Malaza eny anivon’ireo fokontany ny fitiliana ny homamiadan’ny vozon-tranonjaza
Any Mahambo any atsinanan'ny nosy, ny hafanam-pon'ny vehivavy amin'ny fitiliana ny homamiadan'ny vozon-tranonjaza vokatry ny fampivoarana ny fahaiza-manaon’ireo mpanentana ara-pahasalamana sy ny fanentanana ny fiarahamonina
« Navelako avokoa ny asa eny an-tsaha rehetra tokony nataoko androany mba nahafahako nandeha aty, » hoy i Dimache, 46 taona ary manan-janaka efatra, izay efa lehibe ny roa ary mbola mianatra ny roa.
Tamin’io andro io tokoa mantsy no notanterahina tao amin’ny tobim-pahasalamana fototra (CSB) Mahambo, any atsinanan’i Madagasikara, ny fiofanana fampiharana ny fampivoarana ny fahaiza-manaon’ireo mpanentana ara-pahasalamana eny an-toerana mahakasika ny fandraisana an-tanana ny herisetra ara-nofo sy ny fisorohana ny homamiadan’ny vozon-tranonjaza amin’ny alàlan’ny VIA/cryotherapy (Fijerena mivantana ny vozon-tranonjaza aorian'ny fandrarahana acide acétique, izay arahina fitsaboana ny faritra tsy salama eo amin'ny vozon-tranonjaza amin'ny alàlan’ny fampiasana singa mangatsiaka raha ilaina). Efa nampiomanina sy nentanina mialoha ny mponina manodidina mba ho avy hanao fitiliana ny homamiadan’ny vozon-tranonjaza.
« I Odette, mpanentana ara-pahasalamana ao an-tanànanay no nampilaza taminay mba ho tonga eny amin’ny CSB mba hahafahanay manao fitiliana. Mavitrika tokoa izy, manome vaovao anay ary mampahafantatra anay zavatra maro hatrany izy, » hoy i Dimache sady nitsiky. « Tsy isan’andro rahateo no misy toe-javatra fanararaotra tahaka izao. Ho eo foana ny tanimbolintsika, fa tsy mitranga matetika ny hetsika manakaiky ny tanànantsika toy izao, » hoy izy.
Tetsy an-danin’izany, dia samy faly avokoa ireo mpanentanana ara-pahasalamana nanatrika ny fiofanana noho ny hamaroan’ireo vehivavy tonga tamin’ity hetsika fitiliana ity. Raha nikarakara ny fanentanana sy ny fampahafantarana ho an’ny andiam-behivavy ny sasany tamin’izy ireo, ny sasany kosa indray dia nanatanteraka famotorana savaranonando tamin'ny alàlan’ny famenoana ny taratasy mialoha ny handraisana ny vehivavy tsirairay ho an'ny fitiliana azy ireo.
« Natahotra izahay hoe tsy hisy olona hanao fitiliana eny amin’ny CSB androany, » hoy ny ankamaroan’ireo mpanentana ara-pahasalamana, « noho izany dia tena mahatsiaro maivamaivana izahay ; ary tena nilainay tokoa io lohahevitra fanofanana io. »
Ao anatin’ny tetik’asa 1000 andro voalohan’ny zaza, izay vatsian’ny TAKEDA vola no nahafahana nanatontosa izany fanamafisana ny fahaiza-manaon’ireo mpanentana ara-pahasalamana avy amin’ny distrika rehetra manerana ny faritra izany.
