Ny asa eo amin'ny sehatra sosialy dia zavatra tiana manokana ary fanoloran-tena ho an’ny hafa.
Tena misy tokoa ankehitriny ny fanamaroana ireo asa amin'ny sehatry ny asa sosialy, araka ny hita amin’ny alàlan’ireto vehivavy mpiasa sosialy efatra ireto izay manome aingam-panahy ny asan’izy ireo.
Hary Ny Ony Dimbisoa : mpiasa sosialy, miasa manokana amin’ny sehatry ny fiahiana ny zaza
Hary Ny Ony Dimbisoa dia tia manampy ny hafa. Mpiasa sosialy ao amin’ny toby fialofana fandraisana vonjy taitra ao amin’ny kaominina andrenivohitr’Antananarivo izy, ary lehiben’ny sampan-draharaha misahana ny fiahiana ny ankizy.
Miovaova sy mitaky zavatra betsaka ny asany andavanandro. Mandray sy manaraka ireo ankizy napetraka ao amin'ilay toby fandraisana vonjy taitra izy ary manome fanohanana ara-tsaina, ara-pitsaboana sy eo amin’ny sehatry ny lalàna. Ankoatra izany, mitantana ireo tranga tsirairay izy, mitazona ny angon-drakitra eo anivon’izany toby izany, mamolavola ny fiaraha-miasa amin'ireo mpisehatra ara-tsosialy hafa, ary mamorona fitaovana ilaina amin'ny asa. Mihoatra noho ny fitantanana ny fampandehan-draharaha ny asa sahaniny; manara-maso ireo mpitantana ny tranga ihany koa izy ary misolo tena ny toby any amin'ireo karazana fivoriana, seminera ary atrik’asa.
Ny fidirany an-tsehatra amin'ny asany dia nohamafisin'ny fahafahany manatanteraka asa izay nofidiny sy nanolorany tena. Ny làlana nizorany dia tena miendrika ohatra amin’ny resaka fahaiza-mitantanana eo amin’ny sehatry ny asa sosialy, izay ampiharany ny fahaiza-manaony entina manatsara ny fiainan'ny ankizy ao anatin'ny toe-javatra marefo sy mampiroborobo ny zon'olombelona eo amin'ny fiaraha-monina misy azy.
Razafinatolojanahary Mirana Tsylavina : mpanabe manana fahaizana manokana
Mirana Tsylavina Razafinatojanahary dia mpanabe manana fahaizana manokana ary tena tia fatratra ny asany. Mpanabe manokana eo anivon’ny kaominina Antananarivo renivohitra (CUA) izy. Ny fandraisany andraikitra dia mifantoka amin'ireo olona tena sahirana, indrindra fa ny ankizy. Mbola manohy fiofanana manokana amin'ity sehatra ity izy, ary mifantoka bebe kokoa amin’ireo ankizy eny an-dalambe izany.
Ao anatin’ny asa iandraiketany ny fanaraha-maso ny hetsika ara-sosialy sy ara-panabeazana ao amin’ny toby fandraisana vonjy taitra ary ny fandraisana an-tànana ny laharana maitso 147. Ankoatra izay dia mitarika ny sampana misahana ireo ankizy eny an-dalambe eo anivon’ny CUA izy ary manome fanohanana lehibe amin’ny fametrahana toerana fandraisana ho an'ireo ankizy ireo, miaraka amin’ny tetikasa sy ONG samihafa. Mandray anjara amin’ny fanatanterahana ny drafitr’asa sy ny drafitra fanaraha-maso ny sampana miandraikitra ny ankizy ao amin’ny CUA ihany koa izy.
Andraikiny ihany koa ny mampivelatra ny fifandraisana eo amin'ireo mpisehatra voakasika mba hanamafisana ny fiaraha-miasa sy hampitomboana araka izay tratra ny fiantraikan'ny asany amin’ny fiaraha-monina mampiaty sy ara-drariny kokoa.
Hefariniaina Marina Rakotonirina: injeniera amin’ny hetsika ara-tsosialy
Hefariniaina Marina Rakotonirina, amin’ny maha-matihanina amin’ny asa sosialy azy, dia mikendry ny hitondra fiovana ho an’ireo tena marefo. Nohon’ny fananany Master II amin'ny asa sosialy sy diplaoma Injeniera amin’ny hetsika sosialy azy dia miezaka manasongadina ny maha-zava-dehibe io sehatra io izy.
Amin’ny maha lehiben’ny Sampan-draharahan’ny fiahiana ara-tsosialy eo anivon’ny Fiadidiana ny asa socialy sy ny fahasalamana (DAAS) ao amin’ny kaominina Antananarivo renivohitra azy dia manolo-tena ho amin’ny fiarovana ireo olona marefo izy mba hahafahana manome azy ireo toe-piainana tsara kokoa.
Amin'ny maha-lehiben’ny sampan-draharaha azy dia mitantana sy mandrindra ary manatanteraka hetsika ara-tsosialy ao amin'ny DASS izy, ka mampiroborobo ny fiaraha-mientana sy ny firaisankina eo anivon'ny ekipany izany. Ho fanampin’izany, miara-miasa akaiky amin’ireo lehiben’ny sampana hafa izy amin’ny fanatrarana ny tanjona iombonan’ny Fiadidiana.
Sabrinah Morea Ndjvee: mpiasa sosialy, manam-pahaizana manokana amin'ny sehatry ny asa sosialy sy ny fampandrosoana
Sabrinah Morea Ndjvee dia manam-pahaizana manokana amin'ny sehatry ny asa sosialy sy ny fampandrosoana. Manana mari-pahaizana Licence amin'ny asa sosialy sy fampandrosoana – miaraka amin’ny mari-pahaizana manokana amin’ny maha-mpiasa sosialy izy, ary manana mari-pahaizana Master momba ny politika ara-tsosialy sy ny fampandrosoana ihany koa, izay mifantoka amin'ny politika mikasika ny fanabeazana sy ny kolontsaina ary ny fampandrosoana maharitra.
Ny nanosika azy hanohy ity asa ity dia ny tsy fahampian'ny fanohanana ireo olona manana fahasembanana tsy hita maso toy ny « autisme » na olana amin’ny famakian-teny, izay manakana azy ireo tsy hisitraka ireo tolotra ara-tsosialy fototra, indrindra ny fanabeazana.
Amin’ny maha tompon’andraikitry ny hetsika ao amin’ny Fikambanana KOLOAINA azy, i Sabrinah dia mampihatra ny fahaiza-manaony amin’ny lafin’ny famolavolana sy fanatanterahana hetsika manokana mifanaraka amin’ny filàn’ny fianakaviana. Manolotra fanohanana fianakaviana izy ary mikarakara fiofanana ho an'ireo reny mpahazo tombontsoa, amin’ny alàlan’ny fanomezana azy ireo fitaovana ilaina mba hanohanana bebe kokoa ny fianakaviany sy hidirany tanteraka eo anivon’ny fiaraha-monina. Asehon'i Sabrinah araka izany ny fanoloran-tenany hanatsara ny kalitaon'ny fiainan'ireo mponina voahilikilika sy hampiroborobo ny fampandraisana anjara azy ireo amin’ny lafiny sosialy.
