Fiahiana ara-pahasalamana mahakasika ny rano ao amin'ny tanànan'i Beroy Nord, any atsimo
Mampihena ny fandaniana ara-bola ny fiarovana sy fitahirizana rano fisotro madio
Ny tanànan'i Beroy Nord no fototry ny fampidiram-bola lehibe indrindra ho an'ny kaominina misy azy any amin’ny faritra atsimon'i Madagasikara. Manana loharano hafa ambanin'ny tany izy io, ary nanomboka tamin'ny taona 2017 dia nisy tobin-drano sy zaridaina fambolena legioma naorina tao.
Tamin'ny volana May 2022, niara-niasa tao amin'ity tanàna ity ny UNICEF sy ny ONG SAHI, mpiara-miombon'antoka eo an-toerana mba hanentanana sy hanohanana ireo vondrom-piarahamonina mahakasika ny fampiasana ny tobin-drano.
Raha vantany vao misy ny fahafahana, i Sana, manambady ary manan-janaka efatra, dia tsy mitsahatra manentana ireo mpiara-monina aminy momba ireo fahazarana tokony ananana mba hiarovana ny rano amin'ny loto ary hisorohana ny fisotroana rano tsy azo antoka, ka mety hiteraka aretim-pivalanana, izay efa nahazo ny zanany ihany koa teo aloha. Vao haingana ary noho ny fandraisan'andraikitr’i Sana, ny vondrom-piarahamonina ao an-tanàna dia nisitraka « fiahiana ara-pahasalamana amin'ny lafin’ny rano ao amin'ny tanànan'i Beroy Nord ». Ny fanentanana toy izany dia tsy vitan'ny hoe nanome fiainana ara-pahasalamana sy azo antoka, fa nanampy ihany koa tamin'ny fanovana ny fahazaran'ny mponina, indrindra ny zanak’izy ireo.
Tena nandrisika tsy nisy toy izany an’i Sana ny tombontsoa azo avy amin’ny toerana fanovozana rano ka nilaza izy hoe: « Fantatro ny maha zava-dehibe ny fitahirizana tsara ny rano entina misoroka ny aretim-pivalanana ». Nanaiky ny hamerimberina hatrany ity hafatra ity amin'ireo mpiara-monina aminy izy raha vao misy ny fahafahany manao izany. « Zava-dehibe ny fampiharana ireo fomba fanao tsara sy ireo hafatra fototra momba ny fahadiovana sy ny fidiovana mba hampaharitra ny fiarovana ny rano ».
