ວິທີການກິນອາຫານທີ່ດີໃນຂະນະທີ່ຢູ່ເຮືອນ
ວິທີທີ່ພໍ່ແມ່ ແລະ ລູກສາມາດມີສຸຂະພາບແຂງແຮງດີ ໃນໄລຍະການລະບາດຂອງພະຍາດໂຄວິດ-19
- English
- ລາວ
ການລະບາດຂອງພະຍາດໂຄວິດ-19 ກຳລັງມີຜົນກະທົບຢ່າງຫຼວງຫຼາຍຕໍ່ຊີວິດຂອງຫຼາຍຄອບຄົວໃນອາຊີຕາເວັນອອກ ແລະປາຊີຟິກ. ໃນຂະນະທີ່ໂຮງຮຽນ ແລະ ເຮືອນລ້ຽງເດັກໄດ້ປິດລົງ, ພໍ່ແມ່ ແລະ ຜູ້ເບິ່ງແຍງດູແລເດັກຫຼາຍຄົນສ່ວນຫຼາຍແມ່ນຢູ່ເຮືອນ ເພື່ອຮັບມືກັບການເບິ່ງແຍງດູແລເດັກ, ວຽກເຕັມເວລາ ແລະ ຄວາມຮັບຜິດຊອບອື່ນໆທີ່ແຂ່ງກັບເວລາ. ການຄິດຫາວ່າ ຊິເອົາອາຫານອັນໃດແດ່ໃຫ້ລູກກິນ ເພື່ອຮັກສາສຸຂະພາບໃຫ້ດີທີ່ສຸດ ກໍສາມາດເປັນສິ່ງທ້າທາຍອັນໜຶ່ງອີກໃນຊີວິດປະຈຳວັນ.
ຍິ່ງໄປກ່ວານັ້ນ, ມີຫຼາຍຄົນກໍໄດ້ສູນເສຍວຽກເຮັດງານທຳ ຫຼື ການດຳລົງຊີວິດ, ເດັກບໍ່ໄດ້ຮັບອາຫານໃນໂຮງຮຽນອີກແລ້ວແລະ ບາງຄອບຄົວກໍ່ມີຄວາມຍາກລຳບາກໃນການຊື້ອາຫານ. ບາງຄອບຄົວທີ່ຕ້ອງໃຊ້ເວລາຢູ່ເຮືອນຫຼາຍທີ່ສຸດ ຊຶ່ງເຂົ້າໃຈໄດ້ ວ່າ ພວກເຂົາຂື້ນກັບການຈັດສົ່ງອາຫານຮອດເຮືອນໃນຮູບແບບຂອງອາຫານສຸກ ແລະ ອາຫານປຸງແຕ່ງ ຊຶ່ງບໍ່ແມ່ນອາຫານສົດ.
ອາຫານທີ່ມີທາດບຳລຸງ ແລະ ມີຄວາມຫຼາກຫຼາຍ ແມ່ນວິທີໜຶ່ງທີ່ສຳຄັນ ຊຶ່ງຄອບຄົວສາມາດຊ່ວຍຮັກສາພູມຕ້ານທານຂອງລູກຂອງພວກເຂົາຕໍ່ພະຍາດໂຄວິດ-19. ບໍ່ມີອາຫານໃດທີ່ເປັນອາຫານໜຶ່ງດຽວ ຊຶ່ງສາມາດປ້ອງກັນໄວຣັດໄດ້. ອັນນີ້ແມ່ນຄວາມເຂົ້າໃຈຜິດທີ່ກຳລັງເຜີຍແຜ່ ໂດຍບໍ່ມີການຮັບຮອງທາງວິທະຍາສາດ. ອາຫານທີ່ມີສານອາຫານທີ່ຈຳເປັນທັງໝົດ ແລະ ການຫຼີກລຽງອາຫານທີ່ບໍ່ດີຕໍ່ສຸຂະພາບແມ່ນສິ່ງດີທີ່ສຸດ ເພື່ອສະໜັບສະໜູນການເຕີບໃຫຍ່, ການພັດທະນາ ແລະ ສຸຂະພາບ ໃນໄລຍະຍາວຂອງເດັກ. ແລະ ຜົນປະໂຫຍດເພີ່ມເຕີມອີກ ກໍແມ່ນ ມັນອາດຈະເປັນການເລີ່ມສ້າງເປັນນິໄສຂອງເດັກໃນການກິນອາຫານທີ່ດີຕໍ່ສຸຂະພາບອີກດ້ວຍ!
