Fampiharana ireo « hafatra fototra efatra mikasika ny WASH », fiainana andavanandro ara-pahasalamana
Ireo fomba fanao tsara mifandraika amin’ny hafatra fototra 4 mikasika ny WASH teo anivon’ny tobim-pahasalamana Belafika Haut dia nanova ny fahazaran’ny mponina ary nampiakatra ny heri-tsain’izy ireo, indrindra ireo marary
Tsy manana rano fisotro mandritra ny taona ny tobim-pahasalamana Belafika Haut ao amin’ny distrikan’Ampanihy, any amin’ny faritra atsimon’i Madagasikara, raha tsy amin’ny fotoanan’ny orana, noho ny faritra ara-jeografika misy azy izay tany ngazana.
Ireo marary mahazo fitsaboana avy ao amin'io tobim-pahasalamana io dia manana loharano hafa amin'ny rano ambanin'ny tany. Tokony ho 5 taona teo ho eo izay no nametrahan’ny ONG Action Contre la Faim tobin-drano izay efa simba amin’izao fotoana izao na dia misy paompy sy voafefy tsara aza izany. Amin’izao fotoana izao, ireo mpiasan’ny tobim-pahasalamana sy ireo marary dia misintona rano amin’ny fantsakana, 50 metatra miala ilay tobim-pitsaboana.
Tamin'ny taona 2022, ny UNICEF sy ny ONG SAHI dia nandray anjara tamin'ny hetsika “fomba fiasa kintana”, izay mikendry ny hampiroboroboana ny fampiharana isan'andro ireo hafatra fototra efatra momba ny fidiovana sy ny fanadiovana, anisan'izany ny fampiasana lavapiringa madio, ny fanasana tanana amin'ny savony amin'ny fotoan-tsarotra, ny fisotroana rano madio ary ny fitantanana ny fahadiovana mandritra ny fadimbolana. Vao haingana izany, ary vokatr’ilay fomba fanao mifandraika amin’ny « hafatra fototra efatra mikasika ny WASH ho an'ny fahasalamana tsara sy ny fiainana ara-pahasalamana ». Ireo fomba fanao ireo ihany koa dia ahafahana manombana ilay tobim-pahasalamana araka ny ambaratonga telo voatondro amin’ny alàlan’ny kintana.
Rehefa mandeha ny fotoana dia tsy vitan’ny hoe manome fiainana azo antoka sy mahasalama kokoa ny fampiharana ireo hafatra fototra efatra eny anivon’ny tobim-pahasalamana, fa manampy ihany koa amin’ny fanovana ny fahazarana sy ny fomba fanao amin’ny lafiny fidiovana eny anivon’ny fokontany, tanàna ary ny kaominina manontolo mihitsy aza. Ny vondrom-piarahamonina sy ireo mpanentana ara-pahasalamana ary koa ireo marary, tamin’ny fizaham-pahasalamana mandritra ny fitondrana vohoka, dia nahazo fiofanana tamin’ny “Bien Vive” mba hiantohana fomba fanao tsara mahakasika ity tombontsoa voajanahary ity.
Nentanin’ny vokatra azo tamin’ireo fahazarana feno fahasahiana ireo ity mpampivelona ity ka nilaza fa: « Ny fampiharana isan’andro ireo hafatra fototra efatra momba ny WASH, izay mamintina ireo fomba fanao tsara mikasika ny fidiovana tokony hatao isan’andro, dia ahafahantsika manana fahasalamana tsara, izay hijoroako vavolombelona ». Amin’ny maha teboka infantohan’ny fampitana hafatra eo anivon’ny tobim-pahasalamana, ny “Bien Vive” dia manaiky ny hanentana tsy tapaka ny mpiara-monina aminy, voalohany indrindra amin’izany ireo marary ao aminy, mahakasika ny fitandroana ny fahadiovana eny anivon’ny kaominina, mba ho voaaro amin’ny voka-dratsin'ny loto ny mponina, indrindra ireo ankizy. « Vokatry ny tombotsoa azo avy amin’ireo hafatra fototra 4 izay tsapan’ny mpanentana ara-pahasalamana dia nanomboka nampihatra azy ireny ireo marary sy ireo renim-pianakaviana tamin'ny fiainany andavanandro. »
