Eto Madagasikara, ilaina ny fitsaboana manakaiky vahoaka anatin’ny fotoan-tsarotra

« Tena nahatsiaro maivana izahay nohon’ny fahatongavan'ireo mpiasan'ny fahasalamana eto amin'ny tanàna misy anay mba hitsabo anay ary miaraka amin’ny fanafody maimaim-poana, indrindra taorian’ny fandalovan’ny rivodoza Batsirai sy Emnati », hoy ity renim-pianakaviana antsoina hoeTsofiazy ity, izay tonga nitsabo ny zanany vavikely, Angèle, 12 volana, teny amin’ny tobim-pahasalamana mandehandeha etsy amin’ny toby Imanombo, any amin’ny faritra Atsimo Atsinanan’I Madagasikara.

Mihoatran’ny 20 km miala ny tobim-pahasalamana akaiky indrindra no misy an’ity tanàna kely ity, ka noho izany dia ilaina ny fandoavana 8.000 Ar na 2 dolara mba hahatongavana any, amin’ny alàlan’ny fiara.

« Rehefa tena aretina mafy ihany vao mamonjy eny izahay satria tsy takatray ny saran’ilay izy. Izany no antony tsy mbola nahazoan’ny zanako fitsaboana: mikohaka sy voan’ny tazo efa ho herinandro izy. Ankoatran’ny saran’ny fiara dia tsy maintsy manana vola hividianana fanafody ihany koa ny tena; nefa tsy vitako izany, » hoy izy.

Anisan’ny tratran’ny rivodoza Batsirai sy Emnati, izay namely ny Nosy tamin’ny volana febroary lasa teo, ny faritra Imanombo. Niharan'ny fahavoazana lehibe ny mponina sy ireo sampan-draharaha sosialy. Na dia niverina aza ny fikarakarana ara-pahasalamana ao amin'ilay tobim-pitsaboana, dia sahirana ireo fokonolona niharam-pahavoazana amin’ny fisitrahana izany. Ny fahaverezan'ny trano fonenana, tany azo volena na asa fivelomana dia nanery azy ireo hanao laharam-pahamehana ny filàna tena ilaina toy ny sakafo sy ny trano, ka nampitondra fahavoazana ny fanaraha-maso ara-pahasalamana.

« Raha miharatsy ny toe-pahasalaman’i Angèle dia tsy maintsy miomana amin’ny fitondrana azy eny amin’ny tobim-pahasalamana aho, miaraka amin’ny sarany rehetra mifandraika amin’izany. Amin'izao fotoana izao aloha dia mbola mandinika tsara ny fivoaran'ny toe-pahasalamany izahay. Manana mpiasan’ny fahasalamana izahay ety, saingy any amin’ny 6 kilometatra eo ho eo no misy azy ary tsy misy afa-tsy ny tazomoka no tsaboiny. Tsy voaofana hamantatra sy hitsabo aretina hafa izy. Tsy manana akora iasana ihany koa izy ary rariny raha asainy mamonjy tobim-pahasalamana izahay, » hoy ny fanazavany.

Ny tobim-pahasalamana mandehandeha dia manampy be tokoa ary manome azy ny fanantenana rehetra momba ny fisitrahana fanaraha-maso tsara kalitao. « Mahazo fitsaboana sy fanaraha-maso ara-tsakafo ny zanako eto. Ilay toeram-pitsaboana dia manome anay fahafahana manao vaksiny ihany koa. Ny zanako manokana izao dia tokony hahazo ny rappel vaksiny kitrotro ao anatin'ny 3 volana, » hoy i Tsofiazy tamim-pireharehana. Ity karazana tolotra mandehandeha ity no angatahin’ny fokonolona, fara-fahakeliny indray mandeha isam-bolana, indrindra amin’ity faritra ity izay niharatsy tokoa ny tsy fanjarian-tsakafo taorian’ireny loza voajanahary ireny. Ho fanohanana izany, ireo reny dia mangataka fanofanana tsaratsara kokoa ho an’ireo mpanentana ara-pahasalamana, entina mamantatra ireo aretina mpahazo ny  zaza mba hanamora ny fomba fiasa sy ny fitsaboana.

Amin'izao fotoana izao, ny UNICEF dia miditra an-tsehatra amin'ny fanalefahana ny krizy amin'ny alàlan’ny fanohanana ara-teknika, ara-pitaovana ary ara-bola mikasika ny fametrahana toeram-pitsaboana mandehandeha. Natao izany mba hanomezana fitsaboana manakaiky ny vahoaka any amin'ireo toerana marefo indrindra ao amin'ilay faritra. Mitotaly 18 ireo tobim-pahasalamana mandehandeha, toy ny eny Imanombo, izay mandrakotra ny distrika 5 amin’izany faritra izany, mandritra ny iray volana.

Ireny tobim-pitsaboana mandehandeha ireny koa dia ahafahana mizara fanafody sy sakafo ara-pahasalamana ho an’ny tobim-pahasalamana sasany, noho ny fitomboan'ny filàna ara-pitaovana taorian'ireny loza ireny. Hita ho nitombo ireo fikarakarana ara-pahasalamana ho an'ny mponina mitoka-monina na lavitry ny tobim-pahasalamana, ary ireo tobim-pahasalamana dia afaka miantoka tolotra manara-penitra ho an'ny mponina, indrindra ny vehivavy sy ny ankizy manaraka azy ireo. Ireo tobim-pitsaboana mandehandeha ihany koa dia ahafahana manentana momba ny fitakiana tolotra ary fomba mahomby hampiroboroboana izany.