Ny fihaonan'ireo mpamatsy tolotra sy ny UNICEF dia mampiroborobo ny zon'ny ankizy
Mpamatsy tolotra maherin'ny 150, izay voarakitra ao anatin’ny lahatahiry vaovaon'ny UNICEF ankehitriny, no naneho ny fahavononan’izy ireo hanohana ny UNICEF bebe kokoa amin'ny fanatanterahana ny andraikiny eto Madagasikara.
Tamin'ireo fiantsoana tolo-body navoakan’ny Sampana Famatsiana ao amin’ny UNICEF Madagascar tato anatin'ny volana vitsivitsy, dia mpamatsy tolotra vitsivitsy ihany no nahavita nametraka antontan-tataratasy feno sy azo ekena, araka ny fepetra takian’ny dingana napetraka teo anivon’ny UNICEF. Misy ampahany amin’izy ireo no mijanona antenantenany kanefa dia tsy fantatry ny UNICEF akory ny sakana nahazo azy ireo mba ahafahana mamaha ny olana. Ny sasany amin’ireo mpamatsy tolotra ireo indray dia milaza fa tsy nahalala mialoha ireo tsena misokatra ireo, ka misy fiantraikany mafy amin'ny isan'ny tolora voaray izany.
Na izany aza, zava-dehibe ny fandraisan'anjaran'ny sehatra tsy miankina eo an-toerana mba hanomezana fahafaham-po ny filàn'ireo mpahazo tombontsoa amin'ny UNICEF, amin'ny lafin’ny famatsiana entana, tolotra na asa. Izay no antony nikarakarana ny varavarana misokatra tamin’ny 28 oktobra lasa teo: fotoana izay nahafahana nihaona sy nifanakalo hevitra tamin’ireo mpiara-miombon’antoka manan-danja ireo ary nandray anjara miaraka tamin’ny fanatanterahana ny fandaharan’asan’ny UNICEF eto Madagasikara amin’ny fomba mahomby. Nampahatsiahivina ireo orinasa an-jatony nanatrika izany fotoana izany ireo foto-kevitra lehibe mifehy ny fiamatsiana entana ao amin’ny Firenena Mikambana (ONU) sy ny UNICEF, ary koa ny fanentanana momba ny fitsipi-pitondran-tena eo anivon’ny Firenena Mikambana sy ny fomba amam-panao tompon’andraikitra.
Nampisehoina tamin’izany ny kalitaon’ny tolotra voaomana tsara mba hampitomboana ny herijika mety hahazoana tsena ary handraisana miaraka ireo dingana rehetra. Naseho ihany koa ny fandefasana tolo-bidy amin'ny alàlan'ny sehatra UNGM, izay manamafy ny fomba fiasa nomerika ho an’ny dingana rehetra sy ny fandraisana ireo angona elektronika irery ihany. "Vonona ny hiaino sy hanampy anareo tanteraka izahay mba hahazoana antoka fa afaka mandefa tolo-bidy amin'ny fotoana mampety azy indrindra ianareo," hoy ny ekipan'ny Sampana famatsiana.
Ny fahazoana ireo mpamatsy tolotra kinendry dia vokatry ny fanadihadiana momba ny tsena natao teny am-piandohana mba hanavaozana ny angon-drakitra sy hahazoana antoka fa ananana hatrany ireo fahalalana mazava sy farany indrindra mahakasika ny tsena eo an-toerana. “Ankoatra ny fitondrana fanazavana sy ny fifampidinihana ary fanitsiana izay mety ho tsy fifankahazoan-kevitra momba ireo fitaovana, ilay varavarana misokatra ihany koa dia fotoana iray nampahatsiahivana fa zava-dehibe ny fandraisan’anjaran’ireo orinasa tsy miankina amin’ny fampahafantarana ireo zava-baovao lehibe eo amin’ny sehatra misy azy ireo. Ny fahaiza-manaon'izy ireo dia tena ilaina tokoa satria ny vokatra vaovao sy ny tolotra vaovao dia mety hahaliana hatrany mba hamaliana ireo filàna amin'ny fomba mahomby," hoy i Anne Cabrera-Clerget, Lehiben’ny Sampana Famatsiana ao amin'ny UNICEF Madagascar. Ny olana mifandraika indrindra amin'ny tontolo iainana, ny fiovaovan'ny toetr'andro na koa ny rano, ny fahadiovana ary ny fidiovana dia sehatra lehibe izay tian'ny UNICEF hanatanterahana asa goavana.
Nanararaotra ny fifanakalozan-kevitra tamin'ireo orinasa tsy miankina ihany koa ny UNICEF mba hanasongadinana ny fotopoto-pitsipika ananany mahakasika ny fandraisana andraikitra sy ny mangarahara amin’ny fanatanterahana ireo dingana ilaina amin’ny fividianana entana. Naseho ihany koa ny fomba fanao mahakasika ny fandraharahana tompon’andraikitra mifandraika amin’ny lafin’ny zon’olombelona, toy ny miralenta, ny fampiatiana ireo olona manana fahasembanana, ny zon’ny ankizy izay manantitrantitra ny fampiasana zaza tsy ampy taona ary koa ny fisorohana ny fanararaotana sy ny fanorisorenana ara-nofo. “Mizara izany izahay satria tena zava-dehibe ny fampahafantarana ny mpiara-miombon’antoka sy ny fanarahan’izy ireo ny fitsipika rehetra; natao izany mba hampifanaraka azy io amin’ny maha mpiara-miombon’antoka amin’ny UNICEF azy ireo,” araka ny voalaza.
