ອົດສະຕຣາລີ ເເລະ ອົງການຢູນິເຊັບ ສະໜັບສະໜູນພາຫະນະເພື່ອຊ່ວຍຜັນຂະຫຍາຍການເຂົ້າເຖິງ ບໍລິການສຸຂະພາບໃນຊຸມຊົນເຂດຊົນນະບົດຫ່າງໄກສອກຫຼີກ

16 ກຸມພາ 2024
Tek Tek photo 1
UNICEF Laos/2024

ແຂວງຫົວພັນ, 16 ກຸມພາ 2024 - ເພື່ອຜັນຂະຫຍາຍການເຂົ້າເຖິງບໍລິການດ້ານສຸຂະພາບໃນ ສປປ ລາວ, ລັດຖະບານອົດສະຕຣາລີ ຮ່ວມກັບ ອົງການຢູນິເຊັບ ໄດ້ມອບລົດຕ໋ອກຕ໋ອກ ຈຳນວນ 32 ຄັນ ໃຫ້ແກ່ ລັດຖະບານ ເເຫ່ງ ສປປ ລາວ.  ຍານພາຫະນະເຫຼົ່ານີ້ ຈະປະກອບສ່ວນເຂົ້າໃນຍຸດທະສາດການຜັນຂະຫຍາຍ ການເຂົ້າເຖິງບໍລິການດ້ານສຸຂະພາບ ໃນ ສປປ ລາວ ແລະ ຈະຊ່ວຍຮັບປະກັນການສະໜອງຊຸດການບໍລິການສຸຂະພາບແບບເຊື່ອມສານ ແລະ ການເຂົ້າເຖີງບໍລິການຢ່າງເທົ່າທຽມຕະຫຼອດປີ, ເປັນຕົ້ນແມ່ນ ບໍລິການແບບເຊື່ອມສານ ສັກວັກຊີນຮອບປົກກະຕິ, ວັກຊີນກັນພະຍາດ ໂຄວິດ-19 ແລະ ບໍລິການດ້ານສຸຂະພາບແມ່ ແລະ ເດັກ ໃນບັນດາກຸ່ມຄົນທີ່ມີຄວາມສຽງທີ່ສຸດ ແລະ ເຂດຫ່າງໄກສອກຫຼີກ, ໂດຍສະເພາະແມ່ນໃນຍາມລະດູຝົນ.

ພິທີມອບຮັບພາຫະນະໃໝ່ດັ່ງກ່າວ ເເມ່ນໄດ້ຖືກຈັດຂຶ້ນໃນ ກອງປະຊຸມ ສະຫຼຸບການຈັດຕັ້ງປະຕິບັດວຽກງານສາທາລະນະສຸກ ປະຈຳປີ 2023 ເເລະ ທິດທາງເເຜນການ ປິ 2024 ທີ່ຈັດຂຶ້ນທີ່ ເມືອງວຽງໄຊ, ແຂວງຫົວພັນ, ເປັນກຽດເຂົ້າຮ່ວມໂດຍ ທ່ານ ປອ. ດຣ ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ ແລະ ທ່ານ ປອ ຄຳແພງ ໄຊສົມແພງ, ເຈົ້າແຂວງ ແຂວງຫົວພັນ.

ທ່ານ ປອ. ດຣ ບຸນແຝງ ພູມມະໄລສິດ, ທ່ານລັດຖະມົນຕີກະຊວງສາທາລະນະສຸກ, ໄດ້ສະເເດງຄວາມຂອບໃຈມາຍັງ ອົງການຢູນິເຊັບ ເເລະ ລັດຖະບານອົດສະຕຣາລີ. ທ່ານໄດ້ກ່າວວ່າ: “ສປປ ລາວ ຕິີລາຄາສູງຕໍ່ການສະໜັບສະໜູນຈາກ ອົງການຢູນິເຊັບ ເເລະ ລັດຖະບານອົດສະຕຣາລີ. ພາຫະນະເຫຼົ່ານີ້ ຈະຊ່ວຍເພີ່ມການເຂົ້າເຖິງການບໍລິການດ້ານສຸຂະພາບຢ່າງກ້ວາງຂວາງໃນທົ່ວປະເທດ ແລະ ຈະຊ່ວຍໃຫ້ພະນັກງານສາທາລະນະສຸກຂອງພວກເຮົາ ກ້າວຂ້າມຜ່ານສິ່ງທ້າທາຍທາງດ້ານພູມສາດ ເພື່ອເຂົ້າເຖິງ ເເລະ ສະໜອງບໍລິການອັນສຳຄັນ ໃຫ້ເເເກ່ຊຸ່ມຊົນທີ່ມີຄວາມສ່ຽງທີ່ສຸດ.”