ການກິນອາຫານທີ່ມີສານອາຫານທີ່ຈຳເປັນທັງໝົດ ແລະ ການຫຼີກລຽງອາຫານທີ່ບໍ່ດີ ແມ່ນສິ່ງດີທີ່ສຸດ ເພື່ອສະໜັບສະໜູນການເຕີບໃຫຍ່, ການພັດທະນາ ແລະ ສຸຂະພາບຂອງເດັກໃນໄລຍະຍາວ.
5 ວິທີກິນອາຫານເພື່ອສຸຂະພາບ
1. ກິນອາຫານຕາມຄາບເຂົ້າປົກກະຕິ ພ້ອມອາຫານຫຼາກຫຼາຍຊະນິດ
ໃນຊ່ວງເວລາທີ່ພິເສດນີ້ ເມື່ອກິດຈະວັດປະຈຳວັນຖືກລົບກວນ, ເປັນສິ່ງສຳຄັນທີ່ຈະຕ້ອງສືບຕໍ່ກິນອາຫານຕາມຄາບເຂົ້າປົກກະຕິ ແລະອາຫານຫຼາກຫຼາຍຊະນິດ. ຄາບເຂົ້າ ປະຈຳວັນ ຄວນປະກອບມີເຂົ້າ ຫຼື ທາດແປ້ງຫຼັກອື່ນໆປະມານ 1/3 ແລະ 1/3 ແມ່ນໝາກໄມ້ ແລະ ຜັກ. 1/3 ທີ່ຍັງເຫຼືອ ຄວນແບ່ງປັນລະຫວ່າງແຫຼ່ງທາດໂປຼຕີນ ເຊັ່ນ: ຊີ້ນ, ປາ, ຖົ່ວ ແລະ ທັນຍະພືດ ແລະ ປະເພດນົມ. ອັນນີ້ຈະສະໜອງສານອາຫານທັງໝົດ ໃນປະລິມານທີ່ເໝາະສົມ ສຳລັບເດັກທີ່ກຳລັງເຕີບໃຫຍ່. ຈົ່ງພະຍາ ຍາມສະໜອງອາຫານຫຼາກຫຼາຍປະເພດໃຫ້ຫຼາຍເທົ່າທີ່ເປັນໄປໄດ້ ເພື່ອບໍ່ໃຫ້ເດັກເບື່ອອາຫານດ້ວຍການກິນອາຫານແບບດຽວກັນທຸກມື້.
2. ກິນໝາກໄມ້ ແລະ ຜັກໃຫ້ຫຼາຍທີ່ສຸດ
ການຊື້, ການເກັບຮັກສາ ແລະ ການປຸງແຕ່ງໝາກໄມ້ ແລະ ຜັກສົດ ສາມາດເປັນສິ່ງຫຸ້ຍງຍາກ, ໂດຍສະເພາະໃນເວລາທີ່ພໍ່ແມ່ໄດ້ຮັບຄຳແນະນຳວ່າ ໃຫ້ຈຳກັດການອອກນອກເຮືອນ. ແຕ່ໃນບ່ອນໃດທີ່ເປັນໄປໄດ້, ເປັນສິ່ງສຳຄັນທີ່ຈະຮັບປະກັນໃຫ້ລູກ ໄດ້ກິນໝາກໄມ້ ແລະ ຜັກຢ່າງຫຼວງຫຼາຍ ເພາະວ່າ ໝາກໄມ້ ແລະ ຜັກເຕັມໄປດ້ວຍວິຕາມິນ, ແຮ່ທາດ ແລະ ໃຍອາຫານ. ຈຸດປະສົງ ແມ່ນເພື່ອໃຫ້ເປັນອາຫານຫ່ວາງຢ່າງໜ້ອຍ 5 ຄັ້ງຕໍ່ມື້. ໝາກໄມ້ ແລະ ຜັກສົດແມ່ນດີທີ່ສຸດ, ແຕ່ໝາກໄມ້ ແລະ ຜັກບັນຈຸກະປອງ ຫຼື ແຊ່ແຂງຍັງມີວິຕາມິນ ແລະ ແຮ່ທາດທີ່ຈຳເປັນ ແລະ ສາມາດປ່ຽນແທນໄດ້ດີທີ່ສຸດ ເມື່ອບໍ່ມີຂອງສົດ.
