь аливаа гамшиг, цочролын үед хүүхэд гэр бүлийг хамгаалахад бэлэн бус байсан тул НҮБ-ын Хүүхдийн Сангаас 2019 оноос эхлэн Засгийн газарт дэмжлэг үзүүлэн хамтран ажиллаж эхэлсэн. Дэлхий дахиныг хамарсан КОВИД-19 цар тахал улс орнуудын нийгмийн хамгааллын тогтолцоо нь цочролд хариу үзүүлэхэд бэлэн байх хэрэгцээ байгааг баталгаажуулсан.
Цочролд хариу үзүүлэх нийгмийн хамгааллын тогтолцоог бэхжүүлэх ажлын хүрээнд ХНХЯ болон НҮБ-ын Хүүхдийн Сан хамтран хэрэгжүүлсэн үйл ажиллагааны талаарх мэдээлэл, хийгдсэн судалгааны үр дүн зэргийн энэхүү хүргэж байна.
Цочролд хариу үзүүлэх нийгмийн хамгааллын туршилтын арга хэмжээ
Уур амьсгалын өөрчлөлтийн улмаас Монгол Улсад зудын давтамж, хамрах хүрээ, эрсдэл улам нэмэгдэж байна. Зудын улмаас хүүхдүүд боловсрол, эрүүл мэндийн үйлчилгээ авч чадахгүй байх, шаардлагатай хоол тэжээлээр дутагдах зэрэг асуудалд өртдөг боловч тус улсын нийгмийн хамгааллын тогтолцоо зудын эрсдэлээс урьдчилан сэргийлэх, хариу арга хэмжээ авахад чиглэсэн эрх зүйн орчин, зохицуулалтгүй байна. Тиймээс НҮБ-ын Хүүхдийн Сан зудын үед хөдөө орон нутгийн хүүхдэд чиглэсэн цочролд хариу үзүүлэх нийгмийн хамгааллын арга хэмжээний туршилтыг 2019-2020 онд хэрэгжүүлсэн. Энэхүү туршилтыг Завхан аймгийн ЗДТГ-тай хамтран тус аймгийн хөдөөгийн сумдын 0-5 насны хүүхдүүдийг хамруулан хэрэгжүүлж, цаашид цочролд хариу үзүүлэх нийгмийн хамгааллын тогтолцоог бэхжүүлэхэд шаардлагатай нотолгоо, сайн туршлагыг бий болголоо.
Засгийн газраас хэрэгжүүлж буй Хүүхдийн мөнгөн тэтгэмж, Хүнсний эрхийн бичгийн нэмэгдлийн хэрэгжилтэд хийсэн үнэлгээ
Монгол Улсын Засгийн газраас Ковид-19 цар тахлын эсрэг нийгмийн хамгааллын багц арга хэмжээ авсны дотор Хүүхдийн мөнгөн тэтгэмжийн хэмжээг ердийнхөөс 5 дахин (нэг хүүхдэд сард 20 000 төгрөг байсныг 100 000 төгрөг болгож) нэмэгдүүлэн бүх хүүхдэд олгосон нь бусад арга хэмжээтэй харьцуулахад хамгийн үр дүнтэй арга хэмжээ болсон. Энэхүү арга хэмжээг хэрэгжүүлэхэд ХНХЯ, НҮБ-ын Хүүхдийн Сангийн хамтран хэрэгжүүлсэн хүүхдэд ээлтэй цочролд хариу үзүүлэх нийгмийн туршилтын арга хэмжээнээс бий болсон туршлага, сургамжид үндэслэсэн юм. Багц арга хэмжээний өрх, хүн амд чиглэсэн бас нэг хөтөлбөр нь Хүнсний эрхийн бичиг байв. Хүнсний эрхийн бичгийн мөнгөн дүнг 2 дахин нэмэгдүүлж насанд хүрсэн хүнд 32000 төгрөг, хүүхдэд 16000 төгрөгөөр тодорхой хугацаанд олгосон. Эдгээр арга хэмжээнүүдийг хэрэгжүүлэхэд гарч буй ололт, сургамж, алдаа дутагдлыг олж тогтоох, цаашид сайжруулах шийдлийг олохын тулд тухай бүрд мониторинг, судалгааг хийж байсан бөгөөд энэхүү хуудсаар дамжуулан Гол тайлан, материалуудыг хүргэж байна.
- МУЗГ-с КОВИД-19 цар тахлын үед хэрэгжүүлсэн ХМТ, ХЭБ хөтөлбөрийн хэрэгжилтийн үнэлгээний тайлан, 1-р шат (2020)
- Assessment of the Government of Mongolia’s Shock-Responsive Vertical Expansion of Social Assistance in Response to Covid-19
- МУЗГ-с КОВИД-19 цар тахлын үед хэрэгжүүлсэн ХМТ, ХЭБ хөтөлбөрийн хэрэгжилтийн үнэлгээний тайлан, 2-р шат (2021)
