Antavy Avaratra : nampitombo ny isan’ny mpianatra ny fananganana ilay sekoly vaovao
Ny sekoly ho an’ny fampianarana ankapobeny ao Antavy Avaratra dia nisitraka fotodrafitr’asa vaovao maharitra, noho ny fandraisan’andraikitry ny vondrom-piarahamonina sy ny fanohanan'ny UNICEF, izay vatsian'ny Komity Nasionaly Japoney mpanohana ny UNICEF
Any amin’ny morontsirak’i Faux Cap, faritra atsimon’I Madagasikara no misy ny tanàn’i Antavy Avaratra. Raha nanomboka ny volana aogositra 2022 ny fanamboarana ny sekoly vaovao, dia mbola misy hatrany ireo mpianatra vaovao mirohotra eny an-toerana. Mahatratra 334 ireo mpianatra ankehitriny, raha toa ka 160 izy ireo tamin’ny taom-pianarana 2021-2022 teo aloha. « Nitombo be ny isan’ny mpianatra ao amin’ny sekoly misy anay ary mbola misy ankizy hafa avy amin’ireo tanàna mifanolo-bodirindrina aminay no mbola manantona anay hatrany, » hoy ny talen’ny sekoly, Rafanomezantsoa Bertholin.
Niorina tamin’ny taona 2012 ity kolejy fampianarana ankapobeny ity. Tsy mbola nisy efitrano fianarana tamin’izany fotoana izany. Noho izany dia tany an-tokantranon’ny lehiben’ny tanàna, Fahantana Flavien, no nanaraka ny fampianarana ireo mpianatra miisa 60 nisoratra anarana. Tamin’ny taona 2016, niara-nisalahy ireo ray aman-dreny tamin’ny fananganana efitrano fianarana roa vita tamin’ny hazo sy mololo. « Sarotra ny mampianatra ao anatin’ny toe-javatra toy izao, indrindra any amin’ny faritra tratran’ny hain-tany nandritra ny taona maro. Tsy maintsy najanona ny fampianarana rehefa avy ny orana, satria tantera-drano ny mololo natao tafo, » hoy i Bertholin.
Fiatrehana amin’ny lafiny maha-olona ho an'ny fampandrosoana
Ireo fotodrafitr’asa vaovao eny anivon’ny sekoly dia ahitana efitrano fianarana efatra, efitrano malalaka iray, trano fonenan’ny talen-tsekoly sy birao ary kianja filalaovana taranja samihafa, efitra fivoahana roa ary kiôska natokana ho an’ny ora tsy fianarana. Ho asiana fanaka ihany koa izany sekoly izany mba ahafahan’ny mpianatra mianatra ao anatin’ny toe-javatra tsara kokoaa. Tafiditra ao anatin’ny fandaharan’asa « Back to school and learning » na « Miverina an-tsekoly sy mianatra” izany hetsika izany, izay mikendry ny hanohanana ny fiverenana sy ny fitazonana ny ankizy any an-tsekoly ary koa ny fanatsarana ny fianaran’izy ireo. Mpampianatra 16 no miasa ao amin'ilay sekoly ary ny mpiara-monina manontolo dia toa mandray andraikitra avokoa mba hanomezana ireo zanany fanabeazana manara-penitra. Anisan’ny nitarika ity tetik’asa ity i Fahantana Flavien satria ankoatra ny maha sefom-pokontany azy dia filohan’ny fikambanan’ny ray aman-dreny ihany koa izy. « Natolotro maimaim-poana ny ampaha-taniko mirefy iray hekitara hanorenana ity sekoly vaovao ity satria mino aho fa ny fandraisan’anjaran’ny tsirairay no hiantoka ny hoavy tsara ho an’ny zanakay, » hoy izy sady nahatsiaro tena ho nahavita zava-dehibe izy. Mankasitraka azy ny fokonolona ary nanome toky fa handefa ny zanak’izy ireo any an-tsekoly. Fanoloran-tena izany ho fitondrana anjara biriky amin'ny fandriampahalemana eo an-tanàna, izay faritra mbola ahitana tahana tsy fanjarian-tsakafo avo dia avo.
Ny sekoly dia ahitana taham-pahafahana 69.63 isan-jato tamin'ny fanadinam-panjakana BEPC farany teo. I Vonjisoa Marie Arlette, 17 taona, dia anisan’ireo mpianatra 63 nahazo io diplaoma io, izay manamarika ny fahavitan’ny fianarany eny amin’ny ambaratonga faharoa. Zanaka tantsaha izy ary hanohy ny fianarany eny amin’ny lisea ao an-tanànan’i Toliara, 450 km miala ny trano fonenany. « Nanapa-kevitra ny handefa ahy any Toliara ny ray aman-dreniko satria any an-toerana ihany no hanohizako ny fianarana ambony mba ho lasa mpampivelona aho. Faly aho fa afaka mianatra ao amin’ilay trano vaovao ireo mpianatra hafa ao an-tanàna, satria ho afaka hifantoka tsara kokoa izy ireo, » hoy ny fanazavan’i Marie Arlette. Araka ny vinavina dia ho vita amin’ny volana desambra 2022 ny asa fanamboarana ity sekoly vaovao ity.