3. ດື່ມນໍ້າໃຫ້ພຽງພໍ
ຮັກສາຄວາມຊຸ່ມຊື່ນໃຫ້ດີ, ສ່ວນໃຫຍ່ແມ່ນດ້ວຍການດື່ມນ້ຳທຳມະດາໃຫ້ຫຼາຍທີ່ສຸດ ຈະຊ່ວຍຮັກສາລະບົບພູມຕ້ານທານ. ຈົ່ງຊຸກຍູ້ໃຫ້ເດັກດື່ມນ້ຳທຳມະດາແທນເຄື່ອງດື່ມທີ່ມີລົດຫວານ ຊຶ່ງບັນຈຸນ້ຳຕານຫຼາຍ ແລະ ສາມາດທຳລາຍແຂ້ວ ແລະ ສຸຂະ ພາບໃນໄລຍະຍາວ.
4. ຈຳກັດອາຫານທີ່ບໍ່ດີຕໍ່ສຸຂະພາບ
ອາຫານທີ່ບັນຈຸນ້ຳຕານ, ເກືອ ແລະ/ຫຼື ໄຂມັນສັດເປັນຈຳນວນຫຼາຍ ແລະ ມີປະລິມານທາດໂປຼຕີນ, ໄຍອາຫານ, ວິຕາມິນ ແລະແຮ່ທາດທີ່ບໍ່ພຽງພໍ ແມ່ນບໍ່ເປັນຜົນດີ. ແຕ່ໂຊກບໍ່ດີ, ອາຫານພ້ອມກິນໄດ້ ແລະ ອາຫານສະດວກສະບາຍຫຼາຍຢ່າງ ເຊັ່ນ: ໝີ່ເປັນຖ້ວຍ, ພິສຊາ, ເບີເກີ ແລະ ອາຫານຈືນ ແມ່ນຢູ່ໃນປະເພດອາຫານທີ່ບໍ່ດີຕໍ່ສຸຂະພາບ. ປະຈຸບັນນີ້, ຫຼາຍຄອບຄົວແມ່ນຂື້ນກັບການຈັດສົ່ງອາຫານພ້ອມກິນໄດ້ ແລະ/ຫຼື ອາຫານສະດວກສະບາຍ ແລະ ມັນອາດຈະຍາກທີ່ຈະຕັດອາຫານທີ່ບໍ່ດີຕໍ່ສຸຂະ ພາບອອກໄປໄດ້. ໃນບ່ອນໃດທີ່ເປັນໄປໄດ້, ພະຍາຍາມສັ່ງອາຫານທີ່ດີຕໍ່ສຸຂະພາບ ດ້ວຍການກວດກາເບິ່ງປ້າຍກຳກັບ, ຫຼຸດຈຳນວນອາຫານພ້ອມກິນໄດ້ທີ່ຄອບຄົວທ່ານກິນໃນອາທິດໜຶ່ງ, ຈົ່ງລະມັດລະວັງຕໍ່ການຄວບຄຸມຂະໜາດອາຫານ ແລະ ບ່ອນໃດທີ່ເປັນໄປໄດ້ ກໍປຸງແຕ່ງອາຫານ ຫຼື ກຽມອາຫານທີ່ນຳໃຊ້ສ່ວນປະກອບສົດ. ເດັກ ຕ້ອງການກິນອາຫານຫວ່າງ 1 ຫຼື 2 ຄັ້ງ ໃນຕອນກາງເວັນເພື່ອໃຫ້ພວກເຂົາສືບຕໍ່ໄປ. ແທນທີ່ຈະເອົາອາຫານຫວ່າງທີ່ເປັນຂອງຫວານ ຫຼື ຂອງເຄັມ, ຈົ່ງພະຍາຍາມເອົາສິ່ງທີ່ດີຕໍ່ສຸຂະພາບ ເຊັ່ນ: ໝາກໄມ້ ຫຼື ຜັກທີ່ສາມາດກິນດິບໄດ້.
5. ເລີ່ມຕົ້ນຄົວກິນ ແລະ ເຮັດໃຫ້ມີຄວາມມ່ວນ!
ບໍ່ແມ່ນວ່າ ທຸກຄົນມີຄວາມຫຼູຫຼາທີ່ສາມາດຄົວກິນຢູ່ເຮືອນໄດ້. ສຳລັບຜູ້ທີ່ເຮັດໄດ້, ອັນນີ້ເປັນໂອກາດທີ່ຈະທົດລອງຄົວກິນຢູ່ເຮືອນ ແລະ ໃຫ້ລູກຂອງທ່ານມີສ່ວນຮ່ວມ. ແມ່ນແຕ່ ລູກນ້ອຍ ກໍ່ສາມາດຊ່ວຍໃນການລ້າງ ຫຼື ຄົນປະສົມອາຫານຕ່າງໆ ໃນຂະນະທີ່ເດັກທີ່ໃຫ່ຍກ່ວາ ກໍສາມາດປະຕິບັດວຽກທີ່ຍາກກວ່າ .