ລົດຕ໋ອກຕ໋ອກເຫຼົ່ານີ້ ຈະຖືກແຈກຢາຍໃຫ້ສຸກສາລາ ທັງໝົດ 32 ແຫ່ງ ໃນ 15 ແຂວງ ທົ່ວ ສປປ ລາວ. ພາຫະນະເຫຼົ່ານີ້ ມີຄວາມສະດວກສະບາຍໃນການນຳໃຊ້ ແລະ ຂັບເຄື່ອນໂດຍສີ່ລໍ້, ເຊິ່ງຈະເປັນປະໂຫຍດຫຼາຍໃຫ້ເເກ່ພະນັກງານສາທາລະນະສຸກທ້ອງຖິ່ນ ໃນການເຂົ້າເຖິງຊຸມຊົນທີ່ມີຄວາມສ່ຽງໃນໄລຍະລະດູຝົນ ເເລະ ຮັບປະກັນວ່າ ຊຸມຊົນສາມາດເຂົ້າເຖິງບໍລິການດ້ານສຸຂະພາບໄດ້ຕະຫຼອດທັງປີ.

ທ່ານນາງ ເມແກນ ຈອນສ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ, ກ່າວວ່າ: “ລັດຖະບານອົດສະຕຣາລີ ພູມໃຈທີ່ໄດ້ຊ່ວຍສະໜັບສະໜູນຄວາມມຸ່ງໝັ້ນຂອງ ສປປ ລາວ ໃນການຮັບຮອງການເຂົ້າເຖິງການບໍລິການດ້ານສຸຂະພາບຂອງທຸກຄົນໃນປະເທດ. ພາຫະນະດັ່ງກ່າວ ໄດ້ຖືກຈັດສົ່ງໃຫ້ກັບ ລັດຖະບານ ແຫ່ງ ສປປ ລາວ ພາຍໃຕ້ໂຄງການທີ່ມີຊືວ່າ VAHSI (Vaccine Access and Health Security Initiative) ແລະ ມີມູນຄ່າລວມທັງໝົດປະມານ 367,000 ໂດລາອົດສະຕຣາລີ (ຫຼື ປະມານ 245,000 ໂດລາສະຫະລັດ).

ທ່ານ ນາງ ດຣ. ເພຍ ເຣເບລໂລ ບຣິດໂຕ, ຜູ້ຕາງໜ້າອົງການຢູນິເຊັບ ປະຈຳ ສປປ ລາວ, ກໍ່ໄດ້ຍົກໃຫ້ເຫັນເຖິງຄວາມສຳຄັນຂອງການຊ່ວຍເຫຼືອດັ່ງກ່າວຈາກ ລັດຖະບານອົດສະຕຣາລີ: “ການຊ່ວຍເຫຼືອຄັ້ງນີ້ ບໍ່ພຽງແຕ່ຈະຊ່ວຍໃຫ້ພະນັກງານສາທາລະນະສຸກສາມາດເຂົ້າເຖິງຊຸມຊົນທີ່ມີຄວາມສ່ຽງສູງເທົ່ານັ້ນ ​ແຕ່ມັນຍັງສະເເດງໃຫ້ເຫັນເຖີງຄວາມໝຸ້ງໝັ້ນຂອງພວກເຮົາໃນການຊອກຫາວິທີທີ່ມີນະວັດຕະກຳຕ່າງໆເພື່ອເສີມສ້າງຄວາມເຂັ້ມແຂງຂອງລະບົບສາທາລະນະສຸກ ໃນ ສປປ ລາວ, ເພື່ອໃຫ້ລະບົບດັ່ງກ່າວສາມາດຮັບມືກັບສິ່ງທ້າທາຍ ເເລະ ຄວາມສ່ຽງທີ່ສາມາດເກີດຂຶ້ນ, ເຊັ່ນ ຄວາມສ່ຽງຂອງການລະບາດຂອງພະຍາດ. ຄວາມພະຍາຍາມທັງໝົດນີ້ກໍເເມ່ນເພື່ອຮັບປະກັນສຸຂະພາບທີ່ດີຂອງເດັກນ້ອຍ ແລະ ແມ່ຍິງທຸກຄົນໃນ ສປປ ລາວ.”

Official handover ceremony of 32 "tek tek" vehicles provided by UNICEF in partnership with Australia to Lao PDR was organised in Houaphanh province.
UNICEF Laos/2024

ຕິດຕໍ່ຜູ້ຮັບຜິດຊອບຂ່າວ

Simon Nazer
Chief of Communication
UNICEF Lao PDR
ໂທລະສັບ: +856 2055519681
ອີເມວ: snazer@unicef.org
ຕະບອງເພັດ ພຸດທະວົງ
ຊ່ຽວຊານວຽກງານໂຄສະນາ ແລະ ສື່ສານມ່ວນຊົນ
ອົງການຢູນິເຊັບ ປະຈຳ ສປປ ລາວ
ໂທລະສັບ: +85621 487520;ext=7520
ໂທລະສັບ: +856 20 96888890
ອີເມວ: tphouthavong@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook