ຮອງຜູ້ຕາງໜ້າ ອົງການຢູນີເຊັບ ຮັບຫຼຽນກາມິດຕະພາບ ສຳລັບການປະກອບສ່ວນອັນດີເດັ່ນຕໍ່ການປັບປຸງຊີວິດເດັກນ້ອຍໃນ ສປປ ລາວ

ກະຊວງການຕ່າງປະເທດ ໄດ້ມອບ ຫຼຽນກາມິດຕະພາບ ໃຫ້ເເກ່ທ່ານນາງ ບີອາເຕ ດາສເທວ ເພື່ອເປັນການເຊີດຊູເຖິງຜົນສຳເລັດອັນດີເດັ່ນສຳລັບເດັກນ້ອຍລາວໃນໄລຍະການດຳລົງຕຳແໜ່ງເປັນຮອງຜູ້ຕາງໜ້າ ອົງການຢູນີເຊັບ ໃນລະຫວ່າງ ປີ 2019-2022.

27 ກໍລະກົດ 2022
Child rights
UNICEF Laos/2022/AKarki
Mr. Phoxay Khaykhamphithoune, Vice Minister of Foreign Affairs, presented the the Cross of Friendship Medal to Ms. Dastel, UNICEF Deputy Representative.

ນະຄອນຫຼວງວຽງຈັນ, ວັນທີ 26 ເດືອນກໍລະກົດ 2022 - ກະຊວງການຕ່າງປະເທດ ໄດ້ມອບ ຫຼຽນກາມິດຕະພາບໃຫ້ແກ່ ທ່ານນາງ ບີອາເຕ ດາສເທວ, ຮອງຜູ້ຕາງໜ້າອົງການຢູນີເຊັບ ປະຈຳ ສປປ ລາວ, ເພື່ອເປັນການເຊີດຊູເຖິງຜົນສຳເລັດອັນດີເດັ່ນຂອງທ່ານນ່າງ ບີອາເຕ ດາສເທວ ສຳລັບເດັກນ້ອຍ ໃນ ສປປ ລາວ, ກ່ອນທີ່ທ່ານນາງຈະສຳເລັດພາລະກິດໃນ ສປປ ລາວ ໃນອາທິດນີ້.

ພິທີມອບ ຫຼຽນກາມິດຕະພາບ ດັ່ງກ່າວໄດ້ຈັດຂຶ້ນທີ່ ກະຊວງການຕ່າງປະເທດ ເເລະ ເຂົ້າຮ່ວມໂດຍ ທ່ານ ວິລັດສອນ ວິສອນນາວົງ, ຮັກສາການຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ, ແລະ ມີພະນະທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ, ໃຫ້ກຽດມອບຫຼຽນໄຊໃຫ້ແກ່ ທ່ານນາງ ບີອາເຕ ດາສເທວ.

"ທ່ານນາງ ດາສເທວ ໄດ້ໃຫ້ການປະກອບສ່ວນຢ່າງກວ້າງຂວາງໃນການເສີມສ້າງ ແລະ ເພີ່ມທະວີການຮ່ວມມືລະຫວ່າງ ອົງການຢູນີເຊັບ ແລະ ສປປ ລາວ, ໂດຍສະເພາະໃນຂົງເຂດວຽກງານສົ່ງເສີມ ແລະ ປົກປ້ອງສິດທິເດັກ ແລະ ແມ່ຍິງໃນ ສປປ ລາວ. ເພື່ອເປັນການຕອບແທນການປະກອບສ່ວນອັນສຳຄັນຂອງທ່ານນາງ ດາສເທວ, ລັດຖະບານ ແຫ່ງ ສປປ ລາວ ໄດ້ມອບຫຼຽນກາມິດຕະພາບໃຫ້ແກ່ທ່ານນາງ ດາສເທວ ເພື່ອເປັນການຮັບຮູ້ເຖິງຄວາມມານະພະຍາຍາມ ແລະ ການອຸທິດຕົນຕໍ່ ການພັດທະນາຂອງ ສປປ ລາວ,” ກ່າວໂດຍ ທ່ານ ວິລັດສອນ ວິສອນນາວົງ.

ທ່ານນາງ ບີອາເຕ ດາສເທວ ໄດ້ດຳລົງຕຳແໜ່ງເປັນຮອງຜູ້ຕາງໜ້າ ອົງການຢູນີເຊັບ ປະຈຳ ສປປ ລາວ ແຕ່ເດືອນ ກັນຍາ 2019 ຫາ ເດືອນ ກໍລະກົດ 2022. ໃນໄລຍະນີ້, ທ່ານນາງ ດາສເທວ ໄດ້ມີບົດບາດສຳຄັນໃນວຽກງານຫຼາຍໆຂົງເຂດເພື່ອຜົນປະໂຍດຂອງເດັກນ້ອຍ ແລະ ແມ່ຍິງລາວ, ບໍ່ວ່າຈະເເມ່ນໃນຂົງເຂດວຽກງານດ້ານ ສຸຂະພາບ ແລະ ໂພຊະນາການ, ສຸຂາພິບານ ແລະ ສຸຂະອານາໄມ, ການສຶກສາ, ການປົກປ້ອງເດັກ ແລະ ດ້ານນະ​ໂຍ​ບາຍ​ທາງສັງ​ຄົມ​. ໃນບັນດາຜົນສຳເລັດອັນໂດດເດັ່ນຂອງ ທ່ານ ນາງ ດາສເທວ ນັ້ນຍັງລວມເຖີງ ການວາງແຜນ ແລະ ພັດທະນາ ແຜນງານການຮ່ວມມື ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການຢູນິເຊັບ ສົກປີ 2022-2026, ເຊີ່ງຈະສະໜອງກອບການຮ່ວມມືລະຫວ່າງ ລັດຖະບານແຫ່ງ ສປປ ລາວ ແລະ ອົງການຢູນິເຊັບ ສຳລັບ 5 ປີ ຂ້າງໜ້າ.

ນອກຈາກນີ້, ທ່ານນາງ ບີອາເຕ ດາສເທວ ຍັງໄດ້ດຳລົງໜ້າທີ່ເປັນວ່າກ່ານຜູ້ຕາງໜ້າຂອງ ອົງການຢູນີເຊັບ ປະຈຳ ສປປ ລາວ ອີກດ້ວຍ, ເຊີ່ງໃນໄລຍະດັ່ງກ່າວ ທ່ານນາງ ດາສເທວ ໄດ້ມີບົດບາດອັນສຳຄັນໃນການນຳພາການສະໜັບສະໜູນການຮັບມືກັບພະຍາດ ໂຄວິດ-19 ຂອງ ສປປ ລາວ. ພາຍໃຕ້ການນໍາພາຂອງທ່ານນາງ ດາສເທວ, ອົງການຢູນີເຊັບ ໄດ້ເປັນອົງການພັດທະນາທໍາອິດທີ່ສະໜອງອຸປະກອນປ້ອງກັນ ແລະ ອຸປະກອນທີ່ສໍາຄັນອື່ນໆໃຫ້ແກ່ລັດຖະບານ. ນອກນີ້, ການນໍາພາຂອງ ທ່ານນາງ ດາສເທວ ຍັງໄດ້ເຮັດໃຫ້ ອົງການຢູນີເຊັບ ກາຍເປັນໜື່ງໃນຄູ່ຮ່ວມງານອັນສຳຄັນທີ່ສຸດຂອງ ສປປ ລາວ ໃນຂົງເຂດວຽກງານ ສັກວັກຊີນ, ສຸຂະອານາໄມ ເເລະ ສຸຂາພິບານ, ແລະ ໂພຊະນາການ ເຊັ່ນດຽວກັນ ເເລະ ຍັງໄດ້ຮັບປະກັນຄວາມສຳເລັດຂອງໂຄງການ “ປອດໄພກັບໄປໂຮງຮຽນ” ຂອງ ອົງການຢູນີເຊັບ. ໂຄງການດັ່ງກ່າວໄດ້ຊ່ວຍສະໜັບສະໜູນເດັກນ້ອຍລາວໃນການກັບຄືນເຂົ້າສູ່ໂຮງຮຽນພາຍຫຼັງການປິດປະເທດ ແລະ ໄດ້ຖືກຈັດອັນດັບເປັນໜຶ່ງໃນໂຄງການສະໜັບສະໜູນການກັບຄືນເຂົ້າສູ່ໂຮງຮຽນຂອງເດັກ ທີ່ໜ້າສົນໃຈທີ່ສຸດຂອງ ອົງການຢູນີເຊັບ ໃນທົ່ວໂລກໃນໄລຍະການລະບາດຂອງພະຍາດ.

“ຂ້າພະເຈົ້າຂໍສະແດງຄວາມຂອບໃຈຢ່າງຈິງໃຈມາຍັງລັດຖະບານ ແຫ່ງ ສປປ ລາວ ເເລະ ຖືເປັນກຽດຢ່າງສູງທີ່ໄດ້ຮັບ ຫຼຽນກາມິດຕະພາບ ໃນຄັ້ງນີ້ຕາງໜ້າໃຫ້ກັບ ອົງການຢູນີເຊັບ ແລະ ບັນດາຄູ່ຮ່ວມມືຂອງພວກເຮົາ. ອົງການຢູນີເຊັບ ມີຄວາມຕື່ນເຕັ້ນຫຼາຍທີ່ຈະສືບຕໍ່ການຮ່ວມມືຂອງພວກເຮົາກັບລັດຖະບານເເຫ່ງ ສປປ ລາວ ແລະ ບັນດາຄູ່ຮ່ວມມື ເພື່ອປັບປຸງຊີວິດ ແລະ ອະນາຄົດ ຂອງເດັກນ້ອຍທຸກຄົນ,” ກ່າວໂດຍ ທ່ານນາງ ດາສເທວ. 

ຕິດຕໍ່ຜູ້ຮັບຜິດຊອບຂ່າວ

Chiara Frisone
ວ່າການຫົວໜ້າພະແນກສື່ສານ
ອົງການຢູນິເຊັບປະຈໍາ ສປປລາວ ໂທ
ໂທລະສັບ: +856 021-487508
ອີເມວ: cfrisone@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook