ເວທີເສວະນາເພື່ອຍົກໃຫ້ເຫັນເຖິງບົດບາດອັນສໍາຄັນຂອງນັກສັງຄົມສົງເຄາະເພື່ອສິດທິເດັກໃນ ສປປ ລາວ

08 ພະຈິກ 2023
Panel discussion on social work in Lao PDR held by the Ministry of Labour and Social Welfare in partnership with UNICEF and the Faculty of Social Science of the National University of Laos.
UNICEF Laos/MPhetxayyabouth/2023

ໃນຕອນເຊົ້າວັນທີ 8 ພະຈິກ 2023 - ກະຊວງແຮງງານ ແລະ ສະຫວັດດີການສັງຄົມ, ອົງການຢູນີເຊບ ແລະ ມະຫາວິທະຍາໄລແຫ່ງຊາດ  (ພາກວິຊາສັງຄົມສົງເຄາະ ແລະ ການພັດທະນາ ຄະນະວິທະຍາສາດສັງຄົມ) ໄດ້ຮ່ວມກັນຈັດເວທີເສວະນາການສ້າງຄວາມເຂັ້ມແຂງກ່ຽວກັບວຽກງານສັງຄົມສົງເຄາະໃນ ສປປ ລາວ.

ຈຸດປະສົງໃນການຈັດເວທີເສວະນາແມ່ນເພື່ອສ້າງຄວາມເຂັ້ມແຂງກ່ຽວກັບວຽກງານສັງຄົມສົງເຄາະໃນ ສປປ ລາວ, ໂດຍສະເພາະແມ່ນລາຍງານຄວາມຄືບໜ້າຂອງວຽກງານສັງຄົມສົງເຄາະ, ວຽກງານການສົ່ງເສີມສະຫວັດດີການ, ສິດທິຂອງເດັກ ແລະ ຄອບຄົວ ໃນ ສປປ ລາວ. ເວທີເສວະນານີ້ຍັງໄດ້ຮັບກຽດເຂົ້າຮ່ວມໂດຍ ສະຖານທູດ ສ.ເກົາຫຼີ ແລະ ສະຖານທູດອົດສະຕຣາລີ ປະຈຳ ສປປ ລາວ, ຜູ້ຕາງໜ້າຈາກຄູ່ຮ່ວມພັດທະນາ, ອົງການຈັດຕັ້ງທາງສັງຄົມຕ່າງໆ ພ້ອມ ນັກສຶກສາສາສັງຄົມສົງເຄາະ ແລະ ສິດເກົ່າທີ່ຈົບສາຂາສັງຄົມສົງເຄາະ.

ທ່ານ​ ນາງ ໃບຄຳ ຂັດຕິຍະ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ກໍ​ໄດ້ຍົກໃຫ້ເຫັນ​ເຖິງບົດບາດ ແລະ ຄວາມສໍາຄັນຂອງວຽກງານສັງຄົມສົງເຄາະ, ໂດຍສະເພາະ​ຄວາມ​ສຳຄັນ​ຂອງ​ການ​ຮ່ວມ​ມື​ເພື່ອຜັນ​ຂະຫຍາຍ​ລະບົບສັງຄົມສົງເຄາະ ແລະ ລະບົບ​ປົກ​ປ້ອງສັງຄົມ, ປົກປ້ອງ​ເດັກຢູ່​​ພາຍ​ໃນ​ປະ​ເທດ ​ແລະ ​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ບັນດາ​ຄູ່ຮວມງານເປັນຕົ້ນແມ່ນ ລັດຖະບານ ສ.ເກົາຫຼີ, ລັດຖະບານ​ອົດ​ສະຕຣາລີ ແລະ ອົງການ ຢູນີເຊບ ​ທີ່​ໃຫ້ການ​ສະໜັບສະໜູນຕະຫຼອດມາ.

ພ້ອມນັ້ນ, ທ່ານ ຮສ. ປອ ເດຊານຸລາດ ແສນດວງເດດ, ຮອງອະທິການບໍດີ ມະຫາວິທະຍາໄລແຫ່ງຊາດ, ກໍໄດ້ເນັ້ນເຖິງບົດບາດ ແລະ ຄວາມສຳຄັນຂອງການສ້າງບຸກຄະລາກອນທາງສັງຄົມສົງເຄາະທີ່ມີຄຸນນະພາບ ເພື່ອປະກອບສ່ວນເຂົ້າໃນກົນໄກຂອງວຽກງານສັງຄົມສົງເຄາະໃນ ສປປ ລາວ ແລະ ຍົກລະດັບເພື່ອເຊື່ອມໂຍງສູ່ມາດຕະຖານໃນພາກພື້ນ ແລະ ສາກົນ. ພ້ອມນັ້ນ ຍັງໄດ້ສະແດງຄວາມພ້ອມໃນການເຮັດວຽກຮ່ວມກັບທຸກພາກສ່ວນໃນການຂັບເຄື່ອນວຽກງານສັງຄົມສົງເຄາະໃນລາວ.

ງານເວທີເສວະນາ ດັ່ງກ່າວຍັງໄດ້ຈັດຂຶ້ນເພື່ອເປັນສ່ວນໜື່ງຂອງການສະເຫລີມສະຫລອງໂອກາດ ຄົບຮອບ 50 ປີຂອງການຮ່ວມມືລະຫວ່າງ ອົງການ ຢູນີເຊບ ເເລະ ລັດຖະບານເເຫ່ງ ສປປ ລາວ ອີກເຊັ່ນດຽວກັນ.

ທ່ານ ອາທຸໂຣ ລອມບໍລີ, ວ່າການຜູ້ຕາງໜ້າ ອົງການ ຢູນີເຊັບ ປະຈໍາ ສປປ ລາວ, ໄດ້ກ່າວ: “ໃນຂະນະທີ່ມີຄວາມຄືບໜ້າຫຼາຍໃນສອງທົດສະວັດທີ່ຜ່ານມາເພື່ອເສີມສ້າງລະບົບການປົກປ້ອງເດັກໃນ ສປປ ລາວ, ພວກເຮົາຕ້ອງສືບຕໍ່ເສີມຂະຫຍາຍກະດູກສັນຫຼັງອັນສໍາຄັນຂອງພວກເຮົາກໍ່ຄຶວຽກງານສັງຄົມສົງເຄາະ. ​ຜົນສໍາເລັດຂອງການຮ່າງກົດໝາຍວ່າດ້ວຍສັງຄົມສົງເຄາະ ແລະ ​ການ​ຈັດສັນງົບປະມານ​ໃຫ້ແກ່ວຽກງານສັງຄົມສົງເຄາະກໍໍເປັນການ​ເສີມສ້າງນັກສັງຄົມສົງເຄາະຂອງ​ສປປ ລາວ.”

ຕິດຕໍ່ຜູ້ຮັບຜິດຊອບຂ່າວ

Simon Nazer
Chief of Communication
UNICEF Lao PDR
ໂທລະສັບ: +856 2055519681
ອີເມວ: snazer@unicef.org
ຕະບອງເພັດ ພຸດທະວົງ
ຊ່ຽວຊານວຽກງານໂຄສະນາ ແລະ ສື່ສານມ່ວນຊົນ
ອົງການຢູນິເຊັບ ປະຈຳ ສປປ ລາວ
ໂທລະສັບ: +85621 487520;ext=7520
ໂທລະສັບ: +856 20 96888890
ອີເມວ: tphouthavong@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook